ທ່ານເວິ່ນເຈ່ຍປາວພ້ອມກັບຜູ່ນຳບາງປະເທດອາຊຽນໄດ້ເຂົ້າຮ່ວມພິທີ
ໄຂງານວາງສະແດງສິນຄ້າຈີນ-ອາຊຽນຄັ້ງທີ8
ໃນຍາມລະດູໃບໄມ້ຫຼົ່ນ ທີ່ສວຍງາມ,ເຂດກວາງຊີຈີນໄດ້ຕ້ອນຮັບກາລະເວລາສຳຄັນແຫ່ງການຮ່ວມມືທາງດ້ານເສດຖະກິດການຄ້າແລະການສົນທະນາຂອງຜູ່ນຳລະດັບສູງລະຫວ່າງຈີນກັບອາຊຽນອີກ.ງານວາງສະແດງສິນຄ້າຈີນ-ອາຊຽນຄັ້ງທີ8ແລະກອງປະຊຸມສຸດຍອດກ່ຽວກັບການຄ້າແລະການລົງທຶນຈີນ-ອາຊຽນຄັ້ງທີ8ໄດ້ໄຂຂຶ້ນຢ່າງຄຶກຄື້ນຢູ່ເມືອງນານນີງໃນຕອນເຊົ້າ ວັນທີ21ຕຸລານີ້.ທ່ານເວີ່ນເຈ່ຍປາວ,ນາຍົກລັດຖະມົນຕີຈີນໄດ້ປະກາດການໄຂງານວາງສະແດງສິນຄ້າຈີນ-ອາຊຽນຢ່າງໜັກແໜ້ນ.
"ຂ້າພະເຈົ້າປະກາດວ່າ,ງານວາງສະແດງສິນຄ້າຈີນ-ອາຊຽນຄັ້ງທີ8ໄຂຂຶ້ນ."
ນັບແຕ່ຈີນແລະອາຊຽນສ້າງການພົວພັນຄູ່ເຈລະຈາ20ກວ່າປີມານີ້,ການຮ່ວມມືທາງດ້ານເສດຖະກິດການຄ້າລະຫວ່າງສອງຝ່າຍໄດ້ມີການຂະຫຍາຍຕົວຢ່າງວ່ອງໄວ,ໄດ້ຮ່ວມກັນສ້າງຕັ້ງເຂດການຄ້າເສລີຈີນອາຊຽນຊຶ່ງເປັນເຂດການຄ້າເສລີທີ່ມີປະຊາກອນຫຼາຍກວ່າໝູ່ໃນໂລກ.ໃນພິທີໄຂກອງປະຊຸມສຸດຍອດການຄ້າແລະການລົງທຶນລະຫວ່າງຈີນ-ອາຊຽນຄັ້ງທີ8ທີ່ຈັດຂຶ້ນຕາມຫຼັງ,ທ່ານເວີ່ນເຈ່ຍປາວກ່າວຄຳປາໄສວ່າ:"20ປີມານີ້,ການພົວພັນລະ ຫວ່າງຈີນກັບອາຊຽນໄດ້ມີການກ້າວກະໂດດຄັ້ງປະຫວັດສາດ ຄືຈາກຄູ່ເຈລະຈາຮອບ ດ້ານກາຍເປັນຄູ່ຮ່ວມມືຖ້ານບ້ານໃກ້ເຮືອນຄຽງແລະໄວ້ເນື້ອເຊື່ອໃຈກັນ,ຈົນເຖິງກາຍເປັນຄູ່ຮ່ວມມືຍຸດທະສາດ.ອົງປະກອບການຮ່ວມມືຢ່າງຮອບດ້ານທີ່ລວມທັງຫຼາຍຂົງເຂດແລະຫຼາຍລະດັບລະຫວ່າງຈີນກັບອາຊຽນນັ້ນໄດ້ເປັນຮູບເປັນຮ່າງຂຶ້ນເປັນກ້າວໆແລ້ວ.ຂ້າພະເຈົ້າເຊື່ອວ່າ,ຂໍພຽງແຕ່ພວກເຮົາປະຕິບັດຕາມຫຼັກການທີ່ວ່າ ສະເໝີພາບກັນ,ໄວ້ເນື້ອເຊື່ອໃຈຊຶ່ງກັນແລະກັນ, ສະແຫວງຫາສິ່ງທີ່ຄືກັນສະຫງວນສິ່ງທີ່ຕ່າງກັນນັ້ນແລ້ວ,ກໍສາມາດຜ່ານຜ່າຄວາມແຕກຕ່າງກັນດ້ານການເມືອງ,ເສດຖະກິດ,ສາດສະໜາແລະວັດທະນະທຳ,ເອົາຊະນະຄວາມຫຍຸ້ງຍາກທຸກປະການ,ຊຸກຍູ້ການຮ່ວມມືລະຫວ່າງສອງຝ່າຍໃຫ້ກ້າວໄປໜ້າຢ່າງບໍ່ຢຸດຢັງແລະບັນລຸຄວາມຈະເລີນຮຸ່ງເຮືອງຮ່ວມກັນໄດ້."
ທ່ານເວິ່ນເຈ່ຍປາວກ່າວຄຳປາໃສໃນພິທີໄຂກອງປະຊຸມສຸດຍອດການຄ້າແລະການລົງທຶນລະຫວ່າງຈີນ-ອາຊຽນຄັ້ງທີ8
ທ່ານນາຍົກລັດຖະມົນຕີເວີ່ນເຈ່ຍປາວກ່າວວ່າ:"ຈີນແລະອາຊຽນລ້ວນແຕ່ແມ່ນອົງກອນເສດຖະກິດທີ່ມີພະລັງຊີວິດຫຼາຍ,ລ້ວນແຕ່ຢູ່ໃນໄລຍະຂໍກະແຈທີ່ຫັນປ່ຽນຮູບການພັດທະນາ.ຖ້າຢາກກຳໂອກາດອັນເປັນປະຫວັດສາດທີ່ຫາຍາກເປັນຢ່າງດີ,ຊຸກຍູ້ໃຫ້ເສດຖະກິດພັດທະນາຢ່າງຕໍ່ເນື່ອງ,ໝັ້ນທ່ຽງແລະອ່າວໄວ,ກໍຄວນເພີ່ມທະວີການຮ່ວມມືທາງດ້ານເສດຖະກິດການຄ້າໃນພາກພື້ນຕື່ມອີກ.ພວກເຮົາຄວນເຮັດວຽກສຳຄັນຫຼາຍວຽກເປັນຢ່າງດີ,ຄື:ໜຶ່ງ,ຮ່ວມກັນສ້າງສາເຂດການຄ້າເສລີໃຫ້ດີ;ສອງ,ອອກແຮງຊຸກຍູ້ການເຊື່ອມຕໍ່ກັນດ້ານພື້ນຖານໂຄງລ່າງພາຍໃນພາກພື້ນ;ສາມ,ເປີດກວ້າງການຮ່ວມມືທາງດ້ານການລົງທຶນລະຫວ່າງສອງຝ່າຍ;ສີ່,ລົງເລິກການຮ່ວມມືດ້ານເສດຖະກິດໃນພາກພື້ນ;ຫ້າ,ເປີດກວ້າງການແລກປ່ຽນໃນຂົງເຂດວັດທະນະທຳ.
ພວກເຮົາຈະປະຕິບັດຕາມທິດທາງທີ່ວ່າ "ຢູ່ຮ່ວມກັນກັບປະເທດໃກ້ຄຽງເປັນຢ່າງດີແລະຖືປະເທດໃກ້ຄຽງເປັນໝູ່ເພື່ອນທີ່ດີ"ນັ້ນເປັນເວລາຍາວນານ.ພວກຂ້າພະເຈົ້າຍິນດີຮ່ວມກັນກັບບັນດາປະເທດອາຊຽນ,ຖືການສຳເລັດການສ້າງເຂດການຄ້າເສລີຈີນອາຊຽນ ຢ່າງຮອບດ້ານເປັນຈຸດເລີ່ມອັນໃໝ່,ເປີດກວ້າງຂົງເຂດການຮ່ວມມື,ເພີ່ມເນື້ອໃນໃໝ່ຂອງ ການຮ່ວມມື,ຍົກສູງລະດັບການຮ່ວມມື,ພະຍາຍາມປະດິດສ້າງອະນາຄົດອັນດີງາມຂອງ ຈີນອາຊຽນທີ່ຮ່ວມມືກັນໂດຍຕ່າງຝ່າຍຕ່າງມີຜົນປະໂຫຍດແລະບັນລຸຄວາມຈະເລີນຮຸ່ງເຮືອງຮ່ວມກັນ."
ໃນພິທີໄຂງານ,ທ່ານນາຈິບ ອັບດູນ ຣາຊາກ,ນາຍົກລັດຖະມົນຕີມະເລເຊຍທີ່ເປັນປະເທດຫົວຂໍ້ຫຼັກຂອງງານວາງສະແດງສິນຄ້າຈີນອາຊຽນຄັ້ງທີ8ກ່າວວ່າ:"ງານວາງສະແດງສິນ ຄ້າຄັ້ງນີ້ແມ່ນສຳຄັນຍິ່ງ,ເພາະວ່າ,ປີນີ້ກົງກັບອາຊຽນກັບຈີນສ້າງການພົວພົນຄູ່ເຈລະຈາຄົບຮອບ20ປີ.ພາຍໃຕ້ການຄ້ຳຊູ້ຂອງທັດສະນະຄະຕິທີ່ພັດທະນາຮ່ວມກັນ,ການພົວພັນລະຫວ່າງສອງຝ່າຍໄດ້ພັດທະນາຢ່າງຟົດຟື້ນ,ແລະຂຶ້ນສູ່ລະດັບໃໝ່ຢ່າງບໍ່ຢຸດຢັ້ງ.ມື້ນີ້ພວກເຮົາເຕົ້າໂຮມກັນຢູ່ທີ່ນີ້,ຄວນເອົາໃຈໃສ່ສິ່ງທ້າທາຍທາງດ້ານເສດຖະກິດທີ່ເອີຣົບອາເມລິກາປະສົບໃນປະຈຸບັນນີ້,ພ້ອມດ້ວຍຜົນກະທົບທີ່ມີຕໍ່ເຂດອາຊີພວກເຮົາ.ການສົ່ງອອກສິນຄ້າຕໍ່ເຂດເອີຣົບອາເມລິກາຫຼຸດໜ້ອຍລົງ,ພວກເຮົາຈຶ່ງຕ້ອງການສະແຫວງຫາຊ່ອງທາງອື່ນ.ຂ້າພະເຈົ້າຫວັງໃຫ້ສອງຝ່າຍຮັກສາທ່ວງທ່າການພັດທະນາຄືແນວນີ້,ເພີ່ມທະວີການຮ່ວມມື,ສືບຕໍ່ຊຸກຍູ້ໃຫ້ຕ່າງຝ່າຍຕ່າງມີຜົນປະໂຫຍດແລະໃຫ້ສອງຝ່າຍໄດ້ຮັບຜົນປະ ໂຫຍດຮ່ວມ."
ຜູ່ນຳທີ່ເຂົ້າຮ່ວມພິທີໄຂງານຍັງມີທ່ານຮຸນເຊັນ,ນາຍົກລັດຖະມົນຕີກຳປູເຈຍ,ທ່ານສົມສະຫວາດ ເລັ່ງສະຫວັດ,ຮອງນາຍົກລັດຖະມົນຕີລາວ,ທ່ານຕິນອົງມິນອູ,ຮອງປະທານາທິບໍດີ ມຽນມາ,ທ່ານກິຕິຣັດ ນະລະນອງ,ຮອງນາຍົກລັດຖະມົນຕີໄທ,ທ່ານຫງວຽນຊວນຟຸກ,ຮອງນາຍົກລັດຖະມົນຕີຫວຽດນາມແລະທ່ານສຸລິນ ພິດສຸວັນ,ເລຂາທິການໃຫຍ່ອາຊຽນເປັນຕົ້ນ.
