ຈີນຫວຽດນາມອອກຖະແຫຼງການຮ່ວມ,ໂດຍກ່າວເນັ້ນວ່າຈະແກ້ໄຂຄວາມຂັດແຍ່ງກັນກ່ຽວກັບ ບັນຫາທະເລຈີນໃຕ້ໂດຍຜ່ານການປຶກສາຫາລືດ້ວຍໄມຕີຈິດມິດຕະພາບແລະການເຈລະຈາ
(GMT+08:00) 2011-10-15 16:03:16 cri
ວັນທີ15ຕຸລານີ້,ຈີນແລະຫວຽດນາມອອກຖະແຫຼງການຮ່ວມໂດຍກ່າວວ່າ,ສອງຝ່າຍໄດ້ແລກປ່ຽນຄວາມເຫັນຢ່າງເປີດໃຈກ່ຽວກັບບັນຫາເທິງທະເລ,ເນັ້ນໜັກເຖິງຄວາມປາຖະໜາທາງການເມືອງແລະຄວາມຕັດສິນໃຈທີ່ຈະແກ້ໄຂຄວາມຂັດແຍ່ງກັນໂດຍຜ່ານການປຶກສາຫາລືດ້ວຍໄມຕີຈິດມິດຕະພາບແລະການເຈລະຈາ,ແລະປົກປັກຮັກສາສັນຕິພາບແລະສະຖຽນລະພາບຂອງເຂດທະເລຈີນໃຕ້.
ຖະແຫຼງການຂຽນວ່າ,ສອງຝ່າຍຈະອີງຕາມຄວາມເຫັນທີ່ເປັນເອກະສັນກັນຂອງຜູ່ນຳສອງພັກສອງລັດແລະ"ສັນຍາຫຼັກການພື້ນຖານກ່ຽວກັບການຊີ້ນຳການແກ້ໄຂບັນຫາເທິງທະເລຈີນຫວຽດນາມ",ເພີ່ມຄວາມແຮງໃນການເຈລະຈາກ່ຽວກັບບັນຫາເທິງທະເລ,ຊອກຫາວິທີແກ້ໄຂອັນເປັນພື້ນຖານແລະເປັນເວລາຍາວນານທີ່ສອງຝ່າຍລ້ວນແຕ່ຮັບເອົາໄດ້,ແລະຕັ້ງໜ້າຄົ້ນຄວ້າຫາລືວິທີແກ້ໄຂລັກສະນະຂ້າມຜ່ານ,ລັກສະນະຊົ່ວຄາວທີ່ບໍ່ມີຜົນກະທົບຕໍ່ຫຼັກໝັ້ນແລະຈຸດຢືນ ຂອງໃຜລາວ.
ຖະແຫຼງການຂຽນວ່າ,ສອງຝ່າຍຈະຊຸກຍູ້ການເຈລະຈາກ່ຽວກັບການຂີດແບ່ງເສັ້ນຊາຍແດນຢູ່ເຂດທະເລນອກປາກອ່າວເປີຍປູ້ຢ່າງໝັ້ນທ່ຽງ,ພ້ອມກັນນັ້ນ,ຕັ້ງໜ້າປຶກສາຫາລືບັນຫາການພັດທະນາຮ່ວມກັນຂອງເຂດທະເລແຫ່ງນີ້.ຕັ້ງໜ້າຊຸກຍູ້ການຮ່ວມມືໃນຫຼາຍຂົງເຂດ,ເຊັ່ນ:ການອະນຸລັກສິ່ງແວດລ້ອມທະເລ,ການຄົ້ນຄວ້າວິທະຍາສາດທາງດ້ານທະເລ,ການກູ້ໄພເທິງທະເລ,ການຂຸດຄົ້ນນ້ຳມັນແລະອາຍແກັສທຳມະຊາດແລະການຫຼຸດຄວາມເສຍຫາຍຈາກໄພພິບັດປັນຕົ້ນ.
ຖະແຫຼງການຂຽນວ່າ,ກ່ອນບັນຫາຄວາມຂັດແຍ່ງກັນເທິງທະເລຈະໄດ້ຮັບການແກ້ໄຂໃນທີ່ສຸດ,ສອງຝ່າຍຈະຮ່ວມກັນປົກປັກຮັກສາສັນຕິພາບແລະສະຖຽນລະພາບຂອງເຂດທະເລຈີນໃຕ້,ຮັກສາຄວາມໃຈເຢັນແລະອົດກັ້ນ,ຈະບໍ່ໃຊ້ການກະທຳທີ່ເຮັດໃຫ້ຄວາມຂັດແຍ່ງກັນສັບສົນແລະໜັກໜ່ວງກວ່າເກົ່າ.ບໍ່ເຮັດໃຫ້ອິດທິກຳລັງທີ່ເປັນປໍລະປັກກັນໃດໆທຳລາຍການພົວພັນລະຫວ່າງສອງພັກແລະສອງລັດ,ແລະຊຳລະແກ້ໄຂບັນຫາທີ່ປະສົບດ້ວຍທ່າທີລັກສະນະສ້າງສັນ,ບໍ່ເຮັດໃຫ້ບັນຫາເຫຼົ່ານີ້ມີຜົນກະທົບຕໍ່ການພົວພັນລະຫວ່າງສອງພັກແລະສອງລັດ,ພ້ອມດ້ວຍ ສັນຕິພາບ,ສະຖຽນລະພາບຂອງເຂດທະເລຈີນໃຕ້.
ຖະແຫຼງການຍັງຂຽນວ່າ,ຈະເພີ່ມທະວີການໄປມາຫາສູ່ກັນດ້ວຍໄມຕີຈິດມິດຕະພາບລະ ຫວ່າງສອງປະເທດຈາກລະດັບຍຸດທະສາດແລະສະພາບລວມ,ຊຸກຍູ້ໃຫ້ການພົວພັນຄູ່ຮ່ວມມື ຍຸດທະສາດຮອບດ້ານຈີນຫວຽດນາມມີການຂະຫຍາຍຕົວຢ່າງປອດໄສ,ໝັ້ນທ່ຽງເປັນເວລາຍາວນານ.ລົງເລິກການຮ່ວມມືລະຫວ່າງສອງປະເທດໃນຂົງເຂດການປະຕິບັດກົດໝາຍແລະຄວາມປອດໄພ,ເພີ່ມການຕິດຕໍ່ພົວພັນກັນລະຫວ່າງເຈົ້າໜ້າທີ່ລະດັບສູງຂອງສອງກອງທັບ.
