ໄທກ່າວວ່າຍິນດີຮ່ວມມືຢ່າງໃກ້ຊິດກັບຈີນເພື່ອສືບສວນເຫດການລູກເຮືອຈີນຖືກໂຈມຕີ
(GMT+08:00) 2011-10-15 13:53:28 cri
ຄືນວັນທີ13ຕຸລານີ້,ກະຊວງການຕ່າງປະເທດໄທໄດ້ອອກຖະແຫຼງການກ່ຽວກັບເຫດການລູກເຮືອຈີນຖືກໂຈມຕີຢູ່ແມ່ນ້ຳຂອງໂດຍແຈ້ງວ່າໄທຍິນດີຮ່ວມມືຢ່າງໃກ້ຊິດກັບຈີນເພື່ອດຳເນີນການສືບສວນເຫດການນີ້ຢ່າງວ່ອງໄວ.
ຖະແຫຼງການແຈ້ງວ່າ,ລັດຖະບານໄທເອົາໃຈໃສ່ໃນລະດັບສູງຕໍ່ເຫດການທີ່ລູກເຮືອຈີນຖືກໂຈມຕີ,ພາກສ່ວນທີ່ກ່ຽວຂ້ອງຈະປະຕິບັດຕາມຫຼັກການທີ່ເປີດເຜີຍແລະໂປ່ງໃສ,ດຳເນີນການສືບສວນຢ່າງວ່ອງໄວຢູ່ບົນພື້ນຖານທີ່ເຄົາລົບປະຕິບັດຕາມກົດໝາຍຂອງໄທ.ລັດຖະບານໄທຍິນດີຮ່ວມກັບໜ່ວຍງານພ້ອມດ້ວຍເຈົ້າໜ້າທີ່ກະຊວງການຕ່າງປະເທດແລະກະຊວງປ້ອງກັນຄວາມສະຫງົບຂອງຈີນທີ່ເດີນທາງໄປອຳເພີຊຽງແສນນັ້ນຮ່ວມມືຢ່າງໃກ້ຊິດໃນການກວດສົບຂອງລູກເຮືອທີ່ເສຍຊີວິດ,ສອບຖາມຜູ່ເຫັນເຫດການແລະອື່ນໆ.
ຖະແຫຼງການຍັງຂຽນວ່າ,ໄທໄດ້ເພີ່ມຄວາມເຂັ້ມງວດໃນການປະຕິບັດມາດຕະການຮັກສາຄວາມປອດໄພຢູ່ຕາມລຳແມ່ນ້ຳຂອງແຕ່3ຫຼ່ຽມຄຳຫາອຳເພີຊຽງແສນທີ່ຍາວ10ກິໂລແມັດ.ເພື່ອປ້ອງກັນບໍ່ໃຫ້ເຫດການທີ່ຄ້າຍຄືກັນນີ້ເກີດຂຶ້ນອີກ,ໄທຍິນດີຮັກສາການແລກປ່ຽນຄວາມຄິດຄວາມເຫັນແລະສົນທະນາກັນກັບຈີນ,ລາວແລະມຽນມາເພື່ອຮ່ວມກັນຄົ້ນຄວ້າມາດຕະການໃນການເພີ່ມຄວາມປອດໄພໃນການເດີນເຮືອຢູ່ຕາມແມ່ນ້ຳລ້ານຊ້າງ-ແມ່ນ້ຳຂອງ.
