ຈີນຍິນດີຮວມມືກັບບັນດາປະເທດໃນໂລກໃນຂົງເຂດການບິນອະວະກາດບັນທຸກມະນຸດ
(GMT+08:00) 2011-11-03 18:43:44 cri
ທ່ານນາງອູພິງ ໂຄສົກໂຄງການການບິນອະວະກາດບັນທຸກມະນຸດຂອງຈີນກ່າວໃນວັນທີ3ພະຈິກນີ້ຢູ່ນະຄອນຫຼວງປັກກິ່ງວ່າ: ຈີນຈະດຳເນີນການຮ່ວມມືຕົວຈິງແລະແລກປ່ຽນບົດຮຽນຢ່າງຕັ້ງໜ້າກັບບັນດາປະເທດໃນໂລກໃນຂົງເຂດການບິນອະວະກາດບັນທຸກມະນຸດ.
ທ່ານນາງອູພິງກ່າວໃນກອງປະຊຸມຂ່າວທີ່ຈັດຂຶ້ນໃນວັນທີ3ພະຈິກນີ້ວ່າ,ໃນເວລາຍານອະວະກາດເສິນໂຈ່ວເລກ8ບິນຢູ່ວົງໂຄຈອນອະວະກາດ,ນັກວິທະຍາສາດຂອງຈີນແລະເຢຍລະມັນຈະນຳໃຊ້ເຄື່ອງອຸປະກອນໃນການທົດລອງໃນການເພາະພັນສັດແລະພືດທີ່ໃຊ້ທົ່ວໄປນັ້ນດຳເນີນການທົດລອງທາງດ້ານວິທະຍາສາດກ່ຽວກັບການມີຊີວິດໃນອະວະກາດຈຳນວນ17ລາຍການ.ນີ້ແມ່ນໂຄງການການບິນອະວະກາດບັນທຸກມະນຸດຂອງຈີນດຳເນີນການຮ່ວມມືກັບສາກົນໃນຂົງເຂດການນຳໃຊ້ວິທະຍາສາດອະວະກາດເປັນເທື່ອທຳອິດ,ສອງຝ່າຍຮ່ວມມືກັນໄປດ້ວຍດີ.ຈີນຍັງໄດ້ເຊີນເຈົ້າໜ້າທີ່ຂອງກົມການບິນອະວະກາດເອີລົບແລະສູນການບິນອະວະກາດເຢຍລະມັນໄປຢ້ຽມຊົມການສົ່ງຍານອະວະກາດເສິນໂຈ່ວເລກ8ຂຶ້ນສູ່ອະວະກາດຢູ່ສູນສົ່ງດາວທຽມຈີວຊວນຂອງຈີນ.
ທ່ານນາງອູພິງກ່າວວ່າ,ຈີນຈະສືບຕໍ່ດຳເນີນການຮ່ວມມືຕົວຈິງແລະແລກປ່ຽນບົດຮຽນຢ່າງຕັ້ງໜ້າກັບບັນດາປະເທດໃນໂລກບົນພື້ນຖານທີ່ເຄົາລົບເຊິ່ງກັນແລະກັນ,ສະເໝີພາບກັນແລະຕ່າງຝ່າຍຕ່າງໄດ້ຮັບຜົນປະໂຫຍດ,ເປີດເຜີຍແລະໂປ່ງໃສ.ຈີນຍິນດີຮ່ວມກັບປະເທດຕ່າງໆໃນໂລກຮ່ວມກັນຊຸກຍູ້ການພັດທະນາເຕັກນິກການບິນອະວະກາດບັນທຸກມະນຸດ,ປະກອບສ່ວນຢ່າງຕັ້ງໜ້າກວ່າເກົ່າເຂົ້າໃນການນຳໃຊ້ອະວະກາດ,ສ້າງຄວາມຜາສຸກໃຫ້ແກ່ມວນມະນຸດ.
