ທ່ານເວີ່ນເຈ່ຍປາວພົບປະກັບຜູ້ນຳຂອງ 5 ປະເທດອາຊຽນ
(GMT+08:00) 2011-10-21 11:06:27 cri
ວັນທີ 20 ຕຸລານີ້ຢູ່ນະຄອນນານນິງເຂດປົກຄອງຕົນເອງເຜົ່າຈ້ວງກວາງຊີ, ທ່ານເວີ່ນເຈ່ຍປາວ, ນາຍົກ ລັດຖະມົນຕີຈີນໄດ້ພົບປະກັບທ່ານສົມສະຫວາດ ເລັ່ງສະຫວັດ, ຮອງນາຍົກລັດຖະມົນຕີລາວ, ທ່ານຮຸນແຊນ, ນາຍົກລັດຖະມົນຕີກຳປູເຈຍ, ທ່ານຫງວຽນຊວນຟຸກ, ຮອງນາຍົກລັດຖມະນົນຕີຫວຽດນາມ, ທ່ານກິດຕິລັດ ນະຣານອງ, ຮອງນາຍົກລັດຖະມົນຕີໄທແລະທ່ານອູຕິນອວງມິນດ໌ໂອ, ຮອງປະທານາທິບໍດີມຽນມາທີ່ມາເຂົ້າຮ່ວມງານວາງສະແດງສິນຄ້າຈີນອາຊຽນຄັ້ງທີ 8 ແລະກອງປະຊຸມສຸດຍອດການທຸລະກິດແລະການລົງທຶນຈີນອາຊຽນຄັ້ງທີ 8.
ທ່ານເວີ່ນເຈ່ຍປາວຫວັງວ່າລັດຖະບານຂອງປະເທດທີ່ກ່ຽວຂ້ອງຈະແກ້ໄຂບັນຫາຄ້າງຄາຂອງລູກເຮືອຈີນທີ່ເສຍຊີວິດຢູ່ແມ່ນ້ຳຂອງຢ່າງເໝາະສົມ, ເລັ່ງລັດການສຳຫຼວດກວດກາແກ້ໄຂຄະດີດັ່ງກ່າວ, ໃຊ້ມາດຕະການຮ່ວມ, ເພີ່ມທະວີການຮ່ວມມືປະຕິບັດກົດໝາຍການເດີນເຮືອນຢູ່ຕາມລຳແມ່ນ້ຳຂອງ, ເພື່ອຮັບປະກັບຄວາມປອດໄພດ້ານຊີວິດແລະຊັບສິນຂອງປະຊາຊົນ.
ໃນເວລາພົບປະກັບທ່ານອູຕິນອວງມິນດ໌ໂອ, ທ່ານເວີ່ນເຈ່ຍປາວກ່າວວ່າ, ການທີ່ປະຕິບັດໂຄງການຮ່ວມມືສຳຄັນລະຫວ່າງຈີນກັບມຽນມາໃຫ້ດີນັ້ນສອດຄ່ອງກັບຜົນປະໂຫຍດຮ່ວມກັນຂອງສອງຝ່າຍ, ສອງຝ່າຍຄວນຕັ້ງໜ້າປະຕິບັດຄວາມຮັບຮູ້ຄືກັນຕ່າງໆຂອງຜູ້ນຳສອງປະເທດ, ປະຕິບັດຕາມຄຳໝັ້ນສັນຍາຢ່າງແທ້ຈິງ, ເພີ່ມທະວີການແລກປ່ຽນປະສານງານ, ແກ້ໄຂບັນຫາທີ່ເກີດຂຶ້ນຢ່າງເໝາະສົມ, ຮັບປະກັນໃຫ້ການຮ່ວມມືເສດຖະກິດການຄ້າລະຫວ່າງຈີນກັບມຽນມາພັດທະນາຢ່າງແຂງແຮງ.
ໃນເວລາເວົ້າເຖິງກອງປະຊຸມສຸດຍອດອາຊີຕາເວັນອອກແລະກອງປະຊຸມອື່ນໆທີ່ຈະໄຂຂຶ້ນ, ທ່ານເວີ່ນເຈ່ຍປາວກ່າວວ່າ, ໂດຍປະເຊີນໜ້າກັບວິກິດການການເງິນສາກົນແລະການທ້າທາຍຕ່າງໆພ້ອມດ້ວຍປັດໄຈອັນສັບສົນ, ກອງປະຊຸມສຸດຍອດອາຊີຕາເວັນອອກເທື່ອນີ້ຍັງຈະຖືການພັດທະນາ, ການຮ່ວມມືແລະຕ່າງຝ່າຍຕ່າງມີຜົນປະໂຫຍດເປັນຫົວຂໍ້, ຍຶດໝັ້ນຖືອາຊຽນເປັນໃຈກາງ.
ຜູ້ນຳຂອງ 5 ປະເທດອາຊຽນດັ່ງກ່າວກ່າວວ່າ, ຍິນດີປັບປຸງກົນໄກອາຊຽນ+1, ອາຊຽນ+3, ເພີ່ມທະວີການແລກປ່ຽນມິດຕະພາບແລະການຮ່ວມມືຕ່າງຝ່າຍຕ່າງມີຜົນກັບຈີນໃນຂົງເຂດເສດຖະກິດ, ວັດທະນະທຳແລະການສຶກສາເປັນຕົ້ນ, ເຮັດໃຫ້ພື້ນຖານການຮ່ວມມືອາຊີຕາເວັນອອກໃຫ້ໝັ້ນຄົງຍາວນານ.
