ທ່ານລີເຄີ້ສຽງ ຮອງນາຍົກລັດຖະມົນຕີຈີນວາງສະເໜີ4ຂໍ້ກ່ຽວກັບການເສີມຂະຫຍາຍການພົວພັນຈີນ-ສ.ເກົາຫຼີ
(GMT+08:00) 2011-10-27 17:05:34 cri
ໃນເວລາພົບປະເຈລະຈາກັບທ່ານກິ່ມຮວາງຊິກ ນາຍົກລັດຖະມົນຕີສ.ເກົາຫຼີໃນວັນທີ26ຕຸລານີ້ຢູ່ນະຄອນຫຼວງເຊອຸ່ນ,ທ່ານລີເຄີ້ສຽງ ຮອງນາຍົກລັດຖະມົນຕີຈີນກ່າວວ່າ,ຈີນເອົາໃຈໃສ່ໃນລະດັບສູງຕໍ່ການພົວພັນລະຫວ່າງຈີນກັບສ.ເກົາຫຼີ,ແລະຖືການພັດທະນາການພົວພັນລະຫວ່າງສອງປະເທດທີ່ໝັ້ນທ່ຽງຍາວນານແລະຕ່າງຝ່າຍຕ່າງມີຜົນປະໂຫຍດເປັນສິ່ງທີ່ສຳຄັນໃນການພົວພັນກັບຕ່າງປະເທດຂອງຈີນ.ຈີນຍິນດີທຳຄວາມພະຍາຍາມຮ່ວມກັບສ.ເກົາຫຼີ,ເພີ່ມທະວີການແລກປ່ຽນແລະຮ່ວມມືກັນໃນຂົງເຂດຕ່າງໆ,ຊຸກຍູ້ການພົວພັນລະຫວ່າງສອງປະເທດໃນໄລຍະໃໝ່ໃຫ້ຂະຫຍາຍຕົວກ້າວສູ່ລະດັບສູງ.
ກ່ຽວກັບການເສີມຂະຫຍາຍການພົວພັນລະຫວ່າງຈີນກັບສ.ເກົາຫຼີ,ທ່ານລີເຄີ້ສຽງມີຂໍ້ສະເໜີ4ຂໍ້ຄື,ອັນທີໜຶ່ງ,ຮັກສາການແລກປ່ຽນຢ້ຽມຢາມຊຶ່ງກັນແລະກັນລະຫວ່າງເຈົ້າໜ້າທີ່ລະດັບສູງ,ເພີ່ມຄວາມໄວ້ເນື້ອເຊື່ອໃຈກັນທາງການເມືອງ.ເພີ່ມທະວີການແລກປ່ຽນແລະຮ່ວມມືກັນລະຫວ່າງ ລັດຖະບານ,ສະພາແລະພັກການເມືອງຂອງສອງປະເທດ,ກຳແໜ້ນທ່າອ່ຽງລວມແຫ່ງມິດຕະພາບແລະການຮ່ວມມືໃນການພົວພັນລະຫວ່າງສອງຝ່າຍ.ອັນທີສອງແມ່ນລົງເລິກການຮ່ວມມືດ້ານເສດຖະກິດການຄ້າ,ເພີ່ມທະວີການປະສານງານທາງດ້ານນະໂຍບາຍເສດຖະກິດມະຫາພາກ,ເພີ່ມທະວີການຮ່ວມມືໃນຂົງເຂດຈຸດສຸມເຊັ່ນການທະນາຄານ,ການຈໍລະຈອນສິນຄ້າ,ເຕັກໂນໂລຊີສູງ,ການປະຢັດພະລັງງານແລະອະນຸລັກສິ່ງແວດລ້ອມແລະອື່ນໆ,ເພີ່ມປະລິມານການແລກປ່ຽນເງິນຕາລະຫວ່າງສອງປະເທດຈາກ180ຕື້ຢວນເພີ່ມຂຶ້ນເປັນ360ຕື້ຢວນ.ຊຸກຍູ້ໃຫ້ເລີ່ມຕົ້ນການເຈລະຈາລະຫວ່າງລັດຖະບານກ່ຽວກັບເຂດການຄ້າເສລີໂດຍໄວ.ອັນທີສາມ,ເປີດກວ້າງການແລກປ່ຽນທາງດ້ານວັດທະນະທຳສັງຄົມ,ຮັດແໜ້ນພື້ນຖານມິດຕະພາບລະຫວ່າງປະຊາຊົນສອງຊາດຂຶ້ນຕື່ມ.ຖືໂອກາດທີ່ຈີນແລະສ.ເກົາຫຼີສ້າງຕັ້ງສາຍພົວພັນທາງການທູດຄົບຮອບ20ປີໃນປີໜ້າ,ເພີ່ມຄວາມເຂົ້າໃຈກັນແລະມິດຕະພາບລະຫວ່າງປະຊາຊົນສອງຊາດ.ເລີ່ມແຕ່ປີ2012ເປັນຕົ້ນໄປ,ຈີນຈະເຊີນຊາວໜຸ່ມສ.ເກົາຫຼີໄປຢ້ຽມຢາມຈີນໃຫ້ເພີ່ມຂຶ້ນປີລະ300ຄົນແລະຈະສົ່ງຄູສອນພາສາຈີນ1400ຄົນໄປສ.ເກົາຫຼີກ່ອນປີ2015.ອັນສຸດທ້າຍແມ່ນເພີ່ມທະວີການປະສານງານລະຫວ່າງຫຼາຍຝ່າຍ,ເພີ່ມທະວີການປະສານສົມທົບກັນລະຫວ່າງຈີນ.ຍີ່ປຸ່ນແລະສ.ເກົາຫຼີ,ລະຫວ່າງອາຊຽນບວກ3ແລະປະສານສົມທົບກັນໃນການກໍ່ສ້າງອາຊີຕາເວັນອອກເຊື່ອມໂຍງເຂົ້າເປັນອັນໜຶ່ງອັນດຽວກັນ.
