ຕາມຂ່າວCRI: ວັນທີ 22 ຕຸລານີ້, "ເວທີປຶກສາຫາລືການທຸລະກິດແລະການລົງທຶນຈີນ-ລາວ"ທີ່ກະຊວງແຜນການແລະລົງທຶນລາວເປັນເຈົ້າພາບໄດ້ຈັດຂຶ້ນຢູ່ສູນວາງສະແດງສາກົນນານນິງຂອງເຂດກວາງຊີປະເທດຈີນ. ລາວຫວັງວ່າການຈັດເວທີປຶກສາຫາລືເທື່ອນີ້ໃນໄລຍະງານວາງສະແດງສິນຄ້າຈີນອາຊຽນຄັ້ງທີ 8 ຈະສາມາດເພີ່ມທະວີການໄປມາຫາສູ່ກັນທາງດ້ານເສດຖະກິດການຄ້າລະຫວ່າງລາວກັບຈີນ, ຊຸກຍູ້ການຮ່ວມມືລະຫວ່າງສອງຝ່າຍໃນການສ້າງສາເຂດການຄ້າເສລີຈີນ-ອາຊຽນ.
ທ່ານທອງມີ ພົມວິໄຊ, ລັດຖະມົນຕີຊ່ວຍວ່າການກະຊວງແຜນການແລະການລົງທຶນລາວໄດ້ແນະນຳສະພາບແວດລ້ອມການລົງທຶນ, ນະໂຍບາຍກົດໝາຍແລະໂອກາດການລົງທຶນແລະການຄ້າຢູ່ຕໍ່ຜູ້ຕາງໜ້າວິສາຫະກິດຈີນທີ່ເຂົ້າຮ່ວມກອງປະຊຸມ. ທ່ານທອງມີສະແດງຄວາມຍິນດີຕ້ອນຮັບວິສາຫະກິດຈີນຫຼາຍກວ່າເກົ່າໄປລົງທຶນຢູ່ລາວ, ໂດຍສະເພາະແມ່ນເພີ່ມທະວີການຮ່ວມມືໃນດ້ານພະລັງໄຟຟ້າແລະພື້ນຖານໂຄງລ່າງເປັນຕົ້ນ. ທ່ານກ່າວວ່າ
"ພວກຂ້າພະເຈົ້າມານີ້ເຊີນຊວນນັກທຸລະກິດຈີນໄປລົງທຶນຢູ່ປະເທດລາວ,ຕົວຢ່າງວ່າ,ໄຟຟ້າ.ຄາດຄະເນ,ພວກຂ້າພະເຈົ້າແຕ່ນີ້ຮອດປີ2020ຕ້ອງຜະລິດໄຟຟ້າ23ພັນເມກາວັດ,ໃນປະຈຸບັນນີ້,ຫາກໍ່ໄດ້2ພັນເມກາວັດ,ເຊີນຊວນນັກທຸລະກິດຈີນໄປຮ່ວມມືກັນ,ຫລາຍບໍລິສັດຮ່ວມກັນສ້າງໂຄງການແຫ່ງໜຶ່ງ. ຢູ່ເມືອງລາວ,ໄດ້ປັບປຸງລະບຽບການ,ນິຕິກໍາທາງດ້ານກົດໝາຍສ້າງຄວາມສະດວກໃຫ້ນັກທຸລະກິດໄປລົງທຶນ."
ເວທີປຶກສາຫາລືທີ່ຈັດຂຶ້ນໃນວັນທີ 22 ຕຸລານີ້ໄດ້ດຶງດູດວິສາຫະກິດຈີນຫຼາຍແຫ່ງໄປຊອກຮູ້ໂອກາດການຄ້າຢູ່ລາວ, ວິສາຫະກິດຫຼາຍແຫ່ງກ່າວວ່າມີຄວາມຫວັງຢາກໄປລົງທຶນຢູ່ລາວ, ທ່ານວາງຊົ່ງ, ຜູ້ອຳນວຍການຂອງບໍລິສັດພັດທະນາເຕັກນິກວິທະຍາສາດເລເຊີນຄຸນມິນຈຳກັດກ່າວວ່າ:
"ພວກເຮົາຕົ້ນຕໍແມ່ນເຣັດທຸລະກິດອິນເຕີເນັດ, ເຕັກນິກຂອງພວກເຮົາໄດ້ນຳໃຊ້ຫຼາຍເປັນຕົ້ນແມ່ນການກໍ່ສ້າງພື້ນຖານໂຄງລ່າງທີ່ປະເທດອາຊີອາຄະເນສົນໃຈ, ພວກເຮົາຈະຕັ້ງບໍລິສັດຢູ່ລາວ, ຫວັງຢາກຜ່ານເວທີປຶກສາຫາລືມື້ນີ້ເພື່ອຊອກຮູ້ຂ່າວໃໝ່ຍິ່ງຫຼາຍກວ່າເກົ່າ.
ເວທີປຶກສາຫາລືເທື່ອນີ້ຍັງໄດ້ຈັດເວລາໃຫ້ຜູ້ຕາງໜ້າວິສາຫະກິດຈີນທີ່ຢູ່ລາວແລກປ່ຽນບົດຮຽນ, ເຮັດໃຫ້ຜູ້ເຂົ້າຮ່ວມກອງປະຊຸມຮູ້ຕະຫຼາດລາວແລະພາບອະນາຄົດການພັດທະນາຂອງຕະຫຼາດລາວ.
