ປະທານາທິບໍດີສ.ເກົາຫຼີຕ້ອນຮັບທ່ານລີເຄີ້ສຽງ ຮອງນາຍົກລັດຖະມົນຕີຈີນ
(GMT+08:00) 2011-10-27 15:55:44 cri
ວັນທີ26ຕຸລານີ້,ຢູ່ຊົນວາເຕນະຄອນ ຫຼວງເຊອຸ່ນຂອງສ.ເກົາຫຼີ,ທ່ານລີມຽງບັກ ປະທານາທິບໍດີສ.ເກົາຫຼີໄດ້ຕ້ອນຮັບການເຂົ້າຢ້ຽມຂ່ຳນັບຂອງທ່ານລີເຄີ້ສຽງ ຮອງນາຍົກລັດຖະມົນຕີຈີນທີ່ພວມຢ້ຽມຢາມສ.ເກົາຫຼີ.
ທ່ານລີເຄີ້ສຽງກ່າວວ່າ,ຈີນຈະສືບຕໍ່ໃຫ້ຄວາມສຳຄັນສູງຕໍ່ການພົວພັນລະຫວ່າງຈີນສ.ເກົາຫຼີຈາກດ້ານຍຸດທະສາດແລະສາຍຕາທີ່ເບິ່ງກວ້າງມອງໄກ,ຍິນດີພ້ອມກັບສ.ເກົາຫຼີທຳຄວາມພະຍາຍາມຮ່ວມກັນເພື່ອລົງເລິກການແລກປ່ຽນແລະການຮ່ວມມືກັນຕື່ມອີກໃນຂົງເຂດຕ່າງໆ,ຊຸກຍູ້ການພົວພັນລະຫວ່າງສອງປະເທດສືບຕໍ່ໃຫ້ເຕີບໃຫຍ່ຂະຫຍາຍຕົວກ້າວໄປຂ້າງໜ້າພາຍໃຕ້ສະຖານະການໃໝ່,ປະກອບສ່ວນອັນຕັ້ງໜ້າເພື່ອຊຸກຍູ້ສັນຕິພາບແລະສະຖຽນລະພາບຂອງພາກພື້ນແລະຮ່ວມກັນພັດທະນາແລະສ້າງຄວາມຈະເລີນຮຸ່ງເຮືອງ.
ເມື່ອເວົ້າເຖິງສະຖານະການຢູ່ແຫຼມເກົາຫຼີ,ທ່ານລີມຽງບັກກ່າວວ່າ,ສ.ເກົາຫຼີຍິນດີທຳຄວາມພະຍາຍາມຮ່ວມກັບຝ່າຍຕ່າງໆເພື່ອປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີ,ຊຸກຍູ້ຂະບວນການເຮັດໃຫ້ແຫຼມເກົາຫຼີປອດນີວເຄຼຍ.ສ.ເກົາຫຼີຫວັງຢາກເຈລະຈາກັບສປປເກົາຫຼີດ້ວຍທ່າທີທີ່ຄຳນຶງເຖິງຜົນປະໂຫຍດຕົວຈິງ,ປັບປຸງການພົວພັນລະຫວ່າງສອງເກົາຫຼີໃຫ້ດີຂຶ້ນ.
ທ່ານລີເຄີ້ສຽງກ່າວວ່າ,ຈີນຫວັງໃຫ້ຝ່າຍຕ່າງໆທຳຄວາມພະຍາຍາມຕື່ມອີກ,ສືບຕໍ່ຮັກສາແລະປັບປຸງທ່າອ່ຽງທີ່ດີໃນການເຈລະຈາຕະຫຼອດໄປ,ພະຍາຍາມໃຫ້ຈັດການເຈລະຈາ6ຝ່າຍຄືນໃໝ່,ເພື່ອປົກປັກຮັກສາສັນຕິພາບແລະສະຖຽນລະພາບຂອງແຫຼມເກົາຫຼີຢ່າງແທ້ຈິງ,ບັນລຸເປົ້າໝາຍທີ່ແຫຼມເກົາຫຼີປອດນີວເຄຼຍ.
