"ຂົວພາສາຈີນ"ການແຂ່ງຂັນພາສາຈີນຂອງນັກຮຽນມັດທະຍົມໂລກກາຍເປັນຂົວມິດຕະພາບແລະແລກປ່ຽນວັດທະນະທຳ
(GMT+08:00) 2011-10-17 17:24:52 cri
"ຂົວພາສາຈີນ"ຄັ້ງທີ4ຊຶ່ງເປັນການແຂ່ງຂັນພາສາຈີນຂອງນັກຮຽນມັດທະຍົມໂລກໄດ້ໄຂຂຶ້ນໃນວັນທີ17ຕຸລານີ້ຢູ່ນະຄອນຈຸ່ງກິ່ງ ພາກຕາເວັນຕົກຂອງຈີນ.ການແຂ່ງຂັນພາສາຈີນຄັ້ງນີ້ມີຫົວຂໍ້ວ່າ"ໄວໜຸ່ມນັດກັນຮຽນພາສາຈີນດ້ວຍຄວາມເບີກບານມ່ວນຊື່ນ",ມີນັກຮຽນຜູ່ດີເລີດແລະຄູເກືອບ200ຄົນທີ່ມາຈາກ43ປະເທດໄດ້ເຂົ້າຮ່ວມການແຂ່ງຂັນຄັ້ງນີ້.
ທ່ານຫູຈື້ພິງ ຮອງຫົວໜ້າຫ້ອງການໜ່ວຍນຳພາການເຜີຍແຜ່ພາສາຈີນແຫ່ງຊາດຈີນແຈ້ງໃຫ້ຊາບວ່າ,ເລີ່ມແຕ່ປີ2008ເປັນຕົ້ນມາ, ໄດ້ມີນັກຮຽນມັດທະຍົມຈາກປະເທດຕ່າງໆຈຳນວນ1ໝື່ນກວ່າຄົນໄດ້ເຂົ້າຮ່ວມການແຂ່ງຂັນ"ຂົວພາສາຈີນ",ຜູ່ຊົມທັງພາຍໃນແລະຕ່າງປະເທດນັບເປັນ10ລ້ານຄົນໄດ້ເບິ່ງການແຂ່ງຂັນ.ທ່ານຫູຈື້ພິງກ່າວວ່າ:
"ຂົວພາສາຈີນໄດ້ກາຍເປັນໂຄງການທີ່ມີຊື່ສຽງໃນການແລກປ່ຽນທາງດ້ານວັດທະນະທຳພາສາລະຫວ່າງຈີນກັບຕ່າງປະເທດແລ້ວ.ຜູ່ເຂົ້າຮ່ວມການແຂ່ງຂັນຈະມີໂອກາດມາສຳຜັດກັບວັດທະນະທຳຈີນດ້ວຍຕົນເອງ,ສາມາດສຳຜັດກັບສັງຄົມຈີນ,ຜູກມິດໄມຕີກັບໝູ່ເພື່ອນຄົນຈີນໂດຍສະເພາະໝູ່ເພື່ອນທີ່ມີອາຍຸໃນໄວດຽວກັນ.ຜ່ານຈາກການແລກປ່ຽນເຫຼົ່ານີ້,ຈະໄດ້ເຂົ້າໃຈປະເທດຈີນຫຼາຍກວ່າເກົ່າ,ມີຄວາມສົນໃຈແລະຄວາມເຊື່ອໝັ້ນຫຼາຍຂຶ້ນຕື່ມອີກໃນການຮຽນພາສາຈີນ."
ປະຈຸບັນ,ໃນທົ່ວໂລກ,ຖ້າຍົກເວັ້ນປະເທດແລະເຂດແຄວ້ນທີ່ໃຊ້ພາສາຈີນເປັນພາສາແມ່ແລ້ວ,ຈຳນວນຄົນທີ່ຮຽນພາສາຈີນລວມທັງໝົດມີເຖິງ40ລ້ານຄົນແລ້ວ.ເພື່ອຕອບສະໜອງກັບຄວາມຮຽກຮ້ອງຕ້ອງການໃນການຮຽນພາສາຈີນທີ່ນັບມື້ນັບເພີ່ມຂຶ້ນຢ່າງຫຼວງຫຼາຍນັ້ນ,ຫ້ອງການພາສາຈີນກໍ່ຄືສຳນັກງານສະຖາບັນຂົງຈື້ໄດ້ສ້າງຕັ້ງສະຖາບັນຂົງຈື້300ກວ່າແຫ່ງແລະຫ້ອງຮຽນຂົງຈື້300ກວ່າແຫ່ງຢູ່96ປະເທດແລະເຂດແຄວ້ນ.ປີ2010,ສະຖາບັນຂົງຈື້ແລະຫ້ອງຮຽນຂົງຈື້ລວມທັງໝົດແລ້ວໄດ້ເປີດຫຼັກສູດການສອນພາສາຈີນ1ໝື່ນຫ້ອງ,ນັກຮຽນທີ່ຈົດທະບຽນເຂົ້າຮຽນມີເຖິງ3ແສນຄົນ.
ທ່ານນາງ ຄາສເທີລີນ ວິເຕັກ ໄດ້ນຳພາຄະນະຜູ່ແທນເຢຍລະມັນມາເຂົ້າຮ່ວມການແຂ່ງຂັນ"ຂົວພາສາຈີນ"ຢູ່ປະເທດຈີນເທື່ອນີ້,ນາງເປັນຄູສອນພາສາຈີນໃນໂຮງຮຽນແຫ່ງໜຶ່ງຂອງນະຄອນຫຼວງແບັກແລ່ງຂອງເຢຍລະມັນ.ນາງກ່າວວ່າ,ເມື່ອ15ປີກ່ອນ,ແບັກແລ່ງມີໂຮງຮຽນມັດທະຍົມພຽງແຫ່ງດຽວເທົ່ານັ້ນທີ່ຕັ້ງຫຼັກສູດສອນພາສາຈີນ,ສ່ວນປະຈຸບັນມີໂຮງຮຽນ10ກວ່າແຫ່ງໄດ້ຕັ້ງຫຼັກສູດສອນພາສາຈີນແລ້ວ,ນັກຮຽນນັບມື້ນັບຫຼາຍມີຄວາມສົນໃຈນຳການຮຽນພາສາຈີນ.ນາງກ່າວວ່າ:
"ເວລາຂ້ອຍຍັງຮຽນຢູ່ມະຫາວິທະຍາໄລເມື່ອ20ກວ່າປີກ່ອນ,ຂ້ອຍບໍ່ໄດ້ຄິດເລີຍວ່າການສິດສອນພາສາຈີນໄດ້ມີຄວາມກ້າວໜ້າຫຼາຍພາຍໃນເວລາອັນສັ້ນໆປານນີ້,ຂ້ອຍຄິດວ່ານັກຮຽນລຸ້ນໃໝ່ມີໂອກາດທີ່ດີຫຼາຍໃນການຮຽນພາສາຈີນໂດຍສະເພາະແມ່ນການແຂ່ງຂັນ"ຂົວພາສາຈີນ"ເປັນເວທີທີ່ດີສຳລັບຊາວໜຸ່ມເຍົາວະຊົນຢູ່ແຫ່ງຕ່າງໆຂອງໂລກໃນການສະແດງໝາກຜົນຂອງການຮຽນພາສາຈີນ."
ເພື່ອເຮັດໃຫ້ການແຂ່ງຂັນສ່ອງແສງເຖິງຈຸດປະສົງທີ່ເພີ່ມທະວີມິດຕະພາບ,ຝ່າຍຮັບຜິດຊອບໃນການຈັດຕັ້ງການແຂ່ງຂັນໄດ້ຄັດເລືອກເປັນພິເສດເອົາຄອບຄົວອາສາສະໝັກ150ຄອບຄົວ,ຜູ່ເຂົ້າຮ່ວມການແຂ່ງຂັນສາມາດໄປຢູ່ນຳຄອບຄົວຄົນຈີນເຫຼົ່ານີ້ເພື່ອສຳຜັດກັບວັດທະນະທຳຈີນ.ການແຂ່ງຂັນ"ຂົວພາສາຈີນ"ຄັ້ງນີ້ຈະສິ້ນສຸດລົງໃນວັນທີ30ເດືອນນີ້.
