ພິທີເລີ່ມຈຳໜ່າຍປຶ້ມ"ສັກຂີພິຍານແຫ່ງມິດຕະພາບ"ຈະຈັດຂຶ້ນຢູ່ນານນິງເຂດກວາງຊີຂອງຈີນ
(GMT+08:00) 2011-10-20 17:33:41 cri
CRIລາຍງານວ່າ:ພິທີເລີ່ມຈຳໜ່າຍປຶ້ມ"ສັກຂີພິຍານແຫ່ງມິດຕະພາບ"ເພື່ອລະລຶກການສ້າງຕັ້ງສາຍພົວພັນທາງການທູດຈີນ-ລາວຄົບຮອບ50ປີຈະຈັດຂຶ້ນໃນຕອນບ່າຍວັນທີ21ຕຸລານີ້ຢູ່ສະຖານີວິທະຍຸກະຈາຍສຽງປະຊາຊົນກວາງຊີຂອງຈີນ.ຊຶ່ງເປັນໜຶ່ງໃນກິດຈະກຳສຳຄັນຕ່າງໆໃນໄລຍະງານວາງສະແດງສິນຄ້າຈີນ-ອາຊຽນຄັ້ງທີ8.ທ່ານສົມສະຫວາດ ເລັ່ງສະຫວັດ ຮອງນາຍົກລັດຖະມົນຕີລາວຈະເຂົ້າຮ່ວມພິທີດັ່ງກ່າວ.
ປີນີ້ແມ່ນຈີນ- ລາວສ້າງສາຍພົວພັນທາງການທູດຄົບຮອບ50ປີ, ພະແນກພາສາລາວວິທະຍຸສາກົນແຫ່ງປະເທດຈີນໄດ້ວາງແຜນລະອຽດພາຍໃຕ້ຫົວຂໍ້ທີ່ວ່າ"50ປີ50ຄົນ"ແລະໄດ້ຄັດເລືອກບົດດີເດັ່ນແລ້ວຮຽບຮຽງເປັນປຶ້ມ"ສັກຂີພິຍານແຫ່ງມິດຕະພາບ".ປຶ້ມນີ້ໄດ້ທົບທວນ,ບັນທຶກແລະບັນລະຍາຍມິດຕະພາບອັນເປັນມູນເຊື້ອລະຫວ່າງຈີນ-ລາວແລະອະນາຄົດອັນສົດໃສແຫ່ງການພັດທະນາແລະການຮ່ວມມືລະຫວ່າງສອງປະເທດໂດຍໄດ້ສຳພາດຜູ່ນຳປະເທດລາວ,ອະດີດເອກອັກຄະລັດຖະທູດຈີນປະຈຳລາວແລະເອກອັກຄະລັດຖະທູດລາວປະຈຳຈີນ10ກວ່າທ່ານ,ອາສະສະໝັກຈີນຊຸດທຳອິດທີ່ໄປຕ່າງປະເທດ,ນັກທຸລະກິດລາວຢູ່ຈີນແລະນັກທຸລະກິດຈີນຢູ່ລາວ,ນັກສຶກສາລາວຢູ່ຈີນແລະນັກສຶກສາຈີນຢູ່ລາວແລະອື່ນໆ.
ທ່ານຈູມມະລີ ໄຊຍະສອນ ປະທານປະເທດລາວໄດ້ຂຽນບົດອວຍພອນໃຫ້ປຶ້ມນີ້,ທ່ານບໍ່ແສງຄຳ ວົງດາລາ ລັດຖະມົນຕີວ່າການກະຊວງຖະແຫຼງຂ່າວວັດທະນະທຳແລະທ່ອງທ່ຽວຂອງລາວໄດ້ຂຽນຄຳນຳໃຫ້ປຶ້ມ.
ພິທີເລີ່ມຈຳໜ່າຍປຶ້ມ"ສັງຂີພິຍານແຫ່ງມິດຕະພາບ"ທີ່ຈະຈັດຂຶ້ນໃນວັນທີ21ຕຸລານີ້ແມ່ນວິທະຍຸສາກົນແຫ່ງປະເທດຈີນ,ສະຖານກົງສຸນໃຫຍ່ລາວປະຈຳນານນິງ,ພະແນກວິທະຍຸໂທລະພາບແລະຮູບເງົາເຂດປົກຄອງຕົນເອງເຜົ່າຈວ້າງກວາງຊີເປັນເຈົ້າພາບແລະວິທະຍຸກະຈາຍສຽງປະຊາຊົນກວາງຊີ,ສູນຄົ້ນຄວ້າເສດຖະກິດວັດທະນະທຳຈີນອາຊຽນເປັນຜູ່ຈັດ.ໃນມື້ຈັດກິດຈະກຳດັ່ງກ່າວຍັງຈະຈັດພິທີເລີ່ມຈັດສັບປະດາເພງລາວຢູ່ເຂດປົກຄອງຕົນເອງເຜົ່າຈວ້າງກວາງຊີຂອງຈີນ.
