ທ່ານຫູຈິນທາວ ເລຂາທິການໃຫຍ່ສູນກາງພັກກອມມູນິດຈີນ ປະທານປະເທດຈີນໄດ້ພົບປະເຈລະຈາກັບທ່ານຫວງຽນຟູຈອງ ເລຂາທິການໃຫຍ່ສູນກາງພັກກອມມູນິດຫວຽດນາມໃນວັນທີ11ຕຸລານີ້ຢູ່ນະຄອນຫຼວງປັກກິ່ງ.ສອງຝ່າຍໄດ້ແລກປ່ຽນຄຳຄິດຄຳເຫັນຢ່າງກົງໄປກົງມາກ່ຽວກັບບັນຫາທາງທະເລລະຫວ່າງສອງປະເທດ,ໄດ້ຕີລາຄາຢ່າງຕັ້ງໜ້າຕໍ່ສອງປະເທດໄດ້ລົງນາມໃນສັນຍາຫຼັກການພື້ນຖານໃນການແກ້ໄຂບັນຫາທາງທະເລຈີນ-ຫວຽດນາມ,ເຫັນວ່າສັນຍາດັ່ງກ່າວມີຄວາມໝາຍສຳຄັນຫຼາຍໃນການຊີ້ນຳການແກ້ໄຂບັນຫາທາງທະເລຢ່າງເໝາະສົມ.
ທ່ານຫູຈິນທາວ(ຂວາ)ຕ້ອນຮັບທ່ານຫງວຽນຟູຈອງທີ່ມາຢ້ຽມຢາມ
ທ່ານສີຈິ້ນພິງ ກຳມະການປະຈຳກົມການເມືອງສູນກາງພັກກອມມູນິດຈີນ ຮອງປະທານປະເທດຈີນໄດ້ເຂົ້າຮ່ວມການເຈລະຈາດັ່ງກ່າວພ້ອມດ້ວຍກິດຈະກຳທີ່ກ່ຽວຂ້ອງ.
ທ່ານຫູຈິນທາວ ຊີ້ອອກວ່າ,ກ່ອນຄວາມຂັດແຍ່ງທາງທະເລໄດ້ຮັບການແກ້ໄຂໃນທີ່ສຸດ,ບໍ່ຄວນໃຊ້ການກະທຳທີ່ເຮັດໃຫ້ຄວາມຂັດແຍ່ງສັບສົນແລະເປີດກວ້າງອອກ,ຄວນໃຊ້ທ່າທີໃຈເຢັນແລະມີລັກສະນະສ້າງສັນໃນການແກ້ໄຂບັນຫາທີ່ເກີດຂຶ້ນ,ບໍ່ໃຫ້ບັນຫາທີ່ກ່ຽວຂ້ອງກະທົບກະເທືອນເຖິງການພົວພັນສອງພັກສອງລັດຈີນ-ຫວຽດນາມແລະສັນຕິພາບ,ສະຖຽນລະພາບຂອງທະເລຈີນໃຕ້.ສອງຝ່າຍຄວນຕັ້ງໜ້າຄົ້ນຄວ້າແລະປຶກສາຫາລືບັນຫາການຮ່ວມກັນພັດທະນາທະເລຈີນໃຕ້ໃຫ້ມີບາດກ້າວຕົວຈິງໂດຍໄວ.
ທ່ານຫງວຽນຟູຈອງກ່າວວ່າ,ຫວຽດນາມຍິນດີຮ່ວມກັບຈີນຕັ້ງໜ້າຜັນຂະຫຍາຍສັນຍາຫຼັກການພື້ນຖານກ່ຽວກັບບັນຫາທາງທະເລ,ຍຶດໝັ້ນຫຼັການທີ່ປຶກສາຫາລືແລະເຈລະຈາກັນຢ່າງມີໄມຕີຈິດມິດຕະພາບ,ແກ້ໄຂບັນຫາຢ່າງເໝາະສົມ,ບໍ່ໃຫ້ບັນຫາທີ່ກ່ຽວຂ້ອງກະທົບກະເທືອນເຖິງການພົວພັນລະຫວ່າງສອງພັກ-ລັດ,ມິດຕະພາບລະຫວ່າງປະຊາຊົນສອງຊາດແລະສັນຕິພາບ,ສະຖຽນລະພາບທາງທະເລ.
ທ່ານຫູຈິນທາວກ່າວວ່າ,ປີນີ້ແມ່ນການພົວພັນຈີນ-ຫວຽດນາມຫັນເປັນປົກກະຕິຄົບຮອບ20ປີ,ຈີນຍິນດີຮ່ວມກັບຫວຽດນາມປົກປັກຮັກສາແລະເສີມຂະຫຍາຍການພົວພັນຄູ່ຮ່ວມມືຍຸດທະສາດຮອບດ້ານຈີນ-ຫວຽດນາມໃຫ້ກ້າວໄປໜ້າດ້ວຍດີ.
ທ່ານຫງວຽນຟູຈອງກ່າວວ່າຫວຽດນາມຈະຖືການຂະຫຍາຍການພົວພັນກັບຈີນໄວ້ຢູ່ໃນຖານະບູລິມະສິດໃນການພົວພັນຕໍ່ຕ່າງປະເທດຂອງຫວຽດນາມ,ຈະຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານຫວຽດນາມ-ຈີນໃຫ້ຍົກສູງຂຶ້ນສູ່ລະດັບໃໝ່.
1 2 
