ຍີ່ປຸ່ນຖືໂອກາດທີ່ລັດຖະມົນຕີການຕ່າງປະເທດໄປຢ້ຽມຢາມອາຊີຕາເວັນອອກສຽງໃຕ້ເພື່ອລົບກວນສະຖານະການຢູ່ທະເລຈີນໃຕ້
(GMT+08:00) 2011-10-12 17:03:06 cri
CRIລາຍງານວ່າ: ເລີ່ມແຕ່ວັນທີ11ຕຸລານີ້ເປັນຕົ້ນໄປ,ທ່ານໂຄອູອີຊີໂລອູເກນບາ ລັດຖະມົນຕີວ່າການກະຊວງການຕ່າງປະເທດຍີ່ປຸ່ນອອກເດີນທາງໄປຢ້ຽມຢາມສາມປະເທດອາຊີຕາເວັນອອກສຽງໃຕ້ຄືສິງກະໂປ,ມະເລເຊຍແລະອິນໂດເນເຊຍ.ເນື່ອງຈາກວ່າກ່ອນໜ້ານີ້,ຍີ່ປຸ່ນກັບຟີລິບປິນຫາກໍ່ໄດ້ອອກຖະແຫຼງການຮ່ວມທີ່ມີເນື້ອໃນ ເພີ່ມທະວີການຮ່ວມມືໃນການຮັກສາຄວາມໝັ້ນຄົງຢູ່ທະເລຈີນໃຕ້ຊຶ່ງມີຈຸດປະສົງເພື່ອຖ່ວງດຶງຈີນທີ່ມີບົດບາດນັບມື້ນັບສູງຂຶ້ນຢູ່ພາກພື້ນທະເລຈີນໃຕ້.ສະນັ້ນ,ການທີ່ທ່ານໂຄອູອີຊີໂລອູ ເກນບາໄປຢ້ຽມຢາມ3ປະເທດດັ່ງກ່າວໃນເທື່ອນີ້ໄດ້ພາໃຫ້ຫາງສຽງສົນໃຈນຳໂດຍທົ່ວໄປອີກເທື່ອໜຶ່ງ.
ການຢ້ຽມຢາມຂອງທ່ານໂຄອູອີຊີໂລອູເກນບາເທື່ອນີ້ຈະດຳເນີນເປັນເວລາ5ວັນ,ມີວາລະການຢ້ຽມຢາມດັ່ງນີ້ຄື:ກ່ອນອື່ນໄປຢ້ຽມຢາມສິງກະໂປແລະພົບປະເຈລະຈາກັບທ່ານລີຊຽນລູງ ນາຍົກລັດຖະມົນຕີສິງກະໂປ,ເພື່ອແລກປ່ຽນຄຳຄິດເຫັນກ່ຽວກັບການເຈລະຈາສົນທິສັນຍາການພົວພັນຄູ່ຮ່ວມມືທາງດ້ານເສດຖະກິດຍຸດທະສາດບໍລິເວນມະຫາສະໝຸດປາຊີຟິກຫຼືTPP.ຫຼັງຈາກນັ້ນໄປຢ້ຽມຢາມມະເລເຊຍແລະພົບປະເຈລະຈາກັບທ່ານນາຈິບ ທົນ ລາຈັກ ນາຍົກລັດຖະມົນຕີມະເລເຊຍເພື່ອແນະນຳເຕັກນິກແລະວິສາຫະກິດຍີ່ປຸ່ນໃຫ້ມະເລເຊຍກ່ຽວກັບບັນຫານຳໃຊ້ພະລັງງານໃໝ່ທີ່ອະນຸລັກສິ່ງແວດລ້ອມລຸ້ນໃໝ່ໃນການກໍ່ສ້າງຕົວເມືອງ.ສຸດທ້າຍ,ທ່ານໂຄອູອີຊີໂລອູ ເກນບາຈະໄປຢ້ຽມຢາມອິນໂດເນເຊຍທີ່ເປັນປະເທດປະທານໝູນວຽນຂອງກອງປະຊຸມສຸດຍອດອາຊີຕາເວັນອອກທີ່ຈະໄຂຂຶ້ນໃນເດືອນໜ້າ,ຈະພົບປະເຈລະຈາກັບທ່ານມາຕີ ນາທາເລກາວາ ລັດຖະມົນຕີວ່າການກະຊວງການຕ່າງປະເທດອິນໂດເນເຊຍແລະເຈົ້າໜ້າທີ່ອື່ນໆເພື່ອທຳຄວາມເຂົ້າໃຈແລະປຶກສາຫາລືກັນກ່ຽວກັບບາງຫຼັກໝັ້ນແລະຈຸດຢືນກ່ຽວກັບການຮັບປະກັນຄວາມໝັ້ນຄົງທາງທະເລແລະບັນຫາອື່ນໆທີ່ສອງຝ່າຍຈະກ່າວໃນກອງປະຊຸມສຸດຍອດອາຊີຕາເວັນອອກ.
ມີນັກວິເຄາະຊີ້ອອກວ່າ, ຈາກວາລະການເດີນທາງຂອງທ່ານໂຄອູອີຊີໂລ ອູເກນບາ ສາມາດເບິ່ງອອກໄດ້ວ່າການຢ້ຽມຢາມຂອງທ່ານເທື່ອນີ້ມີຈຸດປະສົງສອງດ້ານຄືດ້ານໜຶ່ງແມ່ນມີຈຸດປະສົງທາງການເມືອງທີ່ຫວັງວ່າກ່ອນກອງປະຊຸມສຸດຍອດອາຊີຕາເວັນອອກທີ່ຕົ້ນຕໍຈະປຶກສາຫາລືຄວາມໝັ້ນຄົງທາງທະເລທີ່ຈະໄຂຂຶ້ນໃນເດືອນພະຈິກນັ້ນ,ເພີ່ມທະວີການຮ່ວມມືກັບປະເທດຕ່າງໆໃນອາຊີຕາເວັນອອກສຽງໃຕ້ໃນດ້ານຄວາມໝັ້ນຄົງທາງທະເລ,ເພື່ອເຮັດໃຫ້ຈຸດຢືນຂອງຍີ່ປຸ່ນທີ່ລິເລີ່ມໃຫ້ແກ້ໄຂຄວາມຂັດແຍ່ງຢູ່ເຂດທະເລຈີນໃຕ້ດ້ວຍການປຶກສາຫາລືຫຼາຍຝ່າຍນັ້ນບັນລຸຜົນເປັນຈິງ.ອີກດ້ານໜຶ່ງແມ່ນຈຸດປະສົງທາງດ້ານເສດຖະກິດ,ຄືຫວັງຢາກເພີ່ມທະວີການແລກປ່ຽນກັນທາງດ້ານເສດຖະກິດກັບບັນດາປະເທດອາຊຽນທີ່ເສດຖະກິດພັດທະນາຢ່າງຕໍ່ເນື່ອງແລະການກໍ່ສ້າງພື້ນຖານໂຄ່ງລ່າງທີ່ພັດທະນາຢ່າງວ່ອງໄວ.
ນັກວິເຄາະເຫັນວ່າ,ທ່ານໂຄອູອີຊີໂລ ອູເກນບາ ຢ້ຽມຢາມ3ປະເທດອາຊີຕາເວັນອອກສຽງໃຕ້ໃນຄັ້ງນີ້ແມ່ນຄວາມພະຍາຍາມອີກເທື່ອໜຶ່ງຂອງຍີ່ປຸ່ນເພື່ອແຊກແຊງບັນຫາທະເລຈີນໃຕ້.ອະທິປະໄຕຂອງເຂດທະເລຈີນໃຕ້ບໍ່ໄດ້ກ່ຽວຫຍັງກັບຍີ່ປຸ່ນ,ແຕ່ຍີ່ປຸ່ນແຊກແຊງເຂົ້າມາແມ່ນມີຈຸດປະສົງທີ່ຢ້ານວ່າພາຍຫຼັງປະເທດທີ່ກ່ຽວຂ້ອງໄດ້ປຶກສາຫາລືກັນຢ່າງມີໄມຕີຈິດມິຕະພາບແບບສອງຕໍ່ສອງແລະຕົກລົງຢືນຢັນອະທິປະໄຕແລ້ວ,ມັນຈະກະທົບເຖິງຜົນປະໂຫຍດຂອງຍີ່ປຸ່ນ.
ປະຈຸບັນ,ເວທີການເມືອງຂອງຍີ່ປຸ່ນມີທ່າອ່ຽງແນວໜຶ່ງທີ່ເປັນໜ້າເອົາໃຈໃສ່ນັ້ນກໍ່ຄືລັດຖະບານໂຢຊີຮິໂກະ ໂນດະກຳລັງປະຕິບັດອັນທີ່ວ່າ"ການຕ່າງປະເທດຄ່ານິຍົມ",ເພີ່ມທະວີການຮ່ວມມືກັບປະເທດທີ່ມີຄ່ານິຍົມອັນດຽວກັນກັບຍີ່ປຸ່ນໃນດ້ານເສດຖະກິດຕະຫຼາດແລະລະບົບກົດໝາຍ,ຊຶ່ງປະເທດເຫຼົ່ານີ້ລວມທັງອິນເດຍ,ອົສຕຼາລີ,ການາດາແລະເປຣູເປັນຕົ້ນ.ໃນກອງປະຊຸມສຸດຍອດອາຊີຕາເວັນອອກທີ່ຈະໄຂຂຶ້ນໃນເດືອນໜ້າ,ຍີ່ປຸ່ນອາດຈະເລີ່ມປະຕິບັດນະໂຍບາຍການຕ່າງປະເທດຄ່ານິຍົມຢ່າງເປັນທາງການ.ກ່ຽວກັບເລື່ອງນີ້,ຫາງສຽງຍີ່ປຸ່ນເຫັນວ່າ,ການຕ່າງປະເທດຄ່ານິຍົມທີ່ຈິງແລ້ວແມ່ນເພື່ອປັດເຂ່ຍປະເທດຈີນຢູ່ນອກນະໂຍບາຍດັ່ງກ່າວ,ເຊິ່ງຈະເຮັດໃຫ້ບາງປະເທດມີທ່າທີຫຍໍ້ທໍ້ຕໍ່ເລື່ອງນີ້,ແລະກໍ່ຈະເຮັດໃຫ້ການພົວພັນລະຫວ່າງຈີນ-ຍີ່ປຸ່ນຂະຫຍາຍຕົວໄປໃນທາງບໍ່ດີປານໃດ,ການຕ່າງປະເທດແນວນີ້ຈະໄດ້ຮັບໝາກຜົນຕາມທີ່ຍີ່ປຸ່ນຄາດໄວ້ລ່ວງໜ້າຫຼືບໍ່ນັ້ນ,ປະຈຸບັນຍັງຍາກທີ່ຈະຄາດຄະເນໄດ້.
