ຈີນຫວັງວ່າໄທຈະປະສານງານຢ່າງຕັ້ງໜ້າເພື່ອຊຸກຍູ້ວຽກງານສືບສວນຄະດີທີ່ລູກເຮືອຈີນຖືກຫຼອນໂຈມຕີຢູ່ແມ່ນ້ຳຂອງ
(GMT+08:00) 2011-10-17 10:38:03 cri
ວັນທີ16ຕຸລານີ້, ຢູ່ຈັງຫວັດຊຽງຣາຍຂອງໄທ, ເຈົ້າໜ້າທີ່ລັດຖະບານຈີນໄດ້ພົບປະເຈລະຈາກັບທ່ານພັນສິລິ ປຣະພາວັດ, ຜູ່ບັນຊາການຕຳຫຼວດໄທກ່ຽວກັບເຫດການທີ່ລູກເຮືອຈີນຖືກຫຼອນໂຈມຕີຢູ່ລ້ອງແມ່ນ້ຳຂອງ, ຫວັງວ່າໄທຈະສືບຕໍ່ຮັກສາທ່າທີອັນຕັ້ງໜ້າໃນການປະສານງານກັບຝ່າຍຈີນໃນການອຳນວຍຄວາມສະດວກທາງດ້ານຕ່າງໆໃຫ້ແກ່ໜ່ວຍງານແລະເຈົ້າໜ້າທີ່ຂອງລັດຖະບານຈີນໃນການດຳເນີນວຽກງານຢູ່ໄທ, ເພື່ອຊຸກຍູ້ວຽກງານສືບສວນຄະດີໃຫ້ມີຄວາມຄືບໜ້າ.
ທ່ານກົ່ວຊ້າວຊຸ່ນ, ຫົວໜ້າໜ່ວຍງານລັດຖະບານຈີນກ່າວວ່າ, ຜູ້ນຳຈີນໃຫ້ຄວາມສຳຄັນໃນລະດັບສູງຕໍ່ເຫດການທີ່ລູກເຮືອຈີນຖືກລອບຄາດຕະກຳຢູ່ແມ່ນ້ຳຂອງ, ປະຊາຊົນແລະສື່ມວນຊົນຈີນກໍ່ເອົາໃຈໃສ່ຫຼາຍຕໍ່ເຫດການທີ່ເກີດຂຶ້ນແລະຜົນຄວາມຄືບໜ້າຂອງການສືບສວນ. ທັງສອງປະເທດຈີນໄທແລະປະເທດທີ່ກ່ຽວຂ້ອງມີຄວາມຮັບຜິດຊອບໃນການສືບສວນຄະດີແລະລົງໂທດຄົນຮ້າຍໂດຍໄວ.
ທ່ານພັນສິລິກ່າວວ່າ, ຕຳຫຼວດໄທໃຫ້ຄວາມສຳຄັນໃນລະດັບສູງຕໍ່ເຫດການດັ່ງກ່າວແລະຄວາມເອົາໃຈໃສ່ຂອງຝ່າຍຈີນ, ໄດ້ຕັ້ງໜ່ວຍສືບສວນ, ສອບສວນພິເສດພິເສດ, ໄທຈະປະສານສົມທົບກັບຝ່າຍຈີນຢ່າງຮອບດ້ານແລະຕັ້ງໜ້າ, ຮ່ວມກັນດຳເນີນການສືບສວນສອບສວນແລະແກ້ໄຂຄະດີດັ່ງກ່າວໂດຍໄວ.
ມື້ດຽວກັນ, ເຮືອບັນທຸກສິນຄ້າຂອງຈີນ11ລຳແລະລູກເຮືອ78ຄົນທີ່ຄ້າງຢູ່ທ່າເຮືອຊຽງແສນຈັງຫວັດຊຽງຣາຍຂອງຂອງໄທຍ້ອນເຫດການຫຼອນໂຈມຕີຢູ່ຕາມລຳແມ່ນ້ຳຂອງນັ້ນໄດ້ກັບຄືນສູ່ທ່າເຮືອກ່ວນເລີຍກິ່ງແຂວງປົກຄອງຕົນເອງເຜົ່າລື້ສິບສອງພັ່ນນາແຂວງຢຸນນານຢ່າງປອດໄພພາຍໃຕ້ການປ້ອງກັນຂອງເຮືອລາດຕະເວນປ້ອງກັນຄວາມສະຫງົບຂອງຈີນ. ນອກນີ້ເຮືອບັນທຸກສິນຄ້າ15ລຳແລະລູກເຮືອ86ຄົນໄດ້ເຂົ້າສູ່ເຂດນ່ານນ້ຳທີ່ປອດໄພ, ຫຼັງຈາກສຳເລັດໜ້າທີ່ຂົນຖ່າຍສິນຄ້າຢູ່ຕ່າງປະເທດແລ້ວກໍ່ຈະກັບຄືນປະເທດຈີນ.
