ວັນທີ 29 ຕຸລານີ້, ສູນສົ່ງດາວທຽມຈິວຊວນໄດ້ດຳເນີນການເຝິກຊ້ອມຮ່ວມກັນທົ່ວເຂດຕໍ່ການບິນຂຶ້ນສູ່ວົງໂຄຈອນອະວະກາດຂອງຍານອະວະກາດ"ເສິນໂຈ່ວ"ເລກ8. ຜົນການເຝິກຊ້ອມສະແດງໃຫ້ເຫັນວ່າ, ການຄວບຄຸມລະບົບບັນຊາຕ່າງໆປະຕິບັດໄດ້ຢ່າງສະດວກ, ສະພາບເຕັກນິກຖືກຕ້ອງ, ອຸປະກອນທີ່ທົດລອງປະຕິບັດງານທຸກຢ່າງຢູ່ໃນສະພາບປົກກະຕິ, ແລະມີຄວາມພ້ອມໃນການສົ່ງຂຶ້ນສູ່ອະວະກາດແລ້ວ.
ເຈົ້າໜ້າທີ່ທີ່ກ່ຽວຂ້ອງກັບລະບົບສະຖານີສົ່ງຍານອະວະກາດຂອງໂຄງການການບິນອະວະກາດບັນທຸກມະນຸດຂອງຈີນກ່າວວ່າ, ຜ່ານການເຝິກຊ້ອມເທື່ອນີ້, ໄດ້ກວດການປະສານງານ ຕິດຕໍ່ກັນຂອງລະບົບຕ່າງໆພາຍໃຕ້ສະພາບສົ່ງຂຶ້ນສູ່ວົງໂຄຈອນອະວະກາດ, ຜົນຂອງການກວດກາໄດ້ສະແດງໃຫ້ຮູ້ວ່າລະບົບຕ່າງໆລ້ວນແຕ່ມີຄວາມພ້ອມໃຫ້ແກ່ການຍິງສົ່ງຍານອະວະກາດຂຶ້ນສູ່ວົງໂຄຈອນອະວະກາດ.
ອີງຕາມແຜນການ, ຍານອະວະກາດ"ເສິນໂຈ່ວ"ເລກ8ຈະຖືກສົ່ງຂຶ້ນສູ່ວົງໂຄຈອນອະວະກາດໃນເດືອນພະຈິກໜ້ານີ້, ຫຼັງຈາກຂຶ້ນສູ່ວົງໂຄຈອນອະວະກາດແລ້ວຈະປະຕິບັດໜ້າທີ່ໃນການຕິດຕໍ່ກັບຍານອະວະກາດ"ທຽນກົ່ງ"ເລກ1.
