ຮ່ວມກັນປົກປັກຮັກສາຄວາມປອດໄພທາງດ້ານການເດີນເຮືອຢູ່ແມ່ນ້ຳຂອງແມ່ນໜ້າທີ່ອັນຮີບດ່ວນທີ່ສຸດໃນປະຈຸບັນ
(GMT+08:00) 2011-10-14 18:33:40 cri
ຂ່າວສານຊິນຮວາລາຍງານວ່າ: ພາຍໃຕ້ການຊ່ວຍເຫຼືອຂອງລັດຖະບານຈີນ,ຄອບຄົວຂອງລູກເຮືອທີ່ເສຍຊີວິດຈາກເຫດການໂຈມຕີຢູ່ເຂດນ້ຳ3ຫຼ່ຽມຄຳແມ່ນ້ຳຂອງໄດ້ເດີນທາງໄປຮອດໄທໃນວັນທີ13ຕຸລານີ້ເພື່ອຮັບເອົາສົບຂອງຄົນໃນຄອບຄົວ.ມື້ດຽວກັນ,ກະຊວງການຕ່າງປະເທດຈີນຍັງໄດ້ຮຽກຮ້ອງຢ່າງຮີບດ່ວນຕໍ່ທູດໄທ,ມຽນມາແລະລາວທີ່ປະຈຳຢູ່ຈີນໃຫ້ຈັບຕົວແລະລົງໂທດອາຊະຍາກອນເພື່ອຮັບປະກັນຄວາມປອດໄພຂອງລູກເຮືອແລະເຮືອ.
ແມ່ນ້ຳລ້ານຊ້າງ-ແມ່ນ້ຳຂອງທີ່ຍາວທັງໝົດເກືອບ5000ກິໂລແມັດແມ່ນແມ່ນ້ຳທີ່ຍາວທີ່ສຸດຂອງອາຊີຕາເວັນອອກສຽງໃຕ້,ແລະກໍ່ເປັນສາຍນ້ຳທຳມະຊາດທີ່ເຊື່ອມຕໍ່ ຈີນ,ລາວ,ມຽນມາ,ໄທ,ກຳປູເຈຍແລະຫວຽດນາມ.ນັບຕັ້ງແຕ່ປະຕິບັດສັນຍາວ່າດ້ວຍການເດີນເຮືອຂອງເຮືອການຄ້າ4ປະເທດຄືຈີນ,ລາວ,ມຽນມາແລະໄທໃນປີ2001ເປັນຕົ້ນມາ,ການຂົນສົ່ງທາງນ້ຳຢູ່ແມ່ນ້ຳສາກົນສາຍນີ້ໄດ້ດຳເນີນໄປເປັນປົກກະຕິ,ປະເທດຕ່າງໆຢູ່ເຂດລ້ອງແມ່ນ້ຳລ້ານຊ້າງ-ແມ່ນ້ຳຂອງໄດ້ດຳເນີນການຮ່ວມມືຢ່າງຮອບດ້ານໃນດ້ານຕ່າງໆເຊັ່ນເສດຖະກິດການຄ້າ,ການທ່ອງທ່ຽວ,ການພັດທະນາຊັບພະຍາກອນ,ການຮ່ວມມືດ້ານເຕັກນິກ,ການແລກປ່ຽນວັດທະນະທຳ,ການອະນຸລັກສິ່ງແວດລ້ອມທຳມະຊາດແລະອື່ນໆ,ປະຊາຊົນ70ລ້ານກວ່າຄົນຢູ່ລຽບຕາມສອງຝັ່ງແມ່ນ້ຳໄດ້ຮັບຜົນປະໂຫຍດໂດຍກົງ.
ປະເທດຕ່າງໆຢູ່ເຂດລ້ອງແມ່ນ້ຳລ້ານຊ້າງ-ແມ່ນ້ຳຂອງໄດ້ທຳຄວາມພະຍາຍາມຢ່າງຫຼວງຫຼາຍຕະຫຼອດມາເພື່ອປົກປັກຮັກສາຄວາມປອດໄພຂອງທາງນ້ຳຄຳສາຍນີ້. ສັນຍາວ່າດ້ວຍການເດີນເຮືອຂອງເຮືອການຄ້າຈີນ-ໄທ-ລາວ-ມຽນມາໄດ້ລະບຸຢ່າງຈະແຈ້ງວ່າ"ເພີ່ມຄວາມປອດໄພໃນການເດີນເຮືອ."ມາດຕາທີ1ຂອງບົດບັນທຶກຄວາມເຂົ້າໃຈຂອງສັນຍາດັ່ງກ່າວກໍ່ໄດ້ລວມທັງເອກກະສານເພີ່ມເຕີມກ່ຽວກັບລະບຽບການເດີນເຮືອຢ່າງມີຄວາມປອດໄພຂອງເຮືອ.
ສິ່ງທີ່ຄວນຊີ້ອອກນັ້ນແມ່ນ,ໃນຖານະເປັນແມ່ນ້ຳພຽງສາຍດຽວທີ່ເຊື່ອມຕໍ່6ປະເທດຂອງອາຊີ,ສະພາບແວດລ້ອມທາງດ້ານການເດີນເຮືອຕາມລຳແມ່ນ້ຳລ້ານຊ້າງ-ແມ່ນ້ຳຂອງມີເອກກະລັກພິເສດແລະຄວາມສັບສົນໂດຍສະເພາະແມ່ນຢູ່ເຂດ3ຫຼ່ຽມຄຳທີ່ເປັນບ່ອນເກີດເຫດການປຸ້ນຈີ້ນັ້ນ,ແມ່ນ້ຳຂອງທີ່ນ້ຳໃສສະອາດແຫ່ງນີ້ໄດ້ແຍກເປັນສອງສາຍຊຶ່ງກາຍເປັນເສັ້ນຊາຍແດນທຳມະຊາດລະຫວ່າງໄທ,ມຽນມາແລະລາວ.ແຫ່ງນີ້ເປັນບ່ອນຫ່າງໄກສອກຫຼີກ,ເງື່ອນໄຂຄົມມະນາຄົມບໍ່ສະດວກດີປານໃດ,ປະຊາຊົນຫຼາຍເຜົ່າຮ່ວມກັນດຳລົງຊີວິດຢູ່ແຫ່ງນີ້,ຍັງມີຊື່ທີ່ບໍ່ດີວ່າເປັນ3ຫຼ່ຽມພິດ,ບັນຫາຄວາມບໍ່ສະຫງົບທາງສັງຄົມແມ່ນມີຢູ່ຕະຫຼອດ.ສະພາບສັງຄົມຄືແນວນີ້ໄດ້ສ້າງບັນຫາຫຍຸ້ງຍາກຕ່າງໆນາໆໃນການປົກປັກຮັກສາຄວາມປອດໄພທາງດ້ານການເດີນເຮືອ.ດ້ວຍເຫດນີ້,ຈິ່ງຕ້ອງການເປັນພິເສດໃຫ້ປະເທດທີ່ກ່ຽວຂ້ອງກ້າເອົາຊະນະຄວາມຫຍຸ້ງຍາກ,ຖືການຮ່ວມກັນປົກປັກຮັກສາຄວາມປອດໄພທາງການເດີນເຮືອຕາມລຳແມ່ນ້ຳຂອງເປັນໜ້າທີ່ອັນຮີບດ່ວນທີ່ສຸດໃນປະຈຸບັນ.
ພາຍຫຼັງສະຫຼຸບບົດຮຽນຈາກເຫດການທີ່ໜ້າສັງເວດ,ຄົນເຮົາຫວັງແຮງກ້າໃຫ້ປະເທດຕ່າງໆລຸ່ມແມ່ນ້ຳເພີ່ມທະວີການປະສານງານໃນການຮັບມືກັບສະພາບສຸກເສີນແລະການຮ່ວມມືຮັກສາຄວາມປອດໄພຂ້າມແດນ,ຮ່ວມກັນທຳຄວາມພະຍາຍາມຈົນສຸດຄວາມສາມາດເພື່ອປົກປັກຮັກສາຄວາມປອດໄພຕາມລຳແມ່ນ້ຳຂອງ,ເຮັດໃຫ້ທາງນ້ຳຄຳສາຍນີ້ມີການພັດທະນາຢ່າງມີຊີວິດຊີວາ,ສືບຕໍ່ສ້າງຄວາມຜາສຸກໃຫ້ແກ່ປະຊາຊົນບັນດາປະເທດຢູ່ລຽບຕາມຝັ່ງແມ່ນ້ຳຂອງ.
