ຈີນຫວັງວ່າຈະຈັດກອງປະຊຸມເຈົ້າຫນ້າທີ່ຕຳຫລວດລະດັບສູງລະຫວ່າງຈີນ,ໄທ,ມຽນມາແລະລາວຢູ່ນະຄອນຫລວງປັກກິ່ງໃນໄວໆນີ້
(GMT+08:00) 2011-10-26 14:01:25 cri
ຫວ່າງມໍ່ໆນີ້,ຢູ່ນະຄອນຫລວງບາງກອກ, ທ່ານສະເຫລີມ ຢູ່ບຳລຸງ, ຮອງນາຍົກລັດຖະມົນຕີຝ່າຍຄວາມຫມັ້ນຄົງທັງເປັນລັດຖະມົນຕີວ່າການກະຊວງຍຸດຕິທຳຂອງໄທໄດ້ພົບປະກັບທ່ານຈ່າງຊິ່ນເຟີງ, ລັດຖະມົນຕີວ່າການກະຊວງປ້ອງກັນຄວາມສະຫງົບຂອງຈີນ ທັງເປັນຫົວຫນ້າຄະນະຜູ່ແທນລະດັບສູງຂອງການປ້ອງກັນຄວາມສະຫງົບຈີນທີ່ເດີນທາງໄປໄທເປັນກໍລະນີພິເສດເພື່ອແກ້ໄຂບັນຫາເຫດການເຮືອຂົນສົ່ງສິນຄ້າຈີນຖືກຫລອນໂຈມຕີຢູ່ຕາມລຳແມ່ນ້ຳຂອງໃນວັນທີ 5 ຕຸລານີ້.
ທ່ານຈ່າງຊິ່ນເຟີງຊີ້ອອກວ່າ, ລັດຖະບານແລະຜູ່ນຳຈີນສຸດທີ່ເອົາໃຈໃສ່ນຳເຫດການດັ່ງກ່າວ, ຈະສຳຫລວດຫາຂໍ້ມູນຄວາມຈິງຢ່າງເລິກເຊິ່ງເຖິງຖອງ, ແລະລົງໂທດຜູ່ກະທຳຜິດຕາມກົດຫມາຍ. ທ່ານຈ່າງຊິ່ນເຟີງກ່າວວ່າ, ຈີນຫວັງວ່າຈະຈັດກອງປະຊຸມລະດັບສູງຂອງຕຳຫລວດຈີນ, ໄທ, ມຽນມາແລະລາວຢູ່ນະຄອນຫລວງປັກກິ່ງໃນໄວໆນີ້, ເພື່ອຊຸກຍູ້ການສ້າງກົນໄກຮ່ວມມືດ້ານຕຳຫລວດໃນການເດີນເຮືອຢູ່ຕາມແມ່ນ້ຳລ້ານຊ້າງແມ່ນ້ຳຂອງລະຫວ່າງສີ່ປະເທດໃຫ້ມີຄວາມປອດໄພກວ່າເກົ່າ.
