ລາວສ້າງການພົວພັນຄູ່ຮ່ວມມືຍຸດທະສາດກັບຣັດເຊຍ
(GMT+08:00) 2011-10-25 16:53:44 cri
ຕາມຂ່າວຈາກໜັງສືພິມເສດຖະກິດສັງຄົມລາວວ່າ: ທ່ານຈູມມາລີ ໄຊຍະສອນ, ເລຂາທິການໃຫຍ່ພັກປະຊາຊົນປະຕິວັດລາວ ປະທານປະເທດສປປລາວໄດ້ຢ້ຽມຢາມຣັດເຊຍຢ່າງເປັນທາງການໃນກາງເດືອນຕຸລານີ້. ທ່ານຈູມມາລີ ໄຊຍະສອນໄດ້ພົບປະເຈລະຈາກັບທ່ານດີມີຕຼີ ເມັດເວເດັຟ,ປະທານາທິບໍດີຣັດເຊຍໃນວັນທີ13ຕຸລານີ້,ປະມຸກລັດສອງປະເທດລາວຣັດເຊຍໄດ້ເຫັນດີເປັນເອກະສັນກັນກ່ຽວກັບການປັບປຸງການພົວພັນລະຫວ່າງລາວ-ຣັດເຊຍໃຫ້ກ້າວຂຶ້ນເປັນການພົວພັນຄູ່ຮ່ວມມືຍຸດທະສາດ,ແລະໄດ້ກ້າວເຖິງຂັ້ນມີຄວາມເຫັນເປັນເອກະສັນກັນໃນການເພີ່ມທະວີການຮ່ວມມືສອງຝ່າຍແລະຫຼາຍຝ່າຍລະຫວ່າງສອງປະເທດໃນວຽກງານຂອງພາກພື້ນອາຊີປາຊີຟິກແລະສາກົນ.
ພາຍຫຼັງການພົບປະເຈລະຈາ,ທ່ານຈູມມາລີ ໄຊຍະສອນແລະທ່ານດີມີຕຼີເມັດເວເດັຟໄດ້ພ້ອມກັນເຂົ້າຮ່ວມພິທີລົງນາມໃນເອກະສານຮ່ວມມືລາວ-ຣັດເຊຍ3ສະບັບ,ເຊິ່ງມີເນື້ອໃນກ່ຽວພັນເຖິງການຮ່ວມມືໃນຂົງເຂດການທ່ອງທ່ຽວ,ກົດໝາຍ,ສາທາລະນະສຸກ. ໃນໄລຍະຢ້ຽມຢາມຣັດເຊຍ,ທ່ານຈູມມາລີ ໄຊຍະສອນຍັງໄດ້ພົບປະກັບທ່ານປູຕິນ,ນາຍົກລັດຖະມົນຕີຣັດເຊຍແລະທ່ານນາງວາເລນທີນາ ມັດວີເຢນໂກ,ປະທານສະພາສູງຂອງຣັດເຊຍ.
