ຄະນະຜູ້ແທນຕຳຫຼວດຈີນສຳຫຼວດສະຖານທີ່ເກີດເຫດການຫຼອນໂຈມຕີຕາມແມ່ນ້ຳຂອງ
(GMT+08:00) 2011-10-27 12:15:09 cri
ຕອນເຊົ້າວັນທີ26ຕຸລານີ້, ຄະນະຜູ້ແທນຕຳຫຼວດຈີນໄດ້ເດີນທາງໄປຈັງຫວັດຊຽງລາຍທາງພາກເໜືອຂອງໄທ, ແລະສຳຫຼວດສະຖານທີ່ເກີດເຫດການເຮືອຂົນສົ່ງສິນຄ້າຈີນຖືກຫຼອນໂຈມຕີຈົນເຮັດໃຫ້ມີຜູ້ເສຍຊີວິດຢູ່ຕາມລຳແມ່ນ້ຳຂອງໃນວັນທີ5ຕຸລານີ້.
ຄະນະຜູ້ແທນຕຳຫຼວດຈີນໄດ້ຮັບຟັງການລາຍງານສະພາບການສືບສວນຄະດີຂອງຕຳຫຼວດໄທ, ແລະສຳຫຼວດສະຖານທີ່ເກີດເຫດແລະເກັບກຳຫຼັກຖານທີ່ກ່ຽວຂ້ອງໂດຍມີເຈົ້າໜ້າທີ່ຝ່າຍໄທເຂົ້າຮ່ວມນຳ.
ທ່ານຈ່າງຊີ່ນເຟີ່ງ, ລັດຖະມົນຕີຊ່ວຍວ່າການກະຊວງສັນຕີບານໄດ້ຢັ້ງຢືນວຽກງານສືບສວນຄະດີທີ່ເອົາຈິງເອົາຈັງແລະຮອບຄອບຂອງຕຳຫຼວດໄທ, ແລະກ່າວວ່ານັກວິຊາການສືບສວນຄະດີອາດຍາແລະພິສູດຫຼັກຖານໃນຄະນະຜູ້ແທນຈີນຈະສືບຕໍ່ປະສານງານກັບໜ່ວຍສືບສວນຄະດີຂອງຕຳຫຼວດໄທ.
ວັນທີ5ຕຸລານີ້, ເຮືອບັນທຸກສິນຄ້າສອງລຳຂອງຈີນຖືກຄົນຮ້າຍກຸ່ມໜຶ່ງຫຼອນໂຈມຕີຢູ່ເຂດນ້ຳສາມຫຼ່ຽມຄຳຕາມລຳແມ່ນ້ຳຂອງ, ເຮັດໃຫ້ລູກເຮືອຈີນ13ຄົນເສຍຊີວິດ. ຄະນະຜູ້ແທນຕຳຫຼວດຈີນທີ່ນຳໂດຍທ່ານຈ່າງຊີ່ນເຟີ່ງ, ລັດຖະມົນຕີຊ່ວຍວ່າການກະຊວງສັນຕິບານຈີນໄດ້ເດີນທາງໄປຮອດໄທໃນວັນທີ23ຕຸລານີ້, ແລະເລີ່ມຮ່ວມມືກັບຕຳຫຼວດໄທໃນການສືບສວນຄະດີ.
