ຕາມຂ່າວ CRI: ປີນີ້ແມ່ນຈີນ-ອາຊຽນສ້າງສາຍພົວພັນຄູ່ເຈລະຈາຄົບຮອບ 20 ປີ, ແລະກໍແມ່ນປີແລກປ່ຽນໄມຕີຈິດມິດຕະພາບລະຫວ່າງຈີນ-ອາຊຽນ. ງານວາງສະແດງສິນຄ້າຈີນ-ອາຊຽນຄັ້ງທີ 8 ເຊິ່ງມີຈຸດປະສົງ "ຊຸກຍູ້ການກໍ່ສ້າງເຂດການຄ້າເສລີຈີນ-ອາຊຽນ, ຮ່ວມກັນຊົມໃຊ້ໂອກາດການຮ່ວມມືແລະການພັດທະ ນາ" ຈະຈັດຂຶ້ນຢູ່ນະຄອນໜານໜິງເຂດກວາງຊີຂອງຈີນແຕ່ວັນທີ 21-26 ຕຸລານີ້. ທ່ານສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີລາວ ຈະນຳພາຄະນະຜູ້ແທນຂັ້ນສູງຂອງລັດຖະບານລາວ ເດີນທາງເຂົ້າຮ່ວມງານວາງສະແດງສິນຄ້າຈີນ-ອາຊຽນຄັ້ງນີ້.
ງານວາງສະແດງສິນຄ້າຈີນ-ອາຊຽນຄັ້ງທຳອິດໄດ້ຈັດຂຶ້ນໃນປີ 2004, ໃນປີນັ້ນ, ຍອດມູນຄ້າການຄ້າລະຫວ່າງຈີນກັບອາຊຽນ ໄດ້ບັນລຸ 100 ຕື້ໂດລາສະຫະລັດ, ໄດ້ບັນລຸເປົ້າໝາຍກ່ອນເວລາກຳນົດໜຶ່ງປີ. ຮອດປີ 2007, ຕົວເລກດັ່ງກ່າວກໍບັນລຸ 200 ຕື້ໂດລາສະຫະລັດ, ໄດ້ບັນລຸເປົ້າໝາຍກ່ອນເວລາກຳນົດ 3 ປີ. ໃນໄລຍະເກີດວິກິດການການເງິນໂລກ, ການສົ່ງອອກສິນຄ້າຂອງບັນດາປະເທດອາຊຽນ ໄປສູ່ສະຫະພາບເອີລົບ, ອາເມລິກາ ແລະ ຍີ່ປຸ່ນໄດ້ຫຼຸດລົງ, ແຕ່ການສົ່ງອອກສິນຄ້າຕໍ່ຈີນຍັງຮັກສາຢູ່ໃນຈັງຫວະເພີ່ມຂຶ້ນ, ໃນນັ້ນ, ງານວາງສະແດງສິນຄ້າຈີນ-ອາຊຽນໄດ້ເສີມຂະຫຍາຍບົດບາດທີ່ສຳຄັນ.
ນັບມາຮອດປັດຈຸບັນ, ງານວາງສະແດງສິນຄ້າຈີນ-ອາຊຽນໄດ້ຈັດຂຶ້ນ 7 ຄັ້ງຢ່າງສຳເລັດຜົນແລ້ວ, ມີມູນຄ່າການຄ້າເຖິງ 9 ຕື້ 883 ລ້ານໂດລາສະຫະລັດ, ມູນຄ່າໃນໂຄງການຮ່ວມມືສາກົນມີເຖິງ 41 ຕື້ 752 ລ້ານໂດລາສະຫະລັດ, ໄດ້ຈັດກອງປະຊຸມແລະເວທີປຶກສາຫາລືລະດັບສູງ 180 ກວ່າຄັ້ງ, ງານວາງສະແດງສິນຄ້າຈີນ-ອາຊຽນໄດ້ກາຍເປັນງານມະໂຫລານສາກົນທີ່ກວມດ້ານການເມືອງ, ການຕ່າງປະເທດ, ເສດຖະກິດການຄ້າ ແລະ ວັດທະນະທຳ, ໄດ້ລິເລີ່ມສ້າງຮູບແບບໃໝ່ແຫ່ງການຮ່ວມມືຮອບດ້ານລະຫວ່າງຈີນ-ອາຊຽນ.
