ການພົບປະສັງສັນແບບສອງຕໍ່ສອງແລະການວາງສະແດງສິນຄ້າທ່ອງທ່ຽວເປັນຈຸດເດັ່ນຂອງງານຕະຫຼາດນັດທ່ອງທ່ຽວສາກົນຄຸນມິງ
(GMT+08:00) 2011-10-28 17:32:41 cri
ງານຕະຫຼາດນັດທ່ອງທ່ຽວສາກົນຈີນ2011ໄດ້ໄຂຂຶ້ນໃນວັນທີ27ຕຸລານີ້ ຢູ່ນະຄອນຄຸນມິງຂອງແຂວງຢຸນນານ.ງານຕະຫຼາດນັດທ່ອງທ່ຽວສາກົນຈີນ2011ຄັ້ງນີ້ຈະດຳເນີນໄປເປັນເວລາ4ວັນ,ນັກທຸລະກິດຈີນແລະຕ່າງປະເທດຈະຈັດການວາງສະແດງຜະລິດຕະພັນທ່ອງທ່ຽວຢ່າງຄົບຖ້ວນເຊັ່ນປະຫວັດສາດວັດທະນະທຳ,ຮີດຄອງປະເພນີຊົນເຜົ່າ,ທິວທັດທຳມະຊາດແລະອື່ນໆ.ເພື່ອສ້າງເວທີທີ່ດີກວ່າເກົ່າໃນການແລກປ່ຽນແລະຊື້ຂາຍຜະລິດຕະພັນໃຫ້ແກ່ນັກທຸລະກິດທ່ອງທ່ຽວທັງພາຍໃນແລະຕ່າງປະເທດ,ຄະນະຮັບຜິດຊອບຈັດງານຕະຫຼາດນັດປີນີ້ໄດ້ຈັດວາງເປັນພິເສດໃຫ້ນັກທຸລະກິດຝ່າຍຊື້ແລະຝ່າຍຂາຍນັດພົບປະສັງສັນກັນແບບສອງຕໍ່ສອງ,ຊຶ່ງໄດ້ຍົກປະສິດທິພາບໃນການແລກປ່ຽນຊື້ຂາຍຊຶ່ງກັນແລະກັນໃຫ້ສູງຂຶ້ນຢ່າງຫຼວງຫຼາຍ.
ທ່ານຊາວສີເວີຍ ຫົວໜ້າກົມທ່ອງທ່ຽວແຫ່ງຊາດຈີນກ່າວໃນພິທີໄຂງານວ່າ,ປະຈຸບັນ,ຍ້ອນໄດ້ຮັບຜົນກະທົບຈາກປັດໄຈຕ່າງໆຄືວິກິດການການເງິນສາກົນແລະຄວາມໝັ້ນຄົງໃນຮູບແບບເກົ່າແລະຄວາມໝັ້ນຄົງໃນຮູບແບບໃໝ່ຕ່າງໆນາໆ,ຄວາມບໍ່ແນ່ນອນໃນການພັດທະນາຂະແໜງການທ່ອງທ່ຽວທົ່ວໂລກພວມເພີ່ມຫຼາຍຂຶ້ນ.ລັດຖະບານຈີນມີທັດສະນະໃນຄວາມຮັບຜິດຊອບມາໂດຍຕະຫຼອດ,ບໍ່ໄດ້ປ່ຽນແປງນະໂຍບາຍໃນການສົ່ງເສີມໃຫ້ພົນລະເມືອງຈີນໄປທ່ຽວຢູ່ຕ່າງປະເທດ.ວົງການທ່ອງທ່ຽວຈີນຍິນດີເພີ່ມທະວີການຮ່ວມມືກັບວົງການທ່ອງທ່ຽວໃນທົ່ວໂລກ,ເພື່ອຮັບມືກັບສິ່ງທ້າທາຍ,ຮ່ວມກັນຊຸກຍູ້ຂະແໜງການທ່ອງທ່ຽວທົ່ວໂລກໃຫ້ຈະເລີນເຕີບໂຕ.
ງານຕະຫຼາດນັດທ່ອງທ່ຽວສາກົນຈີນແມ່ນໜຶ່ງໃນງານວາງສະແດງການທ່ອງທ່ຽວທີ່ມີຂະໜາດໃຫຍ່ທີ່ສຸດແລະມີຜົນສະທ້ອນກວ້າງຂວາງທີ່ສຸດໃນພາກພື້ນອາຊີປາຊີຟິກ,ໄດ້ເສີມຂະຫຍາຍບົດບາດອັນຕັ້ງໜ້າໃນການເຜີຍແຜ່ໂຄສະນາຊັບພະຍາກອນແລະຜະລິດຕະພັນທ່ອງທ່ຽວຂອງຈີນ,ຊຸກຍູ້ໃຫ້ທຸລະກິດທ່ອງທ່ຽວຈີນແລະທຸລະກິດທ່ອງທ່ຽວຂອງປະເທດຕ່າງໆລົງເລິກການແລກປ່ຽນແລະຮ່ວມມືກັນຢ່າງມີໄມຕີຈິດມິດຕະພາບ.ງານຕະຫຼາດນັດທ່ອງທ່ຽວສາກົນຈີນປີນີ້ຈັດຂຶ້ນເປັນຄັ້ງທີ13ແລ້ວ,ເນື້ອທີ່ການວາງສະແດງມີເຖິງ5ໝື່ນຕາແມັດ,ມີຮ້ານວາງສະແດງທັງໝົດ2200ຮ້ານ,ໃນນັ້ນ,ຈີນມີ1700ກວ່າຮ້ານ,ຮ້ານວາງສະແດງສາກົນແລະຮ້ານວາງສະແດງນອກແຜ່ນດິນໃຫຍ່ຈີນມີ400ກວ່າຮ້ານ.ເນື້ອໃນຂອງງານວາງສະແດງຄັ້ງນີ້ໄດ້ກວມຫຼາຍຂະແໜງການເຊັ່ນບໍລິສັດທ່ອງທ່ຽວ,ໂຮງແຮມ,ອົງການທ່ອງທ່ຽວຂອງລັດຖະບານ,ແຫຼ່ງທ່ອງທ່ຽວ,ບໍລິສັດການບິນ,ເວັບໄຊທ່ອງທ່ຽວແລະລະບົບສັ່ງຈອງຊື້ປີ້ຍົນແລະໂຮງແຮມແລະອື່ນໆ.ມີນັກທຸລະກິດຈາກ95ປະເທດແລະເຂດແຄວ້ນເຂົ້າຮ່ວມ.
ການຈຳໜ່າຍເສັ້ນທາງທ່ອງທ່ຽວແລະການຊື້ຂາຍລະຫວ່າງນັກທຸລະກິດຝາຍຊື້ແລະຝ່າຍຂາຍແມ່ນເນື້ອໃນສຳຄັນທີ່ສຸດຂອງງານຕະຫຼາດນັດທ່ອງທ່ຽວສາກົນຈີນມາໂດຍຕະຫຼອດ.ທ່ານມານຫົງເວີຍ ຫົວໜ້າພະແນກສົ່ງເສີມການທ່ອງທ່ຽວແລະການຮ່ວມມືສາກົນຂອງກົມທ່ອງທ່ຽວແຫ່ງຊາດຈີນກ່າວວ່າ,ເພື່ອສ້າງເວທີທີ່ດີກວ່າເກົ່າໃນການແລກປ່ຽນແລະຊື້ຂາຍຜະລິດຕະພັນໃຫ້ແກ່ນັກທຸລະກິດທ່ອງທ່ຽວທັງພາຍໃນແລະຕ່າງປະເທດ,ຄະນະຮັບຜິດຊອບການຈັດງານຕະຫຼາດນັດປີນີ້ໂຮມສູນຈັດໃຫ້ມີການພົບປະສັງສັນແບບສອງຕໍ່ສອງລະຫວ່າງນັກທຸລະກິດຝ່າຍຊື້ແລະຝ່າຍຂາຍ,ເພື່ອສ້າງຄວາມສະດວກໃຫ້ແກ່ສອງຝ່າຍພັດທະນາຜະລິດຕະພັນແລະເສັ້ນທາງທ່ອງທ່ຽວໃຫ້ໄດ້ດີກວ່າເກົ່າ,ຊຸກຍູ້ການພັດທະນາທຸລະກິດຕ້ອນຮັບນັກທ່ອງທ່ຽວຕ່າງປະເທດເຂົ້າມາທ່ອງທ່ຽວຢູ່ຈີນ.
