ຈີນຈະເພີ່ມທະວີມາດຕະການຕ້ານການກໍ່ການຮ້າຍຕື່ມອີກແລະຕີຄວາມໝາຍໃຫ້ແກ່ອົງການກໍ່ການຮ້າຍ
(GMT+08:00) 2011-10-24 15:34:37 cri
ວັນທີ24ຕຸລານີ້,ຄະນະປະຈຳສະພາປະຊາຊົນແຫ່ງຊາດຈີນໄດ້ຄົ້ນຄວ້າພິຈາລະນາຮ່າງມະຕິຕົກລົງກ່ຽວກັບການເພີ່ມທະວີມາດຕະການຕ້ານການກໍ່ການຮ້າຍຕື່ມອີກ.ຮ່າງມະຕິໄດ້ຕີຄວາມໝາຍໃຫ້ແກ່ການເຄື່ອນໄຫວກໍ່ການຮ້າຍ,ອົງການກໍ່ການຮ້າຍແລະຜູ່ກໍ່ການຮ້າຍ,ແລະມີແຜນຈະເພີ່ມທະວີມາດຕະການຕ້ານການກໍ່ການຮ້າຍຂຶ້ນຕື່ມອີກ.
ຕາມຮ່າງມະຕິກຳນົດວ່າ,ການເຄື່ອນໄຫວກໍ່ການຮ້າຍແມ່ນໝາຍເຖິງການກະທຳທີ່ສ້າງຜົນຮ້າຍອັນໜັກໜ່ວງຕໍ່ສັງຄົມເຊັ່ນກໍ່ເຫດການທີ່ເຮັດໃຫ້ຫຼືເຈດຕະນາຢາກເຮັດໃຫ້ມີຜູ່ເສຍຊີວິດແລະບາດເຈັບ,ສ້າງຄວາມເສຍຫາຍທາງຊັບສິນຢ່າງໃຫຍ່ຫຼວງ,ທຳລາຍພື້ນຖານໂຄງລ່າງສາທາລະນະ,ສ້າງຄວາມບໍ່ສະຫງົບທາງສັງຄົມແລະອື່ນໆໂດຍໃຊ້ການກະທຳໃນຮູບແບບຕ່າງໆເຊັ່ນຄວາມຮຸນແຮງ,ທຳລາຍ,ນາບຂູ່ຫຼືວິທີອື່ນໆເພື່ອສ້າງຄວາມຢ້ານກົວໃນສັງຄົມ,ນາບຂູ່ກົງຈັກແຫ່ງລັດຫຼືອົງການຈັດຕັ້ງສາກົນ.ການຍຸຍົງ,ໃຫ້ທຶນຊ່ວຍເຫຼືອຫຼືໃຊ້ວິທີອື່ນໆຊ່ວຍເຫຼືອການກະທຳດັ່ງກ່າວກໍ່ແມ່ນການເຄື່ອນໄຫວກໍ່ການຮ້າຍເຊັ່ນກັນ.ອົງການກໍ່ການຮ້າຍໝາຍເຖິງກຸ່ມອາຊະຍາກຳທີ່ຈັດຕັ້ງຂຶ້ນເພື່ອດຳເນີນການເຄື່ອນໄຫວກໍ່ການຮ້າຍ.ຜູ່ກໍ່ການຮ້າຍໝາຍເຖິງຜູ່ຄົນທີ່ຈັດຕັ້ງ,ວາງແຜນແລະປະຕິບັດຕົວຈິງໃນການກໍ່ການຮ້າຍແລະສະມາຊິກຂອງອົງການກໍ່ການຮ້າຍ.
ນອກນີ້,ເພື່ອເພີ່ມທະວີວຽກງານຕິດຕາມຄວບຄຸມຊັບສິນທີ່ກ່ຽວພັນກັບລັດທິກໍ່ການຮ້າຍ,ຊຸກຍູ້ການຮ່ວມມືລະຫວ່າງຊາດໃນການຕ້ານການກໍ່ການຮ້າຍ,ຮ່າງມະຕິຍັງກຳນົດວ່າໃນເວລາພາກສ່ວນປ້ອງກັນຄວາມສະຫງົບຂອງລັດຖະບານເປີດເຜີຍບັນຊີລາຍຊື່ຂອງອົງການກໍ່ການຮ້າຍແລະຜູ່ກໍ່ການຮ້າຍນັ້ນ,ຄວນຕົກລົງອາຍັດເງິນທຶນຫຼືຊັບສິນອື່ນໆຂອງອົງການກໍ່ການຮ້າຍແລະຜູ່ກໍ່ການຮ້າຍທີ່ກ່ຽວຂ້ອງ.
