ວົງການການຄ້າອາເມລິກາຂຽນຈົດໝາຍສົ່ງໄປຍັງສະພາການຄ້າສາກົນຈີນເພື່ອສະແດງຄວາມຄັດຄ້ານຕໍ່ຍັດຕິກົດໝາຍກ່ຽວກັບອັດຕາແລກປ່ຽນເງິນຕາຂອງວຸດທິສະພາອາເມລິກາ
(GMT+08:00) 2011-10-25 18:26:16 cri
ວັນທີ24ຕຸລານີ້,ສະພາການຄ້າສາກົນຈີນເປີດເຜີຍວ່າ,ເມື່ອບໍ່ດົນມານີ້,ສະພາການຄ້າແຫ່ງຊາດອາເມລິກາແລະຄະນະກຳມະການການຄ້າແຫ່ງຊາດອາເມລິກາ-ຈີນໄດ້ຂຽນຈົດໝາຍສົ່ງໄປຍັງສະພາການຄ້າສາກົນຈີນ,ສະແດງຢ່າງຈະແຈ້ງວ່າ ຄັດຄ້ານວຸດທິສະພາອາເມລິກາຮັບຮອງ"ຍັດຕິກົດໝາຍວ່າດ້ວຍການຕິດຕາມກວດກາການປະຕິຮູບອັດຕາແລກປ່ຽນເງິນຕາປີ2011".
ໃນຈົດໝາຍທີ່ສົ່ງໄປຍັງສະພາການຄ້າສາກົນຈີນນັ້ນ,ສະພາການຄ້າອາເມລິກາໄດ້ ກ່າວວ່າ,ສະພາການຄ້າອາເມລິກາໄດ້ຂຽນຈົດໝາຍສົ່ງໄປຍັງສະມາຊິກຂອງວຸດທິສະພາອາເມລິກາແລ້ວ,ຄັດຄ້ານການຮັບຮອງຍັດຕິກົດໝາຍສະບັບນີ້,ເຫັນວ່າ,ບໍ່ຄວນກະທຳແຕ່ ຝ່າຍດຽວຄືແນວນີ້ມາບັງຄັບໃຫ້ຈີນດຳເນີນການປະຕິຮູບອັດຕາແລກປ່ຽນ,ເພາະວ່າອາດຈະມີຜົນສະທ້ອນຕໍ່ການພົວພັນຈີນອາເມລິກາແລະການຟື້ນຕົວຂອງເສດຖະກິດອາເມລິກາ.
ໃນຈົດໝາຍຈາກຄະນະກຳມະການການຄ້າແຫ່ງຊາດອາເມລິກາ-ຈີນຂຽນວ່າ,ຄະນະກຳມະການນີ້ໄດ້ອອກຖະແຫຼງການ,ຄັດຄ້ານຢ່າງຮຸນແຮງຕໍ່ວຸດທິສະພາອາເມລິກາທີ່ຮັບຮອງຍັດຕິກົດໝາຍດັ່ງກ່າວ.ຄະນະກຳມະການດັ່ງກ່າວເຫັນວ່າ,ການຈຳກັດການສົ່ງອອກຜະລິດຕະພັນຈີນໃຫ້ອາເມລິກາບໍ່ສາມາດແກ້ໄຂບັນຫາວຽກເຮັດງານທຳແລະບັນຫາຂຸມການຄ້າທີ່ອາເມລິກາປະສົບໃນປະຈຸບັນນີ້ໄດ້,ມີແຕ່ຈະເຮັດໃຫ້ອາເມລິກາຄັດເລືອກພໍ່ຄ້າສະໜອງສິນຄ້າຂອງປະເທດອື່ນໆທໍ່ນັ້ນ.
ສະພາການຄ້າອາເມລິກາແມ່ນສະຫະພັນການຄ້າທີ່ໃຫຍ່ທີ່ສຸດໃນໂລກ,ຕາງໜ້າບໍລິສັດຫຼາຍກວ່າ3ລ້ານແຫ່ງທີ່ມາຈາກຂະແໜງການຕ່າງໆແລະທ້ອງຖິ່ນຕ່າງໆ,ແມ່ນຜູ່ໂຮມສູນຕາງໜ້າຜົນປະໂຫຍດຂອງວົງການການຄ້າອາເມລິກາ.ສ່ວນຄະນະກຳມະການການຄ້າແຫ່ງຊາດອາເມລິກາ-ຈີນແມ່ນອົງການຕົ້ນຕໍທີ່ວົງການວິສາຫະກິດອາເມລິກາຕິດຕໍ່ພົວພັນທາງການຄ້າກັບຈີນ.
