ຕາມຂ່າວສານຊິນຮວາ: ໃນກອງປະຊຸມຂ່າວທີ່ຈັດຂຶ້ນໃນວັນທີ 26 ຕຸລານີ້, ທ່ານຢາງອີຈຸ່ນ ໂຄສົກກະຊວງປ້ອງກັນປະເທດຈີນກ່າວວ່າ, ການທີ່ເຮືອບິນສູ້ຮົບຂອງຍີ່ປຸ່ນໄດ້ບິນສອດແນມຈີນເລື້ອຍໆໄດ້ທຳລາຍຜົນປະໂຫຍດທາງດ້ານຄວາມປອດໄພຂອງຈີນ, ລົບກວນການເຝິກຊ້ອມທີ່ກ່ຽວຂ້ອງຂອງຝ່າຍຈີນຢ່າງໜັກໜ່ວງ, ແລະສ້າງຜົນກະທົບຕໍ່ຄວາມປອດໄພຂອງເຮືອບິນຂອງຈີນ, ນັ້ນແມ່ນກົກເຄົ້າທີ່ສ້າງບັນຫາທາງດ້ານຄວາມປອດໄພທາງທະເລແລະທາງອາກາດລະຫວ່າງຈີນ-ຍີ່ປຸ່ນ.
ທ່ານຢາງອີຈຸ່ນກ່າວວ່າ, ໃນຫຼາຍປີມານີ້, ການສອດແນມຈີນຢູ່ທະເລຈີນຕາເວັນອອກຂອງເຮືອບິນກອງປ້ອງກັນຕົວຍີ່ປຸ່ນໄດ້ເພິ່ມຂຶ້ນຢ່າງບໍ່ຢຸດຢັ້ງ. ຕາມສະຖິຕິ, ແຕ່ເດືອນມັງກອນຫາເດືອນກັນຍາປີນີ້, ເຮືອບິນຂອງກອງປ້ອງກັນຕົວຍີ່ປຸ່ນໄດ້ບິນສອດແນມເຂດທະເລໃກ້ຈີນໄດ້ເພິ່ມຂຶ້ນ 44% ເມື່ອທຽບກັບໄລຍະດຽວກັນຂອງປີຜ່ານມາ.
ທ່ານຢາງອີຈຸ່ນກ່າວວ່າ, ຝ່າຍຈີນຫວັງໃຫ້ຍີ່ປຸ່ນສະແດງຄວາມຮັບຜິດຊອບ, ປະຕິບັດມາດຕະການທີ່ມີຜົນ, ຫຼີກເວັ້ນ ແລະ ປ້ອງກັນບໍ່ໃຫ້ເກີດອຸປະຕິເຫດເທິງທະເລແລະອາກາດ ແລະ ເກີດມີເຫດການທີ່ຄາດບໍ່ເຖິງ .
