ເລຂາທິການໃຫຍ່ສະຫະປະຊາຊາດແລະປະທານສະມັດຊາໃຫຍ່ສະຫະປະຊາຊາດຢ້ຽມຢາມລີບີຢ່າງກະທັນຫັນ ຣັດເຊຍສະແດງຄວາມສົງໄສຕໍ່ການເຄື່ອນໄຫວທາງການທະຫານຂອງນາໂຕ
(GMT+08:00) 2011-11-03 10:19:29 cri
ວັນທີ2ພະຈິກນີ້, ທ່ານບານກີມູນ, ເລຂາທິການໃຫຍ່ສະຫະປະຊາຊາດແລະທ່ານນາເຊຍ ອັບດຸນລາຊິສ ອັນ ນາເຊີ, ປະທານສະມັດຊາໃຫຍ່ສະຫະປະຊາຊາດສະໄໝທີ66ໄດ້ໄປຢ້ຽມຢາມນະຄອນຫຼວງຕຼີໂປລີຂອງລີບີຢ່າງກະທັນຫັນ, ແລະຢ້ຽມຢາມລີບີເປັນເວລາໜຶ່ງວັນ.
ໃນເວລາຢ້ຽມຢາມ, ທ່ານບານກີມູນກ່າວວ່າ, ຈຸດປະສົງຕົ້ນຕໍຂອງການຢ້ຽມຢາມເທື່ອນີ້ແມ່ນກ່າວຢ້ຳສະຫະປະຊາຊາດສະໜັບສະໜູນປະຊາຊົນລີບີໃນການສະແຫວງຫາເສລີພາບແລະວຽກງານປະຊາທິປະໄຕຢ່າງແຂງແຮງ, ສົ່ງເສີມໃຫ້ເຈົ້າໜ້າທີ່ຊົ່ວຄາວລີບີຈົ່ງອອກແຮງສ້າງຄວາມຮັບຮູ້ຄືກັນຢ່າງກວ້າງຂວາງ, ຮັກສາຄວາມສາມັກຄີກັນ, ຟື້ນຟູຄວາມໝັ້ນຄົງແລະຄວາມເປັນລະບຽບຮຽບຮ້ອຍຂອງປະເທດຊາດ, ແລະຊຸກຍູ້ວຽກງານປອງດອງຊາດຢ່າງເລິກເຊິ່ງໃນໄລຍະສຳຄັນທີ່ທຸກສິ່ງທຸກຢ່າງຕ້ອງການສ້າງສາຄືນໃໝ່ຫຼັງການປົດປ່ອຍ.
ພ້ອມກັນນັ້ນ, ທ່ານບານກີມູນຮຽກຮ້ອງໃຫ້ຝ່າຍຕ່າງໆຂອງລີບີຈົ່ງຕົກລົງຄວາມເຫັນເປັນເອກະສັນກັນກ່ຽວກັບບັນຫາຕ່າງໆ, ເຊັ່ນ, ຄວາມປອດໄພສາທາລະນະ, ຍຶດເອົາອາວຸດ, ສ້າງລັດຖະບານຊົ່ວຄາວ, ແລະອື່ນໆ.
ນີ້ເປັນທ່ານບານກີມູນໄປຢ້ຽມຢາມລີບີເປັນຄັ້ງທຳອິດຫຼັງຈາກອຳນາດການປົກຄອງກັດດາຟີຖືກໂຄ່ນລົ້ມແລ້ວ. ປະຈຸບັນ, ຄະນະທູດພິເສດຂອງສະຫະປະຊາຊາດພວມຊ່ວຍເຫຼືອລີບີດຳເນີນວຽກງານສ້າງສາຄືນໃໝ່, ການກະກຽມການເລືອກຕັ້ງແລະອື່ນໆ.
ພ້ອມກັນນັ້ນ, ເຖິງວ່າການເຄື່ອນໄຫວທາງການທະຫານຂອງນາໂຕຢູ່ລີບີໄດ້ສິ້ນສຸດລົງແລ້ວກໍ່ຕາມ, ແຕ່ວັນທີ2ພະຈິກນີ້, ກະຊວງການຕ່າງປະເທດຣັດເຊຍໄດ້ອອກຖະແຫຼງການວ່າ, ຣັດເຊຍຍັງມີຄວາມສົງໄສຫຼາຍຢ່າງຕໍ່ນາໂຕທີ່ດຳເນີນການເຄື່ອນໄຫວທາງການທະຫານຢູ່ລີບີ, ຝ່າຍຕ່າງໆທີ່ກ່ຽວຂ້ອງຄວນວິເຄາະຢ່າງລະອຽດຕໍ່ການເຄື່ອນໄຫວທາງການທະຫານເທື່ອນີ້, ຖອດຖອນບົດຮຽນເພື່ອບໍ່ໃຫ້ເກີດກໍລະນີແນວນີ້ອີກ.
