ຕາມຂ່າວສານຊີນຮວາ: ເອກະສານ"ວິທີຊົ່ວຄາວກ່ຽວກັບຄົນຕ່າງປະເທດທີ່ເຮັດວຽກຢູ່ຈີນເຂົ້າຮ່ວມການປະກັນໄພສັງຄົມ"ໄດ້ເລິ່ມປະຕິບັດຢ່າງເປັນທາງການມາແຕ່ວັນທີ 15 ຕຸລານີ້. ອີງຕາມເອກະສານວິທີຊົ່ວຄາວສະບັບນີ້, ຄົນຕ່າງປະເທດທີ່ໄດ້ຂຶ້ນທະບຽນເຮັດວຽກຢູ່ຈີນຕາມກົດໝາຍແລ້ວຄວນເຂົ້າຮ່ວມການປະກັນລ້ຽງຜູ່ສູງອາຍຸສຳລັບພະນັກງານ, ການປະກັນປິ່ນປົວພະຍາດພື້ນຖານສຳລັບພະນັກງານ, ການປະກັນໄພບາດເຈັບຍ້ອນວຽກ, ການປະກັນໄພຫວ່າງງານ ແລະ ການປະກັນໄພໃນການເກີດລູກໂດຍອີງຕາມຂໍ້ກຳນົດແລ້ວແມ່ນ, ໃຫ້ໜ່ວຍງານ ແລະ ຄົນຕ່າງປະເທດເປັນຜູ່ຈ່າຍຄ່າປະກັນໄພສັງຄົມເອົາເອງ.
ກ່ຽວກັບເລື່ອງນີ້, ວັນທີ 24 ຕຸລານີ້ໃນເວລາໃຫ້ສຳພາດຕໍ່ນັກຂ່າວ, ຜູ່ຮັບຜິດຊອບທີ່ກ່ຽວຂ້ອງຂອງກະຊວງຊັບພະຍາກອນມະນຸດ ແລະ ການປະກັນສັງຄົມຈີນກ່າວວ່າ, ການປະກາດ ແລະ ປະຕິບັດເອກະສານວິທີຊົ່ວຄາວໄດ້ສະໜອງຫັຼກຖານທາງກົດໝາຍເພື່ອໃຫ້ຄົນຕ່າງປະເທດທີ່ເຮັດວຽກຢູ່ຈີນເຂົ້າຮ່ວມການປະກັນໄພສັງຄົມ, ສາມາດຮັບປະກັນ ແລະ ຮັກສາສິດ ແລະ ຜົນປະໂຫຍດໃນດ້ານການປະກັນໄພສັງຄົມຂອງພວກເຂົາເຈົ້າດີກວ່າເກົ່າ.
