ເຈົ້າຄອງນະຄອນຫຼວງບາງກອກຮຽກຮ້ອງໃຫ້ປະຊາຊົນຂອງສອງເຂດຍ້າຍໄປຢູ່ບ່ອນທີ່ປອດໄພໃນທັນທີຍ້ອນໄພນ້ຳຖ້ວມ
(GMT+08:00) 2011-10-27 15:35:24 cri
ຕາມຂ່າວCRI: ຕອນຄ່ຳວັນທີ 26 ຕຸລານີ້, ທ່ານສຸຂຸມພັນ ປາຣິພັດ, ເຈົ້າຄອງນະຄອນຫຼວງບາງກອກຂອງໄທໄດ້ອອກແຈ້ງການເປັນຄັ້ງທຳອິດ, ຮຽກຮ້ອງໃຫ້ປະຊາຊົນຂອງເຂດຊຸມຊົນດອນເມືອງແລະເຂດຊຸມຊົນບາງປາລາດທາງພາກເໜືອຂອງບາງກອກຍ້າຍໄປບ່ອນທີ່ປອດໄພໃນທັນທີ.
ທ່ານສຸຂຸມພັນກ່າວວ່າ, ປະຈຸບັນເຂດຊຸມຊົນດອນເມືອງຖືກນ້ຳຖ້ວມແລ້ວ 90%, ໄດ້ສົ່ງຜົນກະທົບເຖິງຊີວິດແລະຊັບສິນຂອງປະຊາຊົນໃນແຫ່ງດັ່ງກ່າວ, ໂດຍສະເພາະແມ່ນຜູ້ສູງອາວຸ, ເດັກນ້ອຍແລະຄົນພິການ, ສະນັ້ນປະຊາຊົນຢູ່ເຂດດັ່ງກ່າວຕ້ອງຍ້າຍໄປຢູ່ບ່ອນທີ່ປອດໄພໃນທັນທີ, ອຳນາດການປົກຄອງນະຄອນຫຼວງບາງກອກຈະຂົນຍ້າຍປະຊາຊົນຢູ່ເຂດດັ່ງກ່າວຍ້າຍໄປຢູ່ຕາມສະຖານທີ່ຕ່າງໆທີ່ໄດ້ກະກຽມໄວ້ແລ້ວ
ທ່ານສຸຂຸມພັນກ່າວວ່າ, ປະຈຸບັນອຳນາດການປົກຄອງນະຄອນຫຼວງບາງກອກຍັງບໍ່ສາມາດຄາດຄະເນບໍລິມາດນ້ຳທີ່ໄຫຼມາຈາກພາກເໜືອຜ່ານນະຄອນຫຼວງບາງກອກນັ້ນຈະມີຜົນສະທ້ອນຫຼາຍປານໃດຕໍ່ເຂດອື່ນໆ, ແຕ່ວ່ານ້ຳຈຳນວນຢ່າງຫຼວງຫຼາຍນັ້ນຈະໄຫຼເຂົ້ານະຄອນຫຼວງບາງກອກຈາກທຸກທິດທາງ
