ທ່ານຫຼີເຄີ້ຊຽງເດີນທາງໄປສ.ປ.ປ.ເກົາຫຼີເພື່ອດຳເນີນການຢ້ຽມຢາມສັນທະວະໄມຕີຢ່າງເປັນທາງການ
(GMT+08:00) 2011-10-23 13:25:24 cri
ໂດຍຕອບສະໜອງຕາມຄຳເຊີນຂອງຄະນະກຳມະການສູນກາງພັກແຮງງານແລະລັດຖະບານສ.ປ.ປ.ເກົາຫຼີ, ຕອນທ່ຽງວັນທີ 23 ຕຸລານີ້, ທ່ານຫຼີເຄີ້ຊຽງ, ກຳມະການປະຈຳກົມການເມືອງສູນກາງພັກກອມມູນິດຈີນ, ຮອງນາຍົກລັດຖະມົນຕີຈີນໄດ້ເດີນທາງອອກຈາກປັກກິ່ງໄປສ.ປ.ປ.ເກົາຫຼີເພື່ອດຳເນີນການຢ້ຽມຢາມສັນທະວະໄມຕີຢ່າງເປັນທາງການ.
ໃນໄລຍະຢ້ຽມຢາມ, ທ່ານຫຼີເຄີ້ສຽງຈະພົບປະເຈລະຈາກັບຜູ້ນຳພັກແລະລັດສ.ປ.ປ.ເກົາຫຼີ, ແລກປ່ຽນຄວາມເຫັນຢ່າງເລິກເຊິ່ງກ່ຽວກັບການພົວພັນສອງປະເທດບັນຫາພາກພື້ນແລະສາກົນທີ່ສອງຝ່າຍສົນໃຈນຳ, ແລະໄປທັດສະສຶກສາໂຄງການຊີວິດການເປັນຢູ່ຂອງປະຊາຊົນແລະສັງຄົມຈຳນວນໜຶ່ງ.
ປີນີ້ແມ່ນ"ສັນຍາມິດຕະພາບແລະການຮ່ວມມືແລະຊ່ອຍເຫຼືອເຊິ່ງກັນແລະກັນລະຫວ່າງຈີນກັບສ.ປ.ປ.ເກົາຫຼີ"ລົງນາມຄົບຮອບ 50 ປີ. ກະຊວງການຕ່າງປະເທດຈີນກ່າວວ່າ, ເຊື່ອວ່າການຢ້ຽມຢາມຂອງທ່ານຫຼີເຄີ້ຊຽງເທື່ອນີ້ຈະປັບປຸງມິດຕະພາບທີ່ມີມູນເຊື້ອລະຫວ່າງປະຊາຊົນຈີນກັບສ.ປ.ປ.ເກົາຫຼີໃຫ້ໝັ້ນຄົງຕື່ມອີກ, ລົງເລິກຄວາມໄວ້ເນື້ອເຊື່ອໃຈທາງການເມືອງແລະການຮ່ວມມືຢ່າງແທ້ຈິງລະຫວ່າງສອງປະເທດ, ຊຸກຍູ້ໃຫ້ການພົວພັນຮ່ວມມືມິດຕະພາບລະຫວ່າງຈີນກັບສ.ປ.ປ.ເກົາຫຼີຂະຫຍາຍລົງສູ່ລວງເລິກ.
