ຈີນກ່າວວ່າ, ສືບຕໍ່ຂະຫຍາຍການພົວພັນຄູ່ຮ່ວມມືມິດຕະພາບຖານບ້ານໃກ້ເຮືອນຄຽງລະຫວ່າງຈີນກັບມຽນມາແມ່ນຄວາມເຫັນເປັນເອກະສັນກັນຂອງທັງສອງຝ່າຍ
(GMT+08:00) 2011-10-20 10:17:40 cri
ຕາມຂ່າວຂອງເວັບໄຊກະຊວງການຕ່າງປະເທດຈີນ: ວັນທີ 19 ຕຸລານີ້, ທ່ານນາງຈ່ຽງອີ, ໂຄສົກກະຊວງການຕ່າງປະເທດຈີນກ່າວວ່າ, ຈີນເອົາໃຈໃສ່ນຳການພົວພັນລະຫວ່າງຈີນກັບມຽນມາໃນລະດັບສູງໂດຍຕະຫຼອດ, ສືບຕໍ່ ຂະຫຍາຍການພົວພັນຄູ່ຮ່ວມມືມິດຕະພາບຖານບ້ານໃກ້ເຮືອນຄຽງລະຫວ່າງຈີນກັບມຽນມາແມ່ນຄວາມເຫັນເປັນເອກະສັນກັນຂອງທັງສອງຝ່າຍ. ຈີນຈະສືບຕໍ່ຊຸກຍູ້ການຮ່ວມມືມິດຕະພາບໃນຂົງເຂດຕ່າງໆລະຫວ່າງຈີນກັບມຽນມາບົນພື້ນຖານຫຼັກການເຄົາລົບອະທິປະໄຕຊຶ່ງກັນແລະກັນ, ສະເໝີພາບກັນ.
ທ່ານນາງຈ່ຽງອີໄດ້ໃຫ້ທັດສະນະດັ່ງກ່າວໃນເວລາຕອບຄຳຖາມຂອງນັກຂ່າວໃນກອງປະຊຸມທີ່ຈັດຂຶ້ນໃນມື້ດຽວກັນ. ນາງກ່າວວ່າ, ກ່ຽວກັບການຮ່ວມມືເສດຖະກິດການຄ້າລະຫວ່າງຈີນກັບມຽນມາ, ຈີນໄດ້ຊຸກຍູ້ການຮ່ວມມືປະຕິບັດຕົວຈິງໃນຂົງເຂດຕ່າງໆກັບມຽນມາ ບົນພື້ນຖານຫຼັກການສະເໝີພາບກັນ, ຕ່າງຝ່າຍຕ່າງມີຜົນປະໂຫຍດ, ມີຜົນດີຕໍ່ການພັດທະນາເສດຖະກິດສັງຄົມແລະການປັບປຸງຊີວິດການເປັນຢູ່ຂອງປະຊາຊົນມຽນມາ ມາໂດຍຕະຫຼອດ. ກ່ຽວກັບບັນຫາລະອຽດໃນການຮ່ວມມືລະຫວ່າງຈີນກັບມຽນມາ, ສອງຝ່າຍກໍ່ໄດ້ບັນລຸຄວາມເຫັນເປັນເອກະສັນກັນ, ໃນການແກ້ໄຂບັນຫາຕ່າງໆດ້ວຍການປຶກສາຫາລືທີ່ມີໄມຕີຈິດມິດຕະພາບທີ່ດີຕໍ່ກັນ.
