ທູດພິເສດຈີນກ່ຽວກັບບັນຫາຕາເວັນອອກກາງຮຽກຮ້ອງໃຫ້ຝ່າຍຕ່າງໆທີ່ກ່ຽວຂ້ອງຢູ່ຊີຣີຈົ່ງຢຸດຕິການປະທະກັນແບບນອງເລືອດໂດຍໄວ
(GMT+08:00) 2011-10-28 14:38:52 cri
ວັນທີ27ຕຸລານີ້, ທ່ານອູຊື່ເຄີ່, ທູດພິເສດຈີນກ່ຽວກັບບັນຫາຕາເວັນອອກກາງທີ່ພວມຢ້ຽມຢາມຊີຣີກ່າວວ່າ, ຝ່າຍຕ່າງໆທີ່ກ່ຽວຂ້ອງຢູ່ຊີຣີຄວນຍຶດຖືຜົນປະໂຫຍດລວມຂອງຊາດແລະປະຊາຊົນເປັນສິ່ງສຳຄັນ, ຈົ່ງຢຸດຕິການກະທຳດ້ວຍຄວາມຮຸນແຮງແລະການປະທະກັນແບບນອງເລືອດໃນທັນທີ, ຜ່ອນຄາຍສະຖານະການຄວາມເຄັ່ງຕຶງໂດຍໄວ.
ມື້ດຽວກັນ, ທ່ານອູຊື່ເຄີ່ໄດ້ເຂົ້າຢ້ຽມຂ່ຳນັບທ່ານຟາຣຸກ ອັນ ຊາຣາ, ຮອງປະທານາທິບໍດີຊີຣີແລະທ່ານວາລິດ ອັນ ມູອາເລັມ, ລັດຖະມົນຕີວ່າການກະຊວງການຕ່າງປະເທດຊີຣີ, ໄດ້ແລກປ່ຽນຄຳຄິດຄຳເຫັນກ່ຽວກັບສະຖານະການຢູ່ຊີຣີໃນປະຈຸບັນ, ທ່ານອູຊື່ເຄີ່ກ່າວວ່າ, ຈີນເຫັນວ່າ, ລັດຖະບານຊີຣີຄວນເລັ່ງລັດປະຕິບັດຕາມຄຳໝັ້ນສັນຍາຂອງການປະຕິຮູບ, ເລີ່ມຕົ້ນແລະຊຸກຍູ້ຂະບວນການທາງການເມືອງທີ່ມີຝ່າຍຕ່າງໆຂອງຊີຣີເຂົ້າຮ່ວມຢ່າງກວ້າງຂວາງ, ຕອບສະໜອງຕາມຄວາມມຸ່ງມາດປາຖະໜາຂອງປະຊາຊົນຊີຣີ. ຝ່າຍຕ່າງໆທີ່ກ່ຽວຂ້ອງຂອງຊີຣີຄວນເຂົ້າຮ່ວມຂະບວນການທາງການເມືອງຢ່າງຮອບດ້ານດ້ວຍທ່າທີສ້າງສັນ, ແກ້ໄຂຄວາມຂັດແຍ່ງກັນດ້ວຍການເຈລະຈາກັນ, ຊອກຫາເສັ້ນທາງປ່ຽນແປງໃໝ່ແລະພັດທະນາທີ່ສອດຄ່ອງກັບສະພາບຄວາມເປັນຈິງຂອງປະເທດຕົນ. ປະຊາຄົມໂລກຄວນເຄົາລົບອະທິປະໄຕ, ເອກະລາດແລະຜືນແຜ່ນດິນອັນຄົບຖ້ວນຂອງຊີຣີ, ແກ້ໄຂບັນຫາຊີຣີຢ່າງເໝາະສົມ, ຮ່ວມກັນຊຸກຍູ້ສະຖານນະການຊີຣີໃຫ້ຜ່ອນຄາຍລົງ, ຮັກສາສະຕິພາບແລະສະຖຽນລະພາບຂອງເຂດຕາເວັນອອກກາງ.
ຊີຣີກ່າວວ່າ, ຊີຣີຊົມເຊີຍຫຼັກໝັ້ນຂອງຈີນໃນບັນຫາຊີຣີ, ຍິນດີຕັ້ງໜ້າຊຸກຍູ້ການປະຕິຮູບແລະການເຈລະຈາ, ພະຍາຍາມຕົກລົງຄຳເຫັນທີ່ເປັນເອກະສັນກັນກັບກຸ່ມປະເທດສັນນິບາດອາຣັບໃນບັນຫາທີ່ກ່ຽວຂ້ອງ.
