ແຜນການແກ້ໄຂວິກິດການໜີ້ສິນຂອງສະຫະພາບເອີຣົບກະຕຸ້ນໃຫ້ຕະຫຼາດຫຸ້ນນິວຢອກພຸ່ງສູງຂຶ້ນຫຼາຍ
(GMT+08:00) 2011-10-28 17:21:02 cri
ເມື່ອໄດ້ມີການຖົກຖຽງກັນມາເປັນຫຼາຍເດືອນແລະຜ່ານການເຈລະຈາກັນດ້ວຍຄວາມຫຍຸ້ງຍາກທີ່ໃຊ້ເວລາເຖິງ10ຊົ່ວໂມງ,ໃນທີ່ສຸດ,ຜູ່ນຳຂອງສະຫະພາບເອີຣົບໄດ້ເຊັນສັນຍາສະບັບໜຶ່ງທີ່ມີຈຸດປະສົງແກ້ໄຂວິກິດການໜີ້ສິນພາກລັດຂອງເອີຣົບໃນຕອນຂ້ອນແຈ້ງວັນທີ27ຕຸລານີ້. ເຖິງວ່າເນື້ອໃນລະອຽດຂອງແຜນການນີ້ຍັງບໍ່ສົມບູນປານໃດ,ແຕ່ດ້ວຍຄວາມພະຍາຍາມເພື່ອຮັບມືກັບວິກິດການທີ່ເອີຣົບກະທຳອອກມານັ້ນໄດ້ຮັບຄວາມເຫັນດີເຫັນພ້ອມຈາກຕະຫຼາດ.ເມື່ອປະກາດແຜນການດັ່ງກ່າວແລ້ວ,ຕະຫຼາດຫຸ້ນທົ່ວໂລກພຸ່ງສູງຂຶ້ນຫຼາຍ,ຕະຫຼາດຫຸ້ນນິວຢອກພໍແຕ່ເລີ່ມເປີດຕະຫຼາດກໍ່ພຸ່ງສູງຂຶ້ນໂລດ,ດັດຊະນີດາວຈອນສ໌ໄດ້ກັບຄືນສູ່ຂອດສຳຄັນ ຄື 12000ຈຸດ.
ໃນມື້ດຽວກັນ,ໃນເວລາໃຫ້ສຳພາດທາງໂທລະພາບ,ທ່ານນິໂຄຣັສ ຊາໂຄຊີ,ປະທານາທິບໍ ດີຝະຣັ່ງກ່າວວ່າ,ເຂດໃຊ້ເງິນເອີໂຣເຊັນສັນຍາສະບັບນີ້ເຮັດໃຫ້ພົ້ນຈາກໄພພິບັດອີກຄັ້ງໜຶ່ງ. ທ່ານຈອຈ໌ ປາປານໂຕຼ,ນາຍົກລັດຖະມົນຕີເກຼັກກ່າວວ່າ,ສັນຍາດັ່ງກ່າວໄດ້ເຮັດໃຫ້ເກຼັກມີເວລາເພື່ອດຳເນີນການປະຕິຮູບແລະຫຼຸດພົ້ນອອກຈາກວິກິດການໜີ້ສິນພາກລັດ.ສ່ວນທ່ານບາຣັກ ໂອບາມາ,ປະທານາທິບໍດີອາເມລິກາກໍ່ກ່າວວ່າ,ອາເມລິກາສະແດງຄວາມຊົມເຊີຍຕໍ່ການຕົກລົງອັນສຳຄັນຂອງສະຫະພາບເອີຣົບ,ການຕົກລົງນີ້ໄດ້ສ້າງພື້ນ ຖານອັນສຳຄັນໃຫ້ແກ່ການແກ້ໄຂວິກິດການໜີ້ສິນຂອງສະຫະພາບເອີຣົບຢ່າງຊິ້ນເຊີງ.
ນອກນີ້,ຕົວເລກສະຖິຕິທາງດ້ານເສດຖະກິດທີ່ອາເມລິກາເປີດເຜີຍໃນມື້ດຽວກັນກໍ່ກະຕຸ້ນໃຈທີ່ສຸດ.ກະຊວງການຄ້າອາເມລິກາເປີດເຜີຍວ່າ,ໃນໄຕມາດທີ3,ລວມຍອດມູນຄ່າຜະລິດຕະພັນພາຍໃນປະເທດ ຫຼືGDPຂອງອາເມລິກາໄດ້ເຕີບໂຕ2,5%,ແມ່ນຈັງຫວະເຕີບໂຕທີ່ໄວກວ່າໝູ່ໃນໜຶ່ງປີມານີ້.ຕົວເລກສະຖິຕິດັ່ງກ່າວໄດ້ຜ່ອນຄາຍຄວາມວິຕົກກັງວົນຂອງຕະຫຼາດທີ່ຢ້ານວ່າເສດຖະກິດອາເມລິກາຈະຊຸດໂຊມລົງເປັນເທື່ອທີ2.
