ງານມະຫະກຳພືດສວນໂລກສີ່ອ່ານ2011ປິດລົງ
(GMT+08:00) 2011-10-23 13:31:31 cri
ງານມະຫະກຳພືດສວນໂລກສີ່ອ່ານ2011ໄດ້ປິດລົງໃນຕອນຄ່ຳວັນທີ22ຕຸລານີ້.
ໃນພິທີປິດທີ່ຈັດຂຶ້ນຢູ່ນະຄອນສີ່ອ່ານຂອງຈີນໃນຕອນຄ່ຳວັນທີ22ຕຸລານີ້,ທ່ານຈ້າວເຈິ້ງໂຢງ, ເຈົ້າແຂວງແຂວງສານສີ່ຂອງຈີນກ່າວວ່າ,ໃນງານມະຫະກຳເທື່ອນີ້, 52ປະເທດແລະເຂດແຄວ້ນ,58ເມືອງແລະຫົວໜ່ວຍຕ່າງໆພາຍໃນປະເທດໄດ້ສະແດງໃຫ້ເຫັນທັດສະນະຄະຕິທີ່ວ່າ "ສີຂຽວນຳໜ້າສະໄໝນິຍົມ" ເຊິ່ງສະແດງໃຫ້ເຫັນໂດຍຜ່ານອຸດສາຫະກຳສວນແລະສິ່ງກໍ່ສ້າງທີ່ມີສີສັນພິເສດ,ວິທະຍາສາດເຕັກໂນໂລຊີແລະວັດທະນະທຳ,ເຮັດໃຫ້ພວກເຮົາຄຳນຶງເຖິງອະນາຄົດທີ່ສວຍງາມຂອງມະນຸດໃນການເດີນຕາມເສັ້ນທາງສີວິໄລດ້ານອຸດສາຫະກຳກ້າວໄປສູ່ສີວິໄລດ້ານທຳມະຊາດ.
ທ່ານເດວເກີ ຟາເບີ, ປະທານສະມາຄົມຜູ້ຜະລິດອຸດສາຫະກຳສວນໂລກຫຼືIAHPກ່າວວ່າ, ໃນ6ເດືອນຜ່ານມາ,ນັກທ່ອງທ່ຽວຫຼາຍກວ່າ 15ລ້ານຄົນທີ່ມາຈາກແຫ່ງຕ່າງໆຂອງໂລກໄດ້ເຕົ້າໂຮມຢູ່ນະຄອນສີ່ອ່ານຂອງຈີນ. ເຂົາເຈົ້າບໍ່ພຽງແຕ່ໄດ້ຊົມເບິ່ງຄວາມສວຍສົດງົດງາມຂອງດອກໄມ້ກໍ່ຄືພືດຊະນິດຕ່າງໆເທົ່ານັ້ນ,ຍິ່ງແມ່ນເພື່ອສຳຜັດກັບຜົນກະທົບທາງບວກຂອງການກະທຳສີຂຽວທີ່ມີຕໍ່ດິນຟ້າອາກາດທົ່ວໂລກ.
ງານມະຫະກຳພືດສວນໂລກສີ່ອ່ານ2011ໄດ້ໄຂຂຶ້ນໃນເດືອນເມສາຂອງປີນີ້,ແລະໄດ້ດຳເນີນງານຢ່າງມີລະບຽບຮຽບຮ້ອຍເປັນເວລາ178ວັນ,ຈຳນວນນັກທ່ອງທ່ຽວທີ່ເຂົ້າທ່ຽວສວນໄລ່ລວມແລ້ວມີເຖິງ 15ລ້ານ4ແສນ4ໝື່ນກວ່າເທື່ອຄົນ, ຫຼາຍກວ່າເປົ້າໝາຍທີ່ມີຈຳນວນນັກທ່ອງທ່ຽວເຂົ້າທ່ຽວສວນ 12ລ້ານຄົນ,ສ້າງສະຖິຕິໃໝ່ໃນປະຫວັດສາດຂອງງານມະຫະກຳພືດສວນໂລກ.
