ຍານອາວະກາດເສີນໂຈ່ວເລກ8ຂອງຈີນຖືກສົ່ງຂຶ້ນສູ່ອາວະກາດຢ່າງສຳເລັດຜົນ
(GMT+08:00) 2011-11-01 17:36:02 cri
ເວລາ5ໂມງ58ນາທີຂອງວັນທີ1ພະຈິກນີ້,ຍານອາວະກາດເສີນໂຈ່ວເລກ8ຂອງຈີນໄດ້ຖືກສົ່ງຂຶ້ນສູ່ອາວະກາດຈາກສູນສົ່ງດາວທຽມຈິວສວນຂອງຈີນ,ແລະຈະເຊື່ອມຕໍ່ກັບຍານອາວະກາດ"ທຽນກົ່ງເລກ1"ຂອງຈີນໃນ2ວັນຂ້າງໜ້ານີ້,ເຊິ່ງເປັນການທົດລອງເຊື່ອມຕໍ່ລະຫວ່າງສອງຍານອາວະກາດຂອງຈີນເປັນເທື່ອທຳອິດ.
ອີງຕາມແຜນການໂຄງການການບິນອາວະກາດບັນທຸກມະນຸດຂອງຈີນຈະແບ່ງເປັນ3ຂັ້ນຕອນບັນລຸເປົ້າໝາຍທີ່ສ້າງສະຖານີອາວະກາດທີ່ມີຄົນດູແລເປັນເທື່ອລະກ້າວ. ແຕ່ຍານອາວະກາດ "ທຽນກົ່ງເລກ1"ເຊື່ອມຕໍ່ກັບຍານອາວະກາດ "ເສີນໂຈ່ວເລກ8"ຢູ່ໃນອາວະກາດຈະສຳເລັດໜ້າທີ່ທີ່ສຳຄັນໃນຂັ້ນຕອນທີສອງ.
ເພື່ອສຳເລັດໜ້າທີ່ເຊື່ອມຕໍ່ລະຫວ່າງສອງຍານອາວະກາດໄດ້ຢ່າງຈົບງາມ,ລະບົບສະຖານທີ່ສົ່ງຍານອາວະກາດ,ລູກສອນໄຟບັນທຸກຍານອາວະກາດແລະລະບົບອື່ນໆໄດ້ຮັບການປັບປຸງຢ່າງຫຼວງຫຼາຍ. ຖືກລູກສອນໄຟສົ່ງຍານເປັນຕົວຢ່າງ,ໃນເທື່ອນີ້,ຈີນກໍ່ໄດ້ປັບປຸງເຕັກນິກ 150ກວ່າລາຍໃນດ້ານການສົ່ງຍານ.ທ່ານຈຽງຈີ,ຮອງຊ່າງອອກແບບໃຫຍ່ຜູ້ທີໜຶ່ງຂອງສະຖານີເລກໜຶ່ງຂອງກຸ່ມວິທະຍາສາດເຕັກໂນໂລຊີການບິນອາວະກາດຈີນກ່າວວ່າ:
"ທີໜຶ່ງໄດ້ຍົກສູງຄວາມສາມາດດ້ານການບັນທຸກຍານ,ເພີ່ມນ້ຳຢາໃຫ້ຫຼາຍກວ່າເກົ່າ. ທີສອງແມ່ນໄດ້ຍົກສູງລະດັບທີ່ໃຫ້ລູກສອນໄຟເຂົ້າວົງໂຄຈອນ.ທີສາມແມ່ນໄດ້ຍົກສູງຄວາມໜ້າເຊື່ອຖືຂອງລູກສອນໄຟສົ່ງຍານ."
ເຕັກນິກໃນການເຊື່ອມຕໍ່ລະຫວ່າງຍານອາວະກາດແມ່ນເຕັກນິກທີ່ຍາກທີ່ສຸດໃນຂົງເຂດການບິນອາວະກາດ,ມີຄວາມສ່ຽງໃຫຍ່ຫຼາຍ. ທ່ານນາງຫວູຜິງ, ໂຄສົກໂຄງການການບິນອາວະກາດບັນທຸກມະນຸດຂອງຈີນກ່າວວ່າ,ຈີນໄດ້ໃຊ້ມາດຕະການຕ່າງໆເພື່ອຮັບມືກັບຄວາມສ່ຽງ,ນາງມີຄວາມໝັ້ນໃຈຫຼາຍຕໍ່ການສົ່ງຍານອາວະກາດ "ເສີນໂຈ່ວເລກ8"ຂຶ້ນສູ່ອາວະກາດແລະການສຳເລັດໜ້າທີ່ການເຊື່ອມຕໍ່ກັບຍານອາວະກາດ "ທຽນກົ່ງເລກ1",ນາງກ່າວວ່າ:
"ກ່ອນອື່ນຮັບປະກັນຍານອາວະກາດມີຄຸນນະພາບສູງ; ສອງແມ່ນໄດ້ດຳເນີນວຽກງານການທົດລອງສົ່ງຍານແລະເຊື່ອມຕໍ່ຢູ່ໜ້າດິນຢ່າງຫຼວງຫຼາຍ; ສາມແມ່ນໄດ້ວາງແຜນແກ້ໄຂການຕິດຂັດທາງດ້ານເຕັກນິກຢ່າງລະອຽດ,ວາງແຜນການເກືອບຮ້ອຍລາຍ,ແລະໄດ້ດຳເນີນການເຝິກຊ້ອມເທື່ອແລ້ວເທື່ອອີກ."
ໃນການສົ່ງຍານອາວະກາດ "ເສີນໂຈ່ວເລກ8"ຂອງຈີນເທື່ອນີ້,ຈີນໄດ້ດຳເນີນການຮ່ວມມືສາກົນໃນຂົງເຂດການນຳໃຊ້ເຕັກນິກທາງດ້ານອາວະກາດເທື່ອທຳອິດ. ຍານອາວະກາດ "ເສີນໂຈ່ວເລກ8"ໄດ້ບັນທຸກອຸປະກອນທົດລອງວິທະຍາສາດດ້ານຊີວິດໃນອາວະກາດທີ່ນັກວິທະຍາສາດຈີນ-ເຢຍລະມັນຮ່ວມກັນດຳເນີນ,ນັກວິທະຍາສາດຂອງສອງປະເທດຈະຮ່ວມມືດຳເນີນການທົດລອງທາງວິທະຍາສາດດ້ານຊີວິດໃນອາວະກາດ17ໂຄງການ.
