ກອງປະຊຸມການຮ່ວມມືໃນການປະຕິບັດກົດໝາຍແລະຄວາມປອດໄພຕາມລຳແມ່ນ້ຳຂອງລະຫວ່າງຈີນ, ລາວ, ມຽນມາແລະໄທຈັດຂຶ້ນຢູ່ນະຄອນຫຼວງປັກກິ່ງ
(GMT+08:00) 2011-11-01 15:33:00 cri
ວັນທີ31ຕຸລາແລ້ວນີ້, ກອງປະຊຸມການຮ່ວມມືໃນການປະຕິບັດກົດໝາຍແລະຄວາມປອດໄພຕາມລຳແມ່ນ້ຳຂອງລະຫວ່າງຈີນ, ລາວ, ມຽນມາແລະໄທໄດ້ຈັດຂຶ້ນຢູ່ນະຄອນຫຼວງປັກກິ່ງ. ກ່ຽວກັບສະພາບການຄວາມປອດໄພຕາມລຳແມ່ນ້ຳຂອງ, ກອງປະຊຸມໄດ້ຄົ້ນຄວ້າສ້າງກົນໄກຮ່ວມມືໃນການປະຕິບັດກົດໝາຍແລະຄວາມປອດໄພລະຫວ່າງ4ປະເທດຕາມລຳແມ່ນ້ຳຂອງ, ແລະປະສານງານຈຸດຢືນຂອງຝ່າຍຕ່າງໆຕື່ມອີກ, ເພື່ອເຮັດໃຫ້ການສືບສວນຄະດີ"ວັນທີ5ຕຸລາ"ຢ່າງຈະແຈ້ງ.
ທ່ານເມີ້ງຈ້ຽນຈູ້, ທີ່ປຶກສາແຫ່ງລັດທັງເປັນລັດຖະມົນຕີວ່າການກະຊວງສັນຕິບານຈີນເປັນປະທານກອງປະຊຸມ. ພົນໂທດວງໃຈ ພິຈິດ, ຮອງນາຍົກລັດຖະມົນຕີທັງເປັນລັດຖະມົນຕີວ່າການກະຊວງປ້ອງກັນປະເທດລາວ, ທ່ານໂກໂກ, ລັດຖະມົນຕີວ່າການກະຊວງພາຍໃນມຽນມາ, ແລະທ່ານໂກວິດ ວັດທະນະ, ຮອງນາຍົກລັດຖະມົນຕີໄທໄດ້ນຳພາຄະນະເຂົ້າຮ່ວມກອງປະຊຸມດັ່ງກ່າວ.
ດ້ວຍຄວາມພະຍາຍາມຮ່ວມກັນຂອງຝ່າຍຕ່າງໆ, ກອງປະຊຸມຄັ້ງນີ້ໄດ້ຮັບຜົນສຳເລັດຢ່າງຈົບງາມ. ກອງປະຊຸມໄດ້ຮັບຮອງ"ບົດບັນທຶກກອງປະຊຸມການຮ່ວມມືໃນການປະຕິບັດກົດໝາຍແລະຄວາມປອດໄພຕາມລຳແມ່ນ້ຳຂອງ", ເປີດເຜີຍ"ຖະແຫຼງການຮ່ວມກ່ຽວກັບການຮ່ວມມືດ້ານການປະຕິບັດກົດໝາຍແລະຄວາມປອດໄພຕາມລຳແມ່ນ້ຳຂອງ", ແລະມີຄວາມເຫັນເປັນເອກະພາບກັນຫຼາຍດ້ານເປັນຕົ້ນແມ່ນ: ເຫັນດີໃຊ້ມາດຕະການອັນເຂັ້ມງວດຕື່ມອີກ, ເພີ່ມທະວີການຮ່ວມມືໃນການສືບສວນຄະດີທີ່ເກີດຂຶ້ນ; ດ້ານທີ2, ເພື່ອຮັບມຶກັບເງື່ອນໄຂໃໝ່ດ້ານຄວາມປອດໄພຢູ່ລຳແມ່ນ້ຳຂອງ, ກອງປະຊຸມໄດ້ເຫັນດີໃຫ້ສ້າງກົນໄກການຮ່ວມມືໃນການປະຕິບັດກົດໝາຍແລະຄວາມປອດໄພລຳແມ່ນ້ຳຂອງລະຫວ່າງຈີນ, ລາວ, ມຽນມາແລະໄທ, ແລກປ່ຽນຂໍ້ມູນຂ່າວສານ, ຮ່ວມກັນລາດຕະເວນປະຕິບັດກົດໝາຍ, ຮ່ວມກັນຕໍ່ຕ້ານການກໍ່ອາສະຍາກຳຂ້າມຊາດ, ຮ່ວມກັນຮັບມືກັບເຫດການສຸກເສີນ; ດ້ານທີ3, ເຫັນດີໃຫ້ນຳໃຊ້ຮູບການຕ່າງໆ, ເຊັ່ນຮ່ວມກັນສືບສວນຄະດີ, ປັບປຸງວຽກງານໂດຍສະເພາະເປັນຕົ້ນ, ຮ່ວມກັນຕໍ່ຕ້ານການກໍ່ອາສະຍາກຳຂ້າມຊາດໂດຍສະເພາະແມ່ນການປາບປາມກຸ່ມຄ້າຢາເສບຕິດ; ແລະບັນຫາສຸດທ້າຍແມ່ນ, ດຳເນີນການລາດຕະເວນປະຕິບັດກົດໝາຍຮ່ວມກັນໂດຍໄວ, ສ້າງເງື່ອນໄຂດ້ານຄວາມປອດໄພໃຫ້ແກ່ການຟື້ນຟູການເດີນເຮືອຕາມລຳແມ່ນ້ຳຂອງ, ພະຍາຍາມໃຫ້ຟື້ນຟູການເດີນເຮືອກ່ອນການຈັດກອງປະຊຸມຜູ້ນຳການຮ່ວມມືດ້ານເສດຖະກິດອະນຸພາກພື້ນແມ່ນ້ຳຂອງທີ່ຈະຈັດຂຶ້ນໃນເດືອນທັນວາປີນີ້.
