ຂະຫຍາຍການພົວພັນຈີນເອີລົບດ້ວຍສາຍຕາຍຸດທະສາດ
(GMT+08:00) 2011-10-31 16:22:09 cri
ຕອນຄ່ຳວັນທີ30ຕຸລານີ້ຕາມເວລາທ້ອງຖິ່ນ, ທ່ານຫູຈີນທາວ ປະທານປະເທດຈີນໄດ້ເດີນທາງດ້ວຍເຮືອບິນພິເສດໄປຮອດນະຄອນວຽນ, ເລີ່ມຢ້ຽມຢາມໂອຕຼິສທາງລັດຖະກິດ. ໃນອີກຫຼາຍມື້ຕໍ່ໜ້ານີ້, ຜູ້ນຳຂອງປະເທດທີ່ພັດທະນາແລ້ວຕົ້ນຕໍຂອງໂລກແລະປະເທດຕາງໜ້າຕະຫຼາດຈະເລີນໃໝ່ ເຊັ່ນ ຈີນ, ອິນເດຍ, ເບຼຊິນເປັນຕົ້ນ ຈະເຕົ້າໂຮມກັນຢູ່ເມືອງການຂອງຝຣັ່ງ, ເພື່ອປຶກສາຫາລືບັນຫາເສດຖະກິດໂລກທີ່ສັບສົນ.
ສະຫະພາບເອີລົບແມ່ນກຳລັງເສດຖະກິດທີ່ສຳຄັນຂອງໂລກ, ຈີນຫວັງຢາກໃຫ້ລົງເລິກການຮ່ວມມືກັບເອີລົບຕື່ມອີກ, ເປີດກວ້າງການຮ່ວມມືໃນຂົງເຂດການຄ້າ, ການລົງທຶນ, ວິທະຍາສາດເຕັກໂນໂລຊີ, ການເງິນແລະອື່ນໆ, ບັນລຸການພັດທະນາແບບຕ່າງຝ່າຍຕ່າງມີຜົນປະໂຫຍດ.
ການຮ່ວມມືລະຫວ່າງຈີນສະຫະພາບເອີລົບປະເຊີນກັບໂອກາດຄັ້ງປະຫວັດສາດ. ດ້ານໜຶ່ງ, ວິກິດການການເງິນທົ່ວໂລກທີ່ເກີດຂຶ້ນໃນປີ2008ໄດ້ລົງເລິກແລະຂະຫຍາຍກວ້າງອອກຕື່ມອີກ, ເສດຖະກິດຂອງອົງກອນເສດຖະກິດທີ່ພັດທະນາແລ້ວ ເຊັ່ນ ສະຫະພາບເອີລົບ ໄດ້ຕົກຕ່ຳ, ມີບັນຫາໜີ້ສິນອັນໜັກໜ່ວງ, ອົງກອນເສດຖະກິດທີ່ຈະເລີນໃໝ່ກໍປະເຊີນກັບບັນຫາຕ່າງໆ ເຊັ່ນ: ໄພເງິນເຟີ້, ການຄ້າບໍ່ເຂັ້ມແຂງແລະອື່ນໆ, ຈີນສະຫະພາບເອີລົບເພີ່ມທະວີການຮ່ວມມືກັນຈິ່ງຈະສາມາດຜ່ານຜ່າຄວາມຫຍຸ້ງຍາກ. ອີກດ້ານໜຶ່ງ, ການຮ່ວມມືລະຫວ່າງສອງຝ່າຍມີລັກສະນະຊຸກຍູ້ຊ່ວຍເຫຼືອກັນ. ໃນທົດສະວັດທີສອງຂອງສະຕະວັດໃໝ່, ຈີນໄດ້ປ່ຽນແປງຮູບການພັດທະນາເສດຖະກິດແລະພະຍາຍາມບັນລຸການພັດທະນາແບບກົມກຽວກັນ, "ຍຸດທະສາດ2020ຂອງເອີລົບ"ທີ່ມີຈຸດປະສົງຢາກຊຸກຍູ້ການພັດທະນາວິທະຍາສາດເຕັກໂນໂລຊີແລະຊຸກຍູ້ການເຕີບໂຕຂອງເສດຖະກິດ, ແມ່ນສອດຄ່ອງກັບອະນາຄົດອັນສົດໃສເພື່ອຍົກລະດັບການຮ່ວມມືລະຫວ່າງສອງຝ່າຍ.
ໃນໄລຍະມໍ່ໆມານີ້, ຂະບວນການເຊື່ອມໂຍງເຂົ້າກັນຂອງສະຫະພາບເອີລົບປະສົບຄວາມຫຍຸ້ງຍາກ, ສັນຍາຣີສບອນຫາກໍ່ມີຜົນບັງຄັບໃຊ້ກໍຖືກກະທົບກະເທືອນຈາກວິກິດການການເງິນ; ວິກິດການໜີ້ສິນຂອງລັດແຜ່ລາມອອກເລື້ອຍໆ, ເປັນອຸປະສັກອີກຢ່າງໜຶ່ງຕໍ່ເສດຖະກິດຂອງສະຫະພາບເອີລົບ; ຍ້ອນຄວາມຂັດແຍ່ງໃນໂຕຂອງຂະບວນການເຊື່ອມໂຍງເຂົ້າກັນ, ພ້ອມດ້ວຍປະເທດສະມາຊິກສະຫະພາບເອີລົບມີລະດັບການພັດທະນາທີ່ຕ່າງກັນແລະເສດຖະກິດທົ່ວໂລກຕົກຕ່ຳລົງ, ສະຫະພາບເອີລົບຈະປະເຊີນກັບສິ່ງທ້າທາຍຫຼາຍດ້ານຕໍ່ໄປ.
ໃນຂະນະທີ່ປະເທດເຂດໃຊ້ເງິນເອີໂຣພົບຄວາມຫຍຸ້ງຍາກ, ຈີນບໍ່ໄດ້ເບິ່ງເສີຍເມີຍ, ໄດ້ໃຫ້ການຊ່ວຍເຫຼືອຢ່າງທ່ວງທັນຕາມຄວາມສາມາດຂອງຕົນ. ຝ່າຍຈີນໄດ້ສົ່ງສັນຍານສຳຄັນ, ນັ້ນກໍຄື, ສະໜັບສະໜູນຂະບວນການເຊື່ອມໂຍງເຂົ້າກັນຂອງເອີລົບ, ມີຄວາມໝັ້ນໃຈຕໍ່ເງິນເອີໂຣ, ເຊື່ອວ່າເອີລົບສາມາດຜ່ານຜ່າວິກິດການໜີ້ສິນຂອງລັດແລະຍິນດີເພີ່ມທະວີການຮ່ວມມືກັບເອີລົບ.
ພາຍໃຕ້ສະຖານະການປະຈຸບັນ, ຈີນເອີລົບຍິ່ງຕ້ອງການມີສາຍຕາຍຸດທະສາດເບິ່ງກວ້າງມອງໄກ, ເພື່ອຕີລາຄາແລະຊຸກຍູ້ການພົວພັນຄູ່ຮ່ວມມືຍຸດທະສາດຮອບດ້ານລະຫວ່າງຈີນເອີລົບ, ພະຍາຍາມຊອກຫາໂອກາດຮ່ວມມືໃນເວລາຮັບມືກັບວິກິດການ, ບໍ່ພຽງແຕ່ຊຸກຍູ້ການຮ່ວມມືຈີນເອີລົບໃນຂົງເຂດຮ່ວມມືທີ່ມີຢູ່ປະຈຸບັນເທົ່ານັ້ນ, ຍິ່ງຄວນເພີ່ມທະວີການຮ່ວມມືກັນໃນຂົງເຂດທີ່ພົບຄວາມຫຍຸ້ງຍາກແລະຂົງເຂດທີ່ມີທ່າແຮງບົ່ມຊ້ອນອື່ນໆຕື່ມອີກ.
