ຕາມຂ່າວ CRI: ວັນທີ 18 ຕຸລານີ້ ຢູ່ທີ່ເຊີແນວ, ນາງເອລີຊາເບັດ ບາຍສ໌, ໂຄສົກຫ້ອງການປະສານງານວຽກງານມະນຸດສະທຳ ສະຫະປະຊາຊາດ ກ່າວວ່າ, ໄພນ້ຳຖ້ວມທີ່ເກີດຂຶ້ນຢູ່ຫຼາຍປະເທດແຖບອາຊີອາຄະເນໃນໄລຍະຜ່ານມາ ໄດ້ເຮັດໃຫ້ຫຼາຍກວ່າ 700 ຄົນເສຍຊີວິດແລ້ວ.
ນາງບາຍສ໌ ກ່າວວ່າ, ໄພນ້ຳຖ້ວມທີ່ເກີດຂຶ້ນຢູ່ໄທ, ກຳປູເຈຍ, ລາວ ແລະຫວຽດນາມໃນໄລຍະຜ່ານມານີ້ ໄດ້ເຮັດໃຫ້ມີຄວາມເສຍຫາຍທາງດ້ານຊັບສິນແລະຊີວິດຂອງຄົນຢ່າງຫຼວງຫຼາຍ. ຢູ່ໄທ ໄພນ້ຳຖ້ວມທີ່ຮ້າຍແຮງກວ່າໝູ່ ມີເຖິງ 25 ຈັງຫວັດ, ມີ 12 ຈັງຫວັດ ເຊິ່ງລວມທັງນະຄອນ ຫຼວງບາງກອກຕົກຢູ່ໃນສະພາບລະມັດລະວັງທີ່ສຸດ, ປະຊາຊົນຖືກຜົນກະທົບຈາກໄພນ້ຳຖ້ວມຫຼາຍກວ່າ 2 ລ້ານ 4 ແສນຄົນ. ຄາດວ່າໃນອາທິດໜ້າ, ໄທຍັງຈະຖືກກະທົບາກຝົນຕົກໜັກ, ຢູ່ພາກໃຕ້ມີຄວາມອັນຕະລາຍເພີ່ມຂຶ້ນທີ່ຈະເກີດໄພນ້ຳຊຸທັ່ງລົງຈາກພູເຂົາ.
ສ່ວນຢູ່ຫວຽດນາມແລະກຳປູເຈຍ, ຍ້ອນຜູ້ກູ້ໄພໄປຮອດເຂດປະສົບໄພໄດ້ຍາກ, ປັດຈຸບັນພາຍນອກຍັງບໍ່ໄດ້ຮູ້ກ່ຽວກັບສະພາບແລະຜົນເສຍຫາຍຈາກໄພນ້ຳຖ້ວມ.
ອົງການຕ່າງໆທີ່ສັງກັດ ສປຊ ໄດ້ເລີ່ມປະຕິບັດກົນໄກໃນການຊ່ວຍເຫຼືອກູ້ໄພ, ໄດ້ສະໜອງນ້ຳດື່ມທີ່ສະອາດໃຫ້ແກ່ຜູ້ປະສົບໄພ 2 ແສນ 5 ໝື່ນຄົນ, ໃນອະນາຄົດຍັງຈະສະໜອງການຊ່ວຍເຫຼືອຫຼາຍກວ່ານີ້ອີກໂດຍອີງຕາມສະພາບການປ່ຽນແປງຂອງສະພາບໄພນ້ຳຖ້ວມ.
