ຈີນໃຊ້ເວລາພຽງແຕ່າ30ປີກໍສຳເລັດໜ້າທີ່ຫັນປ່ຽນດ້ານປະຊາກອນໃນຂະນະທີ່ປະເທດທີ່ພັດທະນາແລ້ວຕ້ອງໃຊ້ເວລາເຖິງຮ້ອຍປີຈຶ່ງສຳເລັດໄດ້
(GMT+08:00) 2011-10-31 11:04:32 cri
ວັນທີ31ຕຸລານີ້ເປັນວັນທີຈຳນວນປະຊາກອນທົ່ວໂລກມີເຖິງ7ຕື້ຄົນ. ກ່ອນໜ້ານີ້, ທ່ານຫຼີປີ່ນ, ຫົວໜ້າຄະນະກຳມະການປະຊາກອນແລະການວາງແຜນຄອບຄົວແຫ່ງຊາດຈີນກ່າວວ່າ, ຈີນໄດ້ໃຊ້ເວລາປະມານ30ປີ, ກໍ່ໄດ້ສຳເລັດໜ້າທີ່ຫັນປ່ຽນດ້ານປະຊາກອນໃນຂະນະທີ່ປະເທດທີ່ພັດທະນາແລ້ວໃຊ້ເວລາເຖິງຮ້ອຍປີຈຶ່ງສຳເລັດໄດ້, ເຊິ່ງໄດ້ປ່ຽນແປງໂຄຈອນການພັດທະນາຂອງປະຊາກອນ.
ທ່ານຫຼີປີ່ນກ່າວວ່າ, ຍ້ອນຈີນໄດ້ປະຕິບັດນະໂຍບາຍວາງແຜນຄອບຄົວ, ຈຶ່ງເຮັດໃຫ້ອັດຕາການເກີດຕ່ຳລົງ, ອັດຕາເຕີບໂຕດ້ານປະຊາກອນຕ່ຳກວ່າລະດັບສະເລ່ຍຂອງໂລກ, ເຊິ່ງໄດ້ສ້າງສະພາບແວດລ້ອມທີ່ດີດ້ານປະຊາກອນໃຫ້ແກ່ເສດຖະກິດຈີນທີ່ເຕີບໂຕຢ່າງວ່ອງໄວ, ແລະກໍ່ໄດ້ປະກອບສ່ວນອັນຕັ້ງໜ້າເຂົ້າໃນການພັດທະນາດ້ານປະຊາກອນຂອງໂລກ. ພ້ອມກັນນັ້ນ, ຄຸນນະພາບຊີວິດຂອງປະຊາກອນຈີນກໍ່ໄດ້ຍົກສູງຂຶ້ນເລື້ອຍໆ, ອັດຕາການຕາຍຂອງເດັກອ່ອນ, ອັດຕາການຕາຍຂອງແມ່ຍິງເວລາຖືພາແລະເວລາເກີດລູກ, ແລະຕົວເລກຄາດໝາຍອື່ນໆລ້ວນແຕ່ຢູ່ໃນລະດັບທີ່ດີທີ່ສຸດໃນປະເທດທີ່ພວມພັດທະນາ, ອາຍຸສະເລ່ຍຂອງປະຊາກອນກໍ່ຢູ່ໃນລະດັບກາງຂອງປະເທດທີ່ພັດທະນາແລ້ວ.
ທ່ານຫຼີປີ່ນກ່າວວ່າ, ໃນຕໍ່ໜ້ານີ້, ຈີນຈະຍຶດໝັ້ນແລະປັບປຸງນະໂຍບາຍການກຳເນີດທີ່ພວມປະຕິບັດຢູ່ໃນປະຈຸບັນ, ຮັກສາລະດັບການເກີດລູກທີ່ຕ່ຳ; ຍົກສູງຄຸນນະພາບຂອງປະຊາກອນ, ເລັ່ງລັດສ້າງປະເທດເຂັ້ມແຂງທາງດ້ານຊັບພະຍາກອນມະນຸດ; ແກ້ໄຂບັນຫາການເກີດລູກຍິງຊາຍທີ່ບໍ່ດຸນດ່ຽງກັນ, ຊຸກຍູ້ສິດສະເໝີພາບລະຫວ່າງຍິງຊາຍຂອງສັງຄົມ; ປັບປຸງລະບົບປະກັນສັງຄົມແລະການບໍລິການເບິ່ງແຍງດູແລຜູ້ອາວຸໂສ, ແກ້ໄຂບັນຫາຈຳນວນຜູ້ອາວຸໂສໃນສັງຄົມຫຼາຍຂຶ້ນຢ່າງຕັ້ງໜ້າ.
