ຊ່ຽວຊານອາເມລິກາກ່າວວ່າການເວົ້າໂຍກບັນຫາອັດຕາແລກປ່ຽນເງິນຢວນຈີນເກີນໄປອາດຈະສ້າງຜົນເສຍຫາຍໃຫ້ແກ່ທົ່ວໂລກ
(GMT+08:00) 2011-10-13 17:48:06 cri
CRIລາຍງານວ່າ: ທ່ານຜູ່ຟັງທີ່ເຄົາລົບ,ວັນທີ11ຕຸລານີ້,ສະພາສູງອາເມລິກາໄດ້ຮັບຮອງຍັດຕິກົດໝາຍທີ່ກ່ຽວຂ້ອງເພື່ອເພີ່ມແຮງກົດດັນໃສ່ເງິນຢວນຈີນ.ບຸກຄົນຜູ່ມີຊື່ສຽງທີ່ມີສາຍຕາເຫັນກວ້າງມອງໄກຫຼາຍໆຄົນລ້ວນແຕ່ເຫັນວ່າ,ບັນຫາອັດຕາແລກປ່ຽນເງິນຢວນກັບຕຳແໜ່ງວຽກເຮັດງານທຳຂອງອາເມລິກາມີສ່ວນພົວພັນບໍ່ຫຼາຍປານໃດ,ສະນັ້ນ,ການເວົ້າໂຍກບັນຫາອັດຕາແລກປ່ຽນເງິນຢວນບໍ່ມີຜົນດີຫຍັງເລີຍ.ຫວ່າງມໍ່ໆມານີ້,ດຣ.ເດເລັກ ຊີຊາສ ນັກເສດຖະສາດຂອງມູນນິທິອະນຸລັກນິຍົມຊຶ່ງເປັນສະຖາບັນລະດົມຄວາມຄິດທີ່ມີຊື່ສຽງຂອງອາເມລິກາໄດ້ຂຽນບົດຄວາມພາຍໃຕ້ຫົວຂໍ້ທີ່ວ່າ"ອັດຕາແລກປ່ຽນເງິນຢວນ,ຄ່າອຸດໜູນກັບຕຳແໜ່ງວຽກເຮັກງານທຳຂອງອາເມລິກາ",ເພື່ອວິຈານຕໍ່ບັນຫາດັ່ງກ່າວ.ຕໍ່ໄປເຊີນຟັງບົດແຈ້ງຂ່າວທີ່ນັກຂ່າວCRIລາຍງານຈາກອາເມລິກາ.
ໃນບົດຄວາມພາຍໃຕ້ຫົວຂໍ້ທີ່ວ່າ"ອັດຕາແລກປ່ຽນເງິນຢວນ,ຄ່າອຸດໜູນກັບຕຳແໜ່ງວຽກເຮັກງານທຳຂອງອາເມລິກາ",ດຣ.ເດເລັກ ຊີຊາສໄດ້ແຕ້ມຮູບເສັ້ນຄົດຫຼາຍໃບເພື່ອອະທິບາຍການພົວພັນລະຫວ່າງອັດຕາແລກປ່ຽນເງິນຢວນກັບການປະກອບອາຊີບຂອງອາເມລິກາ.ທ່ານກ່າວວ່າ:
"ຖ້າເບິ່ງການພົວພັນລະຫວ່າງອັດຕາແລກປ່ຽນເງິນຕາກັບການປະກອບອາຊີບໃນໄລຍະຍາວນານແລ້ວເຫັນວ່າ:ໃນປີ1994,ເງິນຢວນຕໍ່ເງິນໂດລາສະຫະລັດໄດ້ປະກົດມີສະພາບຕົກຄ່າ,ໃນໄລຍະນັ້ນ,ອັດຕາຫວ່າງງານຂອງອາເມລິກາແມ່ນຕົກຕ່ຳລົງ.ເລີ່ມແຕ່ປີ2005ເປັນຕົ້ນໄປ,ເງິນຢວນຕໍ່ເງິນໂດລາຄ່ອຍໆແຂງຄ່າຂຶ້ນ,ອີງຕາມກົດເກນນີ້ຄວນ ສ້າງຕຳແໜ່ງວຽກເຮັດງານທຳໃຫ້ອາເມລິກາ,ແຕ່ອັດຕາຫວ່າງງານຂອງອາເມລິກຊ້ຳພັດສູງຂຶ້ນຫຼາຍສົມຄວນ.ສະນັ້ນ,ມັນເບິ່ງບໍ່ອອກວ່າແມ່ນອັດຕາແລກປ່ຽນເງິນຢວນໄດ້ເຮັດໃຫ້ຕຳແໜ່ງວຽກເຮັດງານທຳຂອງອາເມລິກາຫຼຸດໜ້ອຍລົງ,ແຕ່ຫາກແມ່ນຍ້ອນປັດໄຈອື່ນອີກຈຳນວນໜຶ່ງຈິ່ງພາໃຫ້ເກີດມີປະກົດການດັ່ງກ່າວ."
ດຣ. ເດເລັກ ຊີຊາສ ເຫັນວ່າ,ອາເມລິກາຖ້າຢາກກະຕຸ້ນໃຫ້ການປະກອບອາຊີບຟື້ນຕົວດີຂຶ້ນກໍ່ຈຳເປັນຕ້ອງແກ້ໄຂດ້ວຍຕົນເອງຫາກບໍ່ຄວນໂຍນໂທດໃຫ້ຈີນ.ທ່ານກ່າວວ່າ:
"ມາຮອດປະຈຸບັນ,ລວມຍອດປະລິມານເສດຖະກິດອາເມລິກາຍັງໃຫຍ່ກວ່າຈີນຄືເກົ່າ,ສະນັ້ນ,ການເຄື່ອນໄຫວທາງດ້ານເສດຖະກິດຂອງອາເມລິກາໄດ້ສ້າງຜົນກະທົບຕໍ່ເສດຖະກິດອາເມລິກາຫຼາຍກວ່າຜົນສະທ້ອນຂອງການເຄື່ອນໄຫວທາງດ້ານເສດຖະກິດຈີນທີ່ມີຕໍ່ເສດຖະກິດອາເມລິການັ້ນຢ່າງຫຼວງຫຼາຍ.ບັນ ຫາຂອງອາເມລິກາແມ່ນຂຸມການເງິນໃນປະຈຸບັນຢູ່ໃນລະດັບສູງໂພດ,ຊຶ່ງໄດ້ຍາດເອົາທຶນພາກເອກະຊົນຈົນເຮັດໃຫ້ຍາກທີ່ຈະສ້າງຕຳແໜ່ງວຽກເຮັດງານທຳໄດ້,ສະນັ້ນ,ສິ່ງສຳຄັນທີ່ຄວນເຮັດທີ່ສຸດໃນປະຈຸບັນແມ່ນຫຼຸດຂຸມການເງິນ,ສ່ວນບັນຫາເງິນຢວນພຽງແຕ່ເປັນຜູ່ ຮັບເຄາະແທນເທົ່ານັ້ນ,ມັນບໍ່ສາມາດປ່ຽນແປງສະພາບໃນປະຈຸບັນຢ່າງແທ້ຈິງໄດ້."
ດຣ. ເດເລັກ ຊີຊາສເຫັນວ່າ: ອາເມລິກາປະສົບບັນຫາເສຍປຽບດຸນການຄ້າໃນມູນຄ່າຈຳນວນຫຼວງຫຼາຍຈາກການຄ້າກັບຈີນແທ້.ໃນຂະນະດຽວກັນ,ອາເມລິກາແລະຈີນມີຄວາມຂັດແຍ່ງຢ່າງແທ້ຈິງໃນບັນຫາການຄ້າ,ແຕ່ບໍ່ຄວນແກ້ໄຂບັນຫາເຫຼົ່ານີ້ດ້ວຍການສ້າງຍັດຕິກົດໝາຍແຕ່ຝ່າຍດຽວ.ແຕ່ຄວນແກ້ໄຂດ້ວຍການເຈລະຈາໃນໂອກາດຫຼາຍຢ່າງເຊັ່ນອົງການການຄ້າໂລກແລະອື່ນໆ.ທ່ານກ່າວວ່າ,ຈີນໃນຖານະເປັນອົງກອນເສດຖະກິດໃຫຍ່ອັນດັບສອງຂອງໂລກ,ຄວນສ້າງນະໂຍບາຍເສດຖະກິດຕາມສະພາບຕົວຈິງຂອງປະເທດຕົນໂດຍບໍ່ຕ້ອງສົງໃສເລີຍ.
ດຣ. ເດເລັກ ຊີຊາສກ່າວຕັກເຕືອນວ່າ,ຖ້າວ່າບັນຫາອັດຕາແລກປ່ຽນເງິນຢວນເປັນການເລີ່ມຕົ້ນຄວາມຂັດແຍ່ງດ້ານການຄ້າອັນໜັກໜ່ວງທາງລະຫວ່າງສອງປະເທດອາເມລິກາຈີນ,ອາເມລິກາກໍ່ຈະເສຍຄວາມສາມາດໃນການນຳພາ,ໃນນັ້ນ,ຜົນສະທ້ອນຕໍ່ການຕ່າງປະເທດອາເມລິກາແມ່ນຫຼາຍກວ່າດ້ານອື່ນໆໝົດ.
