ວັນທີ 12 ຕຸລານີ້, ໃນກອງປະຊຸມລະລຶກຈີນເຂົ້າເປັນສະມາຊິກອົງການການຄ້າໂລກ ຫຼື WTO ຄົບຮອບ 10 ປີທີ່ຈັດຂຶ້ນຢູ່ເມືອງເຊີ່ນເຈີ້ນ, ທ່ານຊຸ່ນເຈີ້ນອີ ເອກອັກຄະລັດຖະທູດຜູ່ທຳອິດຄະນະຜູ່ແທນຈີນປະຈຳ WTO ແລະ ທ່ານອີ້ສຽວຈູນ ເອກອັກຄະລັດຖະທູດຈີນປະຈຳWTOຜູ່ປັດຈຸບັນກ່າວວ່າ, ນັບແຕ່ເຂົ້າເປັນສະມາຊິກ WTO ເປັນເວລາ 10 ປີມານີ້, ແມ່ນ 10 ປີທີ່ເສດຖະກິດຈີນພັດທະນາໄດ້ດີທີ່ສຸດ ແລະ ໄວທີ່ສຸດ.
ທ່ານອີ້ສຽວຈູນກ່າວວ່າ, ໝາກຜົນອັນພົ້ນເດັ່ນທີ່ສຸດຕັ້ງແຕ່ເຂົ້າເປັນສະມາຊິກ WTO 10 ປີມານີ້ກໍ່ແມ່ນ, ເສດຖະກິດໄດ້ຮັບການພັດທະນາແບບກ້າວກະໂດດ,ສຳເລັດການປ່ຽນແປງເປັນປະເທດໃຫຍ່ດ້ານເສດຖະກິດການຄ້າ. ຕົວເລກສະຖິຕິສະແດງໃຫ້ເຫັນວ່າ, ໃນເວລາ 10 ປີມານີ້, ການສົ່ງອອກຂອງຈີນໄດ້ເພິ່ມຂຶ້ນເກືອບ 5 ເທົ່າ, ການນຳເຂົ້າກໍ່ເພິ່ມຂຶ້ນ 4,7 ເທົ່າ, ກາຍເປັນປະເທດສົ່ງອອກໃຫຍ່ທີ່ສຸດໃນໂລກ. ນອກຈາກການເຕີບໂຕຂອງເສດຖະກິດ, ຂະບວນການ 10 ປີນັບແຕ່ເຂົ້າເປັນສະມາຊິກ WTOກໍ່ແມ່ນຂະບວນການທີ່ຈີນຮ່ຳຮຽນ ແລະ ເຂົ້າຮ່ວມໂລກາພິວັດ.
ທ່ານຊຸ່ນເຈີ້ນອີຊີ້ອອກວ່າ, ຈີນເຂົ້າເປັນສະມາຊິກWTO, ບໍ່ພຽງແຕ່ໄດ້ປ່ຽນແປງຈີນເທົ່ານັ້ນ, ກໍ່ໄດ້ປ່ຽນແປງອົງການການຄ້າໂລກ, ໄດ້ຊຸກຍູ້ເສດຖະກິດໂລກໃຫ້ພັດທະນາ. ຮອດປີກາຍນີ້, ຈີນໄດ້ກາຍເປັນຕະຫຼາດໃຫຍ່ອັນດັບທີໜຶ່ງຂອງອົງກອນເສດຖະກິດຕ່າງໆ ເຊັ່ນ, ຍີ່ປຸ່ນ, ສ.ເກົາຫຼີ ແລະ ອົສຕຼາຣີເປັນຕົ້ນ.ນອກນີ້, ມາດຕະການຕ່າງໆເຊັ່ນ,ສ້າງການຄ້າໃຫ້ຈະເລີນການຄ້າດ້ວຍເຕັກນິກວິທະຍາສາດ ແລະ ຍຸດທະສາດຍີ່ຫໍ້ດັງທີ່ຈີນປະຕິບັດນັ້ນກໍ່ເຮັດໃຫ້ຄວາມຕ້ອງການນຳເຂົ້າສິນຄ້າງວດໃຫຍ່ຂອງຈີນເພິ່ມຫຼາຍຂຶ້ນຢ່າງເດັ່ນຊັດ, ປະກອບສ່ວນຢ່າງຫຼວງຫຼາຍເຂົ້າໃນຕະຫຼາດສາກົນ,ໄດ້ກາຍເປັນ"ເຄື່ອງຍົນ"ໃໝ່ທີ່ຊຸກຍູ້ການຄ້າໂລກໃຫ້ເຕີບໂຕ.
