ຈີນແລະໄທຮ່ວມກັນສືບສວນເຫດການກ່ຽວກັບລູກເຮືອຈີນຖືກໂຈມຕີ
(GMT+08:00) 2011-10-18 18:06:04 cri
CRIລາຍງານວ່າ: ໜ່ວຍງານຂອງລັດຖະບານຈີນທີ່ປະກອບດ້ວຍກະຊວງການຕ່າງປະເທດ,ກະຊວງປ້ອງກັນຄວາມສະຫງົບແລະກະຊວງຄົມມະນາຄົມຂົນສົ່ງໄດ້ເດີນທາງໄປຮອດຈັງຫວັດຊຽງລາຍຂອງໄທໃນຕອນບ່າຍວັນທີ15ຕຸລານີ້ເພື່ອສືບສວນຫາສາເຫດຂອງເຫດການກ່ຽວກັບລູກເຮືອຈີນຖືກສັງຫານໃນວັນທີ5ຕຸລານີ້ຢູ່ຕາມລຳແມ່ນ້ຳຂອງໃນເຂດ3ຫຼ່ຽມຄຳ.ຕອນຄ່ຳວັນທີ15ຕຸລານີ້,ຜູ່ຊ່ຽວຊານໃນການສືບສວນຄະດີທາງອາຍາຂອງກະຊວງປ້ອງກັນຄວາມສະຫງົບຈີນໄດ້ພ້ອມກັບເຈົ້າໜ້າທີ່ຂອງໄທຮ່ວມກັນພິສູດສົບຂອງຜູ່ເສຍຊີວິດໃນເຫດການ.ຕອນເຊົ້າວັນທີ16,ສອງຝ່າຍເລີ່ມຕົ້ນການຮ່ວມກັນສືບສວນຕໍ່ເຮືອທີ່ຖືກໂຈມຕີຢູ່ບ່ອນເກີດເຫດ.
ທ່ານປານສິຣິປາຣະພາວັດ ຮອງຜູ່ບັນຊາການຕຳຫຼວດແຫ່ງຊາດໄທກ່າວວ່າ,ສຳນັກງານຕຳຫຼວດແຫ່ງຊາດໄທເອົາໃຈໃສ່ໃນລະດັບສູງຕໍ່ຄະດີໃນຄັ້ງນີ້ພ້ອມດ້ວຍຄວາມເປັນຫ່ວງຂອງຈີນ.ທ່ານກ່າວວ່າ:
"ມື້ນີ້,ທາງສຳນັກງານຕຳຫຼວດແຫ່ງຊາດໄທໄດ້ແຕ່ງຕັ້ງໜ່ວຍງານສືບສວນຊຶ່ງລວມທັງຊ່ຽວຊານຄະດີອາຍາເພື່ອຮ່ວມກັນສືບສວນຄະດີໃນຄັ້ງນີ້. ສຳນັກງານຕຳຫຼວດແຫ່ງຊາດໄທເອົາໃຈໃສ່ໃນລະດັບສູງຕໍ່ຄະດີທີ່ເກີດຂຶ້ນແລະໄດ້ເລັ່ງໃຫ້ສືບສວນຄະດີຢ່າງຮີບດ່ວນ.ເຈົ້າໜ້າທີ່ຕຳຫຼວດໄທຈະຮ່ວມມືກັບໜ່ວຍງານຜູ່ຊ່ຽວຊານຂອງຈີນ,ບໍ່ວ່າຈະເປັນການສືບສວນ,ຂໍ້ມູນຫຼືການເກັບກຳຫຼັກຖານ,ພວກຂ້າພະເຈົ້າລ້ວນແຕ່ຈະໃຫ້ການປະສານສົມທົບກັນຈົນສຸດຄວາມສາມາດຂອງຕົນ."
ວັນທີ17ຕຸລານີ້,ພາຍໃຕ້ການເດີນທາງຮ່ວມຂອງຮອງຜູ່ບັນຊາການຕຳຫຼວດແຫ່ງຊາດໄທແລະເຈົ້າໜ້າທີ່ສະຖານທູດຈີນປະຈຳໄທ,ໜ່ວຍງານຂອງຈີນໄດ້ເດີນທາງດ້ວຍເຮືອໄວຂອງຕຳຫຼວດໄທໄປສືບສວນຢູ່ເຂດແມ່ນ້ຳຂອງທີ່ເປັນບ່ອນທີ່ລູກເຮືອຈີນເສຍຊີວິດຍ້ອນຖືກຫຼອນໂຈມຕີ.ມື້ດຽວກັນ,ຜູ່ຊ່ຽວຊານຈີນຮ່ວມກັບເຈົ້າໜ້າທີ່ຂອງໄທໄດ້ຮ່ວມກັນສືບຕໍ່ສືບສວນຊອກຄົ້ນຫາຫຼັກຖານຢູ່ເຮືອທີ່ຖືກໂຈມຕີ.
ກ່ຽວກັບສະພາບຄືບໜ້າຂອງການສືບສວນໃນເບື້ອງຕົ້ນ,ທ່ານພັນສິຣິ ປຣະພາວັດ ຮອງຜູ່ບັນຊາການຕຳຫຼວດແຫ່ງຊາດໄທເປີດເຜີຍໃຫ້ຮູ້ວ່າ,ພາຍຫຼັງສອງຝ່າຍໄດ້ສືບສວນແລະຊອກຄົ້ນຫາຫຼັກຖານຢູ່ບ່ອນເກີດເຫດແລ້ວໄດ້ຢືນຢັນວ່າ,ກຸ່ມປະກອບອາວຸດທີ່ບໍ່ຮູ້ຖານະຈຳນວນ5ຄົນໄດ້ປຸ້ນສະດົມເຮືອສອງລຳກ່ອນທີ່ເຮືອທັງສອງລຳນັ້ນເຂົ້າສູ່ນ່ານນ້ຳຂອງໄທ,ແຕ່ສຳລັບລາຍລະອຽດຍັງພວມສືບສວນຢ່າງຮີບຮ້ອນຢູ່.ສ່ວນເລື່ອງກ່ຽວກັບບັນຫາຄວາມປອດໄພຢູ່ເຂດແມ່ນ້ຳຂອງ,ໄທກໍ່ຈະປຶກສາຫາລືກັບລັດຖະບານມຽນມາ,ລາວແລະຈີນເພື່ອສ້າງມາດຕະການຮັກສາຄວາມປອດໄພທີ່ບັງເກີດຜົນ.ທ່ານປານສິຣິປຣະພາວັດ ກ່າວວ່າ:
"ຄວນຈັດກອງປະຊຸມ4ຝ່າຍຄືມຽນມາ,ລາວ,ໄທແລະຈີນອີກເທື່ອໜຶ່ງເພື່ອສ້າງມາດຕະການສະເພາະເພື່ອຮັກສາຄວາມປອດໄພຕາມລຳແມ່ນ້ຳຂອງໃນເຂດ3ຫຼ່ຽມຄຳ,ສ້າງຄວາມເຊື່ອໝັ້ນໃຫ້ແກ່ຜູ່ທີ່ເດີນທາງໃນລຳແມ່ນ້ຳຂອງ.ກ່ຽວກັບສະພາບຄືບໜ້າຂອງການສືບສວນ,ສາມາດຢືນຢັນໃນເບື້ອງຕົ້ນວ່າເຮືອທີ່ເກີດເຫດພຽງແຕ່ແມ່ນຖືກເຮືອໄວ4ລຳຕິດຕາມແລະຂົ່ມຂູ່ໃນເວລາເດີນເຮືອຢູ່ບ່ອນຫ່າງຈາກເຂດ3ຫຼ່ຽມຄຳໄປທາງທິດເໜືອປະມານ15ຫາ20ກິໂລແມັດເທົ່ານັ້ນ,ກ່ຽວກັບດ້ານນີ້ພວກຂ້າພະເຈົ້າຍັງພວມສືບສວນຢ່າງຮີບຮ້ອນຕໍ່ເຮືອທີ່ຄາດວ່າອາດຈະເຫັນເຫດການຕົວຈິງທີ່ເກີດຂຶ້ນໃນຄັ້ງນີ້."
