ນາໂຕຕົກລົງໃນເບື້ອງຕົ້ນວ່າຈະສິ້ນສຸດການເຄື່ອນໄຫວທາງການທະຫານຢູ່ລີບີໃນວັນທີ31ຕຸລານີ້ ຣັດເຊຍຮຽກຮ້ອງໃຫ້ປະຊາຄົມໂລກສືບສວນການເສຍຊີວິດຂອງທ່ານກັດດາຟີ
(GMT+08:00) 2011-10-22 14:03:00 cri
ທ່ານລາສມູເຊັນ ເລຂາທິການໃຫຍ່ນາໂຕປະກາດໃນວັນທີ21ຕຸລານີ້ວ່າ,ນາໂຕຈະສິ້ນສຸດການເຄື່ອນໄຫວທາງການທະຫານຢູ່ລີບີເປັນກ້າວໆ,ຊຶ່ງຕົກລົງໃນເບື້ອງຕົ້ນວ່າ,ຈະປະກາດສິ້ນສຸດການເຄື່ອນໄຫວທາງການທະຫານໃນວັນທີ31ຕຸລານີ້.
ວັນທີ21ຕຸລານີ້,ທ່ານເຊເກ ລັຟລົຟ ລັດຖະມົນຕີວ່າການກະຊວງການຕ່າງປະເທດຣັດເຊຍກ່າວວ່າ,ການເສຍຊີວິດຂອງທ່ານກັດດາຟີ ອະດີດຜູ່ນຳລີບີອາດຈະມີບັນຫາທີ່ລະເມີດສົນທິສັນຍາເຊີແນວ,ການເຄື່ອນໄຫວຂອງກອງທະຫານນາໂຕທີ່ກ່ຽວພັນກັບການເສຍຊີວິດຂອງທ່ານກັດດາຟີຄວນເປັນເປົ້າໝາຍທີ່ຖືກສືບສວນຂອງປະຊາຄົມໂລກ.ມື້ດຽວກັນ,ພັນລະຍາໝ້າຍຂອງທ່ານກັດດາຟີທີ່ພວມຫຼົບໄພຢູ່ອານເຊຣີກໍ່ໄດ້ຜ່ານໂທລະພາບແຫ່ງໜຶ່ງຂອງຊີຣີກ່າວຄຳຮຽກຮ້ອງໃຫ້ສະຫະປະຊາຊາດສືບສວນບັນຫາທ່ານກັດດາຟີເສຍຊີວິດ.
ວັນທີ20ເດືອນນີ້,ຄະນະກຳມະການຊົ່ວຄາວແຫ່ງຊາດລີບີໄດ້ຢືນຢັນວ່າທ່ານກັດດາຟີເສຍຊີວິດຫຼັງຈາກຖືກຈັບຕົວແລະບາດເຈັບສາຫັດ.ກ່ຽວກັບວິທີແລະສະຖານທີ່ປົງສົບຂອງທ່ານກັດດາຟີ,ປະຈຸບັນຍັງພວມຫາລືກັນຢູ່.
ຣັດເຊຍເຄີຍກ່າວເປັນໃນວ່າ,ທ່ານກັດດາຟີແມ່ນຖືກຜູ່ປະກອບອາວຸດຂອງຄະນະກຳມະການຊົ່ວຄາວແຫ່ງຊາດລີບີ ຍິງສັງຫານພາຍຫຼັງຖືກຈັບ,ແຕ່ບໍ່ແມ່ນອັນທີ່ວ່າເສຍຊີວິດຍ້ອນບາດເຈັບສາຫັດປິ່ນປົວບໍ່ໄດ້.ຕາມສົນທິສັນຍາເຊີແນວກຳນົດວ່າ,ຝ່າຍຕ່າງໆທີ່ປະທະກັນດ້ວຍກຳລັງອາວຸດຄວນປະຕິບັດຕາມກົດລະບຽບມະນຸດສະທຳສາກົນທີ່ກ່ຽວຂ້ອງ,ປິ່ນປົວກອບກູ້ຊະເລີຍເສິກທີ່ຖືກບາດເຈັບ,ຫ້າມບໍ່ໃຫ້ເຂັ່ນຂ້າຢ່າງເດັດຂາດ.
