ພິທີຝັງສົບຂອງທ່ານກັດດາຟີ ອະດີດຜູ້ນຳລີບີ
(GMT+08:00) 2011-10-26 16:59:56 cri
ຕາມຂ່າວສານຊີນຮວາ: ວັນທີ25ຕຸລານີ້,ສະຖານີໂທລະພາບອານຈາຊີລາໄດ້ນຳເອົາຄຳເວົ້າຂອງເຈົ້າໜ້າທີ່ຄົນໜຶ່ງຂອງຄະນະກຳມະການຊົ່ວຄາວແຫ່ງຊາດລີບີມາລາຍງານວ່າ, ສົບຂອງທ່ານກັດດາຟີ,ອະດີດຜູ້ນຳລີບີແລະທ່ານມູທາຊີມ ກັດກາຟີ,ລູກຊາຍຂອງທ່ານໄດ້ຖືກນຳໄປຝັງຢູ່ສະຖານທີ່ລຶກລັບແຫ່ງໜຶ່ງຂອງທະເລຊາຍຊາຮາຣາໃນຕອນຂ້ອນແຈ້ງຂອງວັນທີ25ຕຸລານີ້.
ເຈົ້າໜ້າທີ່ຜູ້ນີ້ກ່າວວ່າ,ຫຼັງຈາກຈັດພິທີຕາມປະເພນີທາງສາດສະໜາແລ້ວ, ສົບຂອງທ່ານກັດດາຟີ,ອະດີດຜູ້ນຳລີບີແລະທ່ານມູທາຊີມ ກັດກາຟີ,ລູກຊາຍຂອງທ່ານໄດ້ຖືກນຳໄປຝັງຢູ່ສະຖານທີ່ລຶກລັບແຫ່ງໜຶ່ງຂອງທະເລຊາຍຊາຮາຣາ,ຊຶ່ງໃນນັ້ນ,ໄດ້ມີເຈົ້າໜ້າທີ່ທ້ອງຖິ່ນພ້ອມດ້ວຍນາຍທະຫານຂອງອຳນາດການປົກຄອງນະຄອນມີສຣາທາຈຳນວນໜຶ່ງໄດ້ເຂົ້າຮ່ວມການຝັງສົງຂອງທ່ານກັດດາຟີພ້ອມລູກຊາຍໃນຄັ້ງນີ້.
ກ່ອນໜ້ານີ້ຄອບຄົວແລະຍາດຕິພີ່ນ້ອງຂອງທ່ານກັດດາຟີໄດ້ຮຽກຮ້ອງໃຫ້ຄະນະກຳມະການຊົ່ວຄາວແຫ່ງຊາດລີບີສົ່ງສົບຂອງທ່ານກັດດາຟີຄືນໃຫ້ແກ່ຄອບຄົວເພື່ອຈັດພິທີສົ່ງສະການໂດຍຕາມປະເພນີທາງສາດສະໜາ,ແຕ່ຄວາມຮຽກຮ້ອງດັ່ງກ່າວໄດ້ຖືກປະຕິເສດ.
ຫວ່າງມໍ່ໆມານີ້,ຄອບຄົວຂອງທ່ານກັດດາຟີແລະປະຊາຄົມໂລກໄດ້ຮຽກຮ້ອງໃຫ້ດຳເນີນການສືບສວນຫາສາເຫດການເສຍຊີວິດຂອງທ່ານກັດດາຟີຢ່າງລະອຽດ. ວັນທີ24ຕຸລານີ້, ທ່ານມຸສຕາຟາ ອັບດູນຈາລີນ, ປະທານຄະນະກຳມະການຊົ່ວຄາວແຫ່ງຊາດລີບີກ່າວຢູ່ເບັນກາຊີ, ອຳນາດການປົກຄອງຂອງລີບີຈະແຕ່ງຕັ້ງຄະນະກຳມະການສະເພາະກິດຂຶ້ນມາ,ສືບສວນຫາສາເຫດການເສຍຊີວິດຂອງທ່ານກັດດາຟີຢ່າງລະອຽດ.
