ລັດຖະມົນຕີວ່າການກະຊວງປ້ອງກັນຄວາມສະຫງົບຈີນພົບປະກັບລັດຖະ ມົນຕີວ່າການກະຊວງປ້ອງກັນປະເທດລາວ
(GMT+08:00) 2011-10-31 16:20:25 cri
ຕາມຂ່າວສານຊິນຮວາ: ວັນທີ30ຕຸລານີ້, ທ່ານເມີ້ງຈ້ຽນຈູ້ທີ່ປຶກສາແຫ່ງລັດ, ລັດຖະມົນຕີວ່າການກະຊວງປ້ອງກັນຄວາມສະຫງົບຂອງຈີນໄດ້ພົບປະກັບທ່ານດວງໃຈ ພິຈິດຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງປ້ອງກັນປະເທດລາວທີ່ເດີນທາງມາຈີນເພື່ອເຂົ້າຮ່ວມກອງປະຊຸມຮ່ວມມືດ້ານການ ປະຕິບັດກົດໝາຍແລະຮັກສາຄວາມປອດໄພຢູ່ເຂດແມ່ນ້ຳຂອງລະຫວ່າງຈີນລາວມຽນມາແລະໄທຢູ່ ຫໍຮັບແຂກລັດຖະບານຈີນ ນະຄອນຫຼວງປັກກິ່ງ.
ທ່ານເມີ້ງຈ້ຽນຈູ້ກ່າວວ່າ, ຈີນລາວ2ປະເທດມີສາຍພູແລະແມ່ນ້ຳຕິດຕໍ່ກັນ, ປະຊາຊົນ2ປະເທດມີມິດຕະພາບອັນເປັນມູນເຊື້ອມາຍາວນານ. ປີນີ້ແມ່ນປີສ້າງຕັ້ງສາຍພົວພັນທາງການທູດລະຫວ່າງຈີນລາວຄົບຮອບ50ປີ, ຈີນຍິນດີພະຍາຍາມຮ່ວມມືກັບລາວ, ລົງເລິກການແລກປ່ຽນແລະຮ່ວມມືໃນທຸກຂົງເຂດ, ຍົກລະດັບການຮ່ວມມືທີ່ຕ່າງຝ່າຍຕ່າງໄດ້ຮັບຜົນປະໂຫຍດ, ເພີ່ມທະວີການໄປມາຫາສູ່ແລະແລກປ່ຽນກັນທາງດ້ານວັດທະນະທຳລະຫວ່າງປະຊາຊົນສອງຊາດ, ປັບປຸງແລະພັດທະນາການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນລາວໃຫ້ດີ, ນຳເອົາຜົນປະໂຫຍດອັນແທ້ຈິງມາໃຫ້ປະຊາຊົນ2ຊາດ, ເປັນບ້ານໃກ້ເຮືອນຄຽງທີ່ດີ, ເພື່ອນມິດທີ່ດີ, ສະຫາຍທີ່ດີແລະຄູ່ຮ່ວມມືທີ່ດີຕະຫຼອດໄປ.
ທ່ານເມີ້ງຈ້ຽນຈູ້ຊີ້ອອກວ່າ, ໃນວັນທີ5ຕຸລາປີນີ້, ເຮືອບັນທຸກສິນຄ້າຂອງຈີນ2ລຳພ້ອມດ້ວຍລູກເຮືອ13ຄົນຖືກລັກພາຕົວແລະຫຼອນໂຈມຕີຢູ່ແມ່ນ້ຳຂອງ, ເຊິ່ງເຮັດໃຫ້ລູກເຮືອທັງໝົດຂອງຈີນເສຍຊີວິດ. ຫຼັງຈາກເກີດເຫດການນີ້ແລ້ວ, ລາວໄດ້ຊ່ວຍເຫຼືອເຮືອແລະລູກເຮືອຂອງຈີນທີ່ຍັງຄ້າງຢູ່ລາວກັບຄືນປະເທດ, ຈີນສະແດງຄວາມຂອບອົກຂອບໃຈຕໍ່ເລື່ອງດັ່ງກ່າວ. ການຮັບປະກັນຄວາມປອດໄພທາງດ້ານຊີວິດແລະຊັບສິນຂອງເຮືອແລະບຸກຄົນທີ່ເດີນເຮືອຕາມລຳນ້ຳຂອງແມ່ນຄວາມປາຖະໜາຮ່ວມຂອງຝ່າຍ ຕ່າງໆ. ການຈັດກອງປະຊຸມດ້ານການປະຕິບັດກົດໝາຍຢູ່ເຂດແມ່ນ້ຳຂອງລະຫວ່າງ4ປະເທດມີຄວາມໝາຍສຳຄັນຫຼາຍຕໍ່ການຮ່ວມມືດ້ານການຮັກສາຄວາມປອດໄພແລະປະຕິບັດກົດໝາຍ, ຮ່ວມກັນຕໍ່ຕ້ານການຄ້າຢາເສບຕິດແລະການກໍ່ອາຊະຍາກຳຂ້າມຊາດຕ່າງໆ, ປົກປັກຮັກສາຄວາມປອດໄພດ້ານການເດີນເຮືອລະຫວ່າງຊາດ.
ທ່ານດວງໃຈ ພິຈິດກ່າວວ່າ, ລັດຖະບານລາວເອົາໃຈໃສ່ໃນການຮ່ວມມືດ້ວຍໄມຕິຈິດມິດຕະພາບກັບຈີນ, ຍິນດີພະຍາຍາມຮ່ວມກັນກັບຈີນ, ເພີ່ມທະວີການຮ່ວມມືດ້ານການຮັກສາຄວາມປອດໄພປະຕິບັດກົດໝາຍຢູ່ເຂດລຳແມ່ນ້ຳຂອງ, ນຳໃຊ້ມາດຕະການທີ່ມີຜົນປະໂຫຍດເພື່ອຕໍ່ຕ້ານການເຄື່ອນໄຫວອາຊະຍາກຳຂ້າມຊາດທີ່ມີຜົນຮ້າຍຕໍ່ຄວາມປອດໄພຂອງເຂດແມ່ນ້ຳຂອງ, ຮັກສາຄວາມປອດໄພໃນການເດີນເຮືອສາກົນຢູ່ແມ່ນ້ຳຂອງ.
