ສື່ມວນຊົນຢູ່ອາຊີຕາເວັນອອກສຽງໃຕ້ເວົ້າວ່າຈີນວາງແຜນສ້າງປະເທດເຂັ້ມແຂງທາງດ້ານວັດທະນະທຳ
(GMT+08:00) 2011-10-20 15:57:24 cri
CRIລາຍງານວ່າ: ກອງປະຊຸມຄົບຄະນະເທື່ອທີ6 ສະໄໝທີ17ຂອງ ສູນກາງພັກກອມມູນິດຈີນໄດ້ອັດລົງໃນວັນທີ18ຕຸລານີ້,ຊຶ່ງໄດ້ຮັບຮອງມະຕິຕົກລົງກ່ຽວກັບການລົງເລິກການປະຕິຮູບໂຄງປະກອບວັດທະນະທຳ.ສື່ມວນຊົນຢູ່ອາຊີຕາເວັນອອກສຽງໃຕ້ໄດ້ໃຫ້ຄວາມສົນໃຈຕໍ່ເລື່ອງນີ້,ໂດຍໄດ້ລົງພິມບົດຄວາມເຫັນວ່າຫົວຂໍ້ໃຈກາງຂອງກອງປະຊຸມຄົບຄະນະເທື່ອທີ6ແມ່ນການປະຕິຮູບໂຄງປະກອບວັດທະນະທຳ,ເປັນການຕອບສະໜອງກັບຄວາມຮຽກຮ້ອງຕ້ອງການໃນການພັດທະນາສັງຄົມຂອງແຜ່ນດິນໃຫຍ່ຈີນໃນໄລຍະປະຈຸບັນ,ການປະຕິຮູບຢ່າງເໝາະສົມຈະສາມາດຊຸກຍູ້ການພັດທະນາຂອງສັງຄົມ.
ວັນທີ19ຕຸລານີ້, ສື່ສິ່ງພິມຫຼາຍສະບັບອງໄທໄດ້ລາຍງານຂ່າວດ່ວນກ່ຽວກັບກອງປະຊຸມຄົບຄະນະເທື່ອທີ6ສະໄໝທີ17ຂອງສູນກາງພັກກອມມູນິດຈີນໄຂຂຶ້ນຢູ່ປັກກິ່ງ, ກອງປະຊຸມໄດ້ສຳຫຼວດພິຈາລະນາແລະຜ່ານຮັບຮອງມະຕິຕົກລົງກ່ຽວກັບການຊຸກຍູ້ການປະຕິຮູບໂຄງປະກອບວັດທະນະທຳແລະຊຸກຍູ້ວັດທະນະທຳສັງຄົມນິຍົມໃຫ້ມີການພັດທະນາຢ່າງຂະໜາດໃຫຍ່ແລະຈະເລີນຮຸ່ງເຮືອງ,ແລະຍັງເຫັນວ່າມະຕິຕົກລົງຂອງກອງປະຊຸມເທື່ອນີ້ແມ່ນແຜນການສ້າງປະເທດເຂັ້ມແຂງທາງດ້ານວັດທະນະທຳແລະໂຄງຮ່າງທີ່ກ້າວໄປສູ່ປະເທດເຂັ້ມແຂງທາງດ້ານວັດທະນະທຳ.
ໜັງສືພິມຊິນໂຈ່ວເດລີຂອງມະເລເຊຍລາຍງານວ່າ: ກອງປະຊຸມຄົບຄະນະເທື່ອທີ6ສະໄໝທີ17ຂອງສູນກາງພັກກອມມູນິດຈີນດຳເນີນຢູ່ປັກກິ່ງໃນຫຼາຍມື້ມານີ້ໄດ້ສຸມໃສ່ການລົງເລິກການປະຕິຮູບໂຄງປະກອບວັດທະນະທຳ. ບໍ່ຕ້ອງສົງໃສເລີຍວ່າ,ການຈັດວາງແນວນີ້ໄດ້ສະແດງໃຫ້ເຫັນວ່າຄະນະນຳຂອງພັກກອມມູນິດຈີນໄດ້ມີຄວາມຮັບຮູ້ໃໝ່ຕໍ່ຄວາມສຳຄັນຂອງການກໍ່ສ້າງວັດທະນະທຳ.
ໜັງສືພິມລຽນເຮີຈາວປ້າວຂອງສິງກະໂປໄດ້ລົງພິມບົດຄວາມໂດຍຂຽນວ່າ,ຄະນະກຳມະການສູນກາງພັກກອມມູນິດຈີນ,ອົງການສ້າງນະໂຍບາຍສູງສຸດຂອງພັກກອມມູນິດຈີນໄດ້ຈັດກອງປະຊຸມຄົບຄະນະເທື່ອທີ6ສະໄໝທີ17ຢູ່ປັກກິ່ງເລີ່ມແຕ່ວັນທີ15ຕຸລານີ້ເປັນຕົ້ນມາ.ໃນໄລຍະດຳເນີນກອງປະຊຸມເປັນເວລາຫຼາຍມື້,ກຳມະການສົມບູນແລະກຳມະການສຳຮອງຂອງສູນກາງພັກໄດ້ສຸມໃສ່ການປຶກສາຫາລືການປະຕິຮູບໂຄງປະກອບວັດທະນະທຳ,ເພື່ອພະຍາຍາມສົ່ງເສີມຄວາມສາມາດຂອງປະເທດຊາດໃນດ້ານວັດທະນະທຳໃຫ້ເຂັ້ມແຂງຂຶ້ນ.
