ສູນຈີນອາຊຽນຈະສ້າງຕັ້ງຂຶ້ນຢ່າງເປັນທາງການໃນເດືອນພະຈິກປີນີ້
(GMT+08:00) 2011-10-24 15:30:37 cri
ໃນງານວາງສະແດງສິນຄ້າຈີນອາຊຽນຄັ້ງທີ 8 ທີ່ພວມດຳເນີຢູ່ນະຄອນນານນິງເຂດກວາງຊີຂອງຈີນ, ທ່ານມາມິງສຽງ, ເລຂາທິການສູນຈີນອາຊຽນເປີດເຜີຍໃຫ້ຮູ້ວ່າ,ສູນຈີນອາຊຽນທີ່ມີຈີນກັບອາຊຽນຮ່ວມກັນລິເລີ່ມນັ້ນຈະສ້າງຕັ້ງຂຶ້ນຢ່າງເປັນທາງການໃນກອງປະຊຸມສຸດຍອດຈີນອາຊຽນທີ່ຈະໄຂຂຶ້ນໃນເດືອນພະຈິກປີນີ້.
ສູນຈີນອາຊຽນແມ່ນອົງການຈັດຕັ້ງສາກົນລະຫວ່າງລັດຖະບານ, ແມ່ນເພື່ອຊຸກຍູ້ການຮ່ວມມືລະຫວ່າງຈີນກັບອາຊຽນໃນດ້ານການຄ້າ,ການລົງທຶນ, ການ ທ່ອງທ່ຽວ, ການສຶກສາແລະວັດທະນະທຳ.ສູນນີ້ມີສຳນັກງານໃຫຍ່ຢູ່ນະ ຄອນຫລວງປັກກິ່ງ, ໃນຕໍ່ຫນ້າຈະຂະຫຍາຍຕື່ມອີກ,ແລະຈະຕັ້ງສຳນັກ ງານສາຂາຢູ່ປະເທດຕ່າງໆຂອງອາຊຽນແລະແຫ່ງຕ່າງໆທົ່ວປະເທດຈີນ.
ທ່ານມາມິງສຽງກ່າວວ່າ, ສູນນີ້ຈະກາຍເປັນອົງການປະສານໃຈກາງໃນການປະສານສົມທົບແລກປ່ຽນຂໍ້ມູນຂ່າວສານ, ໃຫ້ຄຳປຶກສາແລະຈັດກິດຈະກຳຕ່າງໆ, ເພື່ອແນະນຳແລະໂຄສະນາສິນຄ້າ,ໂອກາດລົງທຶນ, ຊັບພະຍາກອນການທ່ອງທ່ຽງ, ວັດທະນະທຳແລະການສຶກສາຂອງຈີນແລະອາຊຽນໃຫ້ແກ່ຝ່າຍຕ່າງໆ. ສ້າງສາງຂໍ້ມູນຂ່າວສານລວມກ່ຽວກັບການຄ້າ,ການລົງທຶນ, ການທ່ອງທ່ຽວ, ວັດທະນະທຳແລະການສຶກສາໃຫ້ແກ່ນັກທຸລະກິດແລະປະຊາຊົນຈີນກັບອາຊຽນ,ແລະດຳເນີນການຄົ້ນຄວ້າໃນຂົງເຂດການຄ້າກັບການລົງທຶນ.
ຂ່າວແຈ້ງວ່າ:ຈີນກັບ 10 ປະເທດອາຊຽນແມ່ນສະມາຊິກຂອງສູນຈີນອາຊຽນ,ວິສາຫະກິດແລະອົງການຈັດຕັ້ງທາງສັງຄົມຕ່າງໆຂອງຈີນແລະອາຊຽນສາມາດຜ່ານການຮ້ອງຂໍນຳກອງເລຂາຂອງສູນນີ້ເພື່ອກາຍເປັນສະມາຊິກ.
ທ່ານມາມິງສຽງກ່າວວ່າ, ສູນນີ້ຈະເສີມຂະຫຍາຍທ່າແຮງທີ່ມີພະນັກງານຈີນແລະອາຊຽນເຮັດວຽກຮ່ວມກັນ, ເພື່ອໃຫ້ການບໍລິການແບບປະຕູດຽວໃຫ້ແກ່ການຮ່ວມມືລະຫວ່າງສອງຝ່າຍໃນທຸກຂົງເຂດ.ສູນຈີນອາຊຽນຈະພະຍາຍາມຊຸກຍູ້ການຮ່ວມມືດ້ວຍການປະຕິບັດຕົວຈິງລະຫວ່າງຈີນກັບອາຊຽນໃນຂົງເຂດຕ່າງໆ.
