ຫວ່າງມໍ່ໆມານີ້ ຢູ່ນະຄອນກວາງໂຈ່ວ, ທ່ານຫວາງຊາວ, ລັດຖະມົນຕີຊ່ວຍວ່າການກະຊວງການຄ້າຈີນກ່າວວ່າ, ໃນໄລຍະແຜນການ 5 ປີຄັ້ງທີ 12, ຄາດວ່າມູນຄ່າການນຳເຂົ້າສິນຄ້າຂອງຈີນຈະບັນລຸ 8000 ຕື້ໂດລາສະຫະລັດ.
ທ່ານຫວາງຊາວ ກ່າວວ່າ, ນັບແຕ່ຈີນເຂົ້າເປັນສະມາຊິກອົງການການຄ້າໂລກເປັນເວລາ 10 ປີມານີ້, ການນຳເຂົ້າສິນຄ້າຂອງຈີນໃນແຕ່ລະປີ ລ້ວນແຕ່ມີການເພີ່ມຂຶ້ນເກືອບຮອດ 100 ຕື້ໂດລາ ຫຼືຫຼາຍກວ່ານີ້ອີກ, ການນຳເຂົ້າສິນຄ້າເພີ່ມຂຶ້ນໄວຄືແນວນີ້ແມ່ນມີໜ້ອຍໃນປະເທດອື່ນ. ໃນຖານະທີ່ເປັນປະເທດທີ່ພວມພັດທະນາໃຫຍ່ກວ່າໝູ່ໃນໂລກ, ຈີນພວມຢູ່ໃນໄລຍະທີ່ຫັນເປັນອຸດສາຫະກຳ ແລະ ຫັນເປັນຕົວເມືອງຢ່າງວ່ອງໄວ, ມີຕະຫຼາດທີ່ກວ້າງໃຫຍ່ແລະມີທ່າແຮງບົ່ມຊ້ອນທາງດ້ານການພັດທະນາຢ່າງໃຫຍ່ຫຼວງ, ນີ້ຈະໄດ້ນຳເອົາໂອກາດຕະຫຼາດ ມາໃຫ້ແກ່ປະເທດຕ່າງໆໃນໂລກຫຼາຍກວ່າເກົ່າໃນການເປີດກວ້າງການສົ່ງອອກຕໍ່ຈີນ.
ໃນຕໍ່ໜ້າ, ໃນຂະນະທີ່ຊຸກຍູ້ການສົ່ງອອກສິນຄ້າຢ່າງໝັ້ນທ່ຽງ, ຈີນກໍຈະເອົາໃຈໃສ່ຕໍ່ການເປີດກວ້າງການນຳເຂົ້າ, ຊຸກຍູ້ໃຫ້ການຄ້າກັບຕ່າງປະເທດສາມາດພັດທະ ນາຢ່າງດຸນດ່ຽງແລະຕໍ່ເນື່ອງ ໂດຍຜ່ານການປັບປຸງໂຄງປະກອບການນຳເຂົ້າ, ຜ່ອນຄາຍ ແລະ ເຮັດໃຫ້ມາດຕະການຄຸ້ມຄອງການນຳເຂົ້າກະທັດຮັດກວ່າເກົ່າ, ປັບປຸງລະບົບການຊຸກຍູ້ການນຳເຂົ້າໃຫ້ເໝາະສົມ ແລະ ຊ່ອງທາງອື່ນໆອີກ.
