ຈຳນວນຜູ່ເສຍຊີວິດໃນໄພນ້ຳຖ້ວມຂອງໄທໄດ້ເພີ່ມຂຶ້ນຮອດ381ຄົນ
(GMT+08:00) 2011-10-31 17:49:48 cri
ວັນທີ30ຕຸລານີ້,ກະຊວງມະຫາດໄທອອກປະກາດແຈ້ງການວ່າ,ນັບມາຮອດວັນທີ29ຕຸລານີ້,ໄພນ້ຳຖ້ວມທີ່ໄດ້ຍືດເຍືອເປັນເວລາ3ເດືອນນັ້ນໄດ້ພາໃຫ້381ຄົນເສຍຊີວິດ,2ຄົນຫາຍສາບສູນ.
ປະກາດແຈ້ງການຂຽນວ່າ,ໄພນ້ຳຖ້ວມແຜ່ຂະຫຍາຍໄປເຖິງ144ເມືອງຂອງ26ຈັງຫວັດໃນທົ່ວປະເທດ,ມີປະຊາກອນ2ລ້ານ3ໝື່ນປະສົບໄພ.ຢູ່ທາງພາກຕາເວັນອອກຂອງນະຄອນຫຼວງບາງກອກ,ນ້ຳໄດ້ໄຫຼເຂົ້າຖ້ວມເຖິງ27ຄຸ້ມບ້ານແລ້ວ.
ໃນມື້ດຽວກັນ,ທ່ານນາງຍິ່ງລັກ ຊິນນະວັດ,ນາຍົກລັດຖະມົນຕີໄທກ່າວວ່າ,ນ້ຳທີ່ຖ້ວມຢູ່ບາງກອກຈະບົກແຫ້ງລົງຢ່າງຊ້າໆ,ປະຊາຊົນຢູ່ເຂດທີ່ປະສົບໄພຍັງຕ້ອງລະມັດລະວັງ.
ນອກນີ້,ຍ້ອນປະສົບໄພນ້ຳຖ້ວມ,ດັ່ງນັ້ນແຕ່ວັນທີ27ຫາວັນທີ31ຕຸລານີ້ລັດຖະບານໄທໄດ້ປະກາດໃຫ້ເປັນວັນພັກພິເສດຍ້ອນນ້ຳຖ້ວມ,ທ່ານນາງຍິ່ງລັກ ຊິນນະວັດກ່າວວ່າ,ຈະບໍ່ແກ່ຍາວວັນພັກພິເສດນີ້ຕໍ່ໄປອີກ.
