ທ່ານຫຼີເຄີ້ຊຽງພົບປະເຈລະຈາກັບທ່ານໂຊຢົງຣິມ
(GMT+08:00) 2011-10-24 17:16:18 cri
ວັນທີ23ຕຸລານີ້,ຢູ່ຫໍມັນຊູໄດທີ່ພຽງຢາງ,ທ່ານຫຼີເຄີ້ຊຽງ,ກຳມະການປະຈຳກົ ມການເມືອງ ສູນກາງພັກຄອມມູນິດຈີນ,ຮອງນາຍົກລັດຖະມົນຕີຈີນໄດ້ພົບປະເຈລະຈາກັບທ່ານໂຊຢົງຣິມ,ກຳມະການປະຈຳກົມການເມືອງສູນກາງພັກແຮງງານເກົາຫຼີ,ນາຍົກລັດຖະມົນຕີສປປເກົາຫຼີ.ທ່ານຫຼີເຄີ້ຊຽງກ່າວວ່າ,ພາຍໃຕ້ສະຖານະການໃໝ່,ຈີນຍິນດີຮ່ວມກັບສປປເກົາຫຼີ,ຕັ້ງໜ້າປະຕິບັດຕາມຄວາມເຫັນທີ່ເປັນເອກະສັນກັນຂອງຜູ່ນຳສູງສຸດສອງປະເທດ,ເພີ່ມທະວີການແລກປ່ຽນຢ່າງມີໄມຕີຈິດມິດຕະພາບແລະການຮ່ວມມືປະຕິບັດຕົວຈິງໃນທຸກຂົງເຂດລະຫວ່າງສອງປະເທດຕື່ມອີກ,ຊຸກຍູ້ໃຫ້ການພົວພັນຈີນສປປເກົາຫຼີສືບຕໍ່ກ້າວໄປໜ້າຢ່າງປອດໄສແລະໝັ້ນທ່ຽງ.ທ່ານຫຼີເຄີ້ຊຽງຍັງກ່າວວ່າ,ຈີນສະໜັບສະໜູນສປປເກົາຫຼີທີ່ຍຶດໝັ້ນການຕິດຕໍ່ພົວພັນແລະເຈລະຈາກັນ ເຊິ່ງເປັນທິດທີ່ຖືກຕ້ອງ,ຈັດການເຈລະຈາ6ຝ່າຍຄືນໃໝ່ໂດຍໄວເທົ່າທີ່ຈະໄວໄດ້.
ທ່ານໂຊຢົງຣິມກ່າວວ່າ,ການເພີ່ມທະວີມິດຕະພາບອັນເປັນມູນເຊື້ອແລະລົງເລິກການຮ່ວມມືລະຫວ່າງສປປເກົາຫຼີກັບຈີນແມ່ນທິດທາງນະໂຍບາຍທີ່ໝັ້ນໜຽວບໍ່ປ່ຽນແປງຂອງພັກແລະລັດຖະບານສປປເກົາຫຼີ,ເຊິ່ງສອດຄ່ອງກັບຜົນປະໂຫຍດທາງດ້ານຍຸດທະສາດຂອງສອງພັກແລະສອງລັດ.ທ່ານໂຊຢົງຣິມກ່າວວ່າ,ສປປເກົາຫຼີມີຈຸດຢືນທີ່ຢາກໃຫ້ຈັດການເຈລະຈາ6ຝ່າຍຄືນໃໝ່ຢ່າງບໍ່ມີເງື່ອນໄຂ,ຈັດຕັ້ງປະຕິບັດຖະແຫຼງການຮ່ວມ"19ກັນຍາ" ຢ່າງຮອບດ້ານ,ເຮັດໃຫ້ແຫຼມເກົາຫຼີປອດນິວເຄຼຍ,ແລະຫຼັກໝັ້ນດັ່ງກ່າວແມ່ນສະເໝີຕົ້ນສະເໝີປາຍ.
ໃນມື້ດຽວກັນ,ຜູ່ຮັບຜິດຊອບທີ່ກ່ຽວຂ້ອງຂອງສອງປະເທດຍັງໄດ້ລົງລາຍເຊັນເອກະສານຕ່າງໆ ຄື ສັນຍາວ່າດ້ວຍການຮ່ວມມືດ້ານເສດຖະກິດເຕັກໂນໂລຊີຈີນສປປເກົາຫຼີດັ່ງນີ້ເປັນຕົ້ນ.
