ວັນທີ3ພະຈິກນີ້,ກອງປະຊຸມສຸດຍອດຄັ້ງທີ6ຂອງຜູ່ນຳກຸ່ມ20ປະເທດຫຼືG20ໄດ້ໄຂຂຶ້ນຢູ່ເມືອງການາຂອງຝະຣັ່ງ.ໃນເວລາກ່າວຄຳປາໄສຕໍ່ກອງປະຊຸມ,ທ່ານຫູຈິນທ່າວ,ປະທານປະເທດຈີນຊີ້ອອກວ່າ,ພາຍໃຕ້ສະພາບການໃນປະຈຸບັນນີ້,ກຸ່ມG20ຄວນສືບຕໍ່ເສີມຂະ ຫຍາຍນ້ຳໃຈທີ່ຮ່ວມແຮງຮ່ວມໃຈກັນເພື່ອຜ່ານຜ່າຄວາມຫຍຸ້ງຍາກໄປພ້ອມກັນແລະຮ່ວມມືກັນເພື່ອໃຫ້ໄດ້ຮັບຜົນປະໂຫຍດຮ່ວມກັນນັ້ນ,ພະຍາຍາມຊຸກຍູ້ໃຫ້ເສດຖະກິດໂລກມີການເຕີບໂຕແລະການເງິນການທະນາຄານມີຄວາມໝັ້ນທ່ຽງ.ທ່ານສະເໜີໃຫ້ບັນດາຝ່າຍຍຶດໝັ້ນໃນການເອົາໃຈໃສ່ຄວາມກ້ຳເກີ່ງກັນໃນຂະນະທີ່ເອົາໃຈໃສ່ຕໍ່ການເຕີບໂຕ;ຊອກຫາການໄດ້ຮັບຜົນປະໂຫຍດຮ່ວມກັນໂດຍຜ່ານການຮ່ວມມື;ປັບປຸງມາດຕະການໃຫ້ດີຂຶ້ນໃນຂະບວນການປະຕິຮູບ;ຍຶດໝັ້ນການປະດິດສ້າງເພື່ອກ້າວໄປຂ້າງໜ້າຢ່າງບໍ່ຢຸດຢັ້ງ;ແລະຮ່ວມກັນຊຸກຍູ້ຄວາມຈະເລີນຮຸ່ງເຮືອງໃນການພັດທະນາ.
ທ່ານຫູຈິນທ່າວກ່າວວ່າ,ກໍລະນີທີ່ໄດ້ເກີດຂຶ້ນນັ້ນເກີດແຕ່ວິກິດການທາງດ້ານການເງິນສາ ກົນປີ2008ມານີ້ສະແດງໃຫ້ເຫັນວ່າ,ນີ້ບໍ່ແມ່ນວິກິດການທາງດ້ານເສດຖະກິດການທະນາຄານຊື່ໆ,ວິກິດການເທື່ອນີ້ໄດ້ເຜີຍໃຫ້ເຫັນຂໍ້ບົກຜ່ອງຈຳນວນຫຼວງຫຼາຍທາງດ້ານລະບົບ,ກົນໄກ,ນະໂຍບາຍແລະວິທີການພັດທະນາ.ໃນຖານະເປັນເວທີປຶກສາຫາລືສຳຄັນດ້ານການຮ່ວມມືລະຫວ່າງຊາດ,ກຸ່ມG20ຄວນເສີມຂະຫຍາຍນ້ຳໃຈທີ່ຮ່ວມແຮງຮ່ວມໃຈກັນເພື່ອພ້ອມກັນຜ່ານຜ່າຄວາມຫຍຸ້ງຍາກແລະຮ່ວມມືກັນເພື່ອໃຫ້ໄດ້ຮັບຜົນປະໂຫຍດຮ່ວມ ກັນ,ຮ່ວມກັນເຊີດຊູຄວາມໝັ້ນໃຈຂອງຕະຫຼາດ,ຜ່ອນຄາຍຄວາມສ່ຽງແລະສິ່ງທ້າທາຍ ຢ່າງຈິງຈັງ.
ທ່ານຫູຈິນທ່າວກ່າວເນັ້ນວ່າ,ການຮັບປະກັນໃຫ້ເສດຖະກິດໂລກເຕີບໂຕຢ່າງແຂງແຮງແມ່ນໜ້າທີ່ສຳຄັນອັນດັບໜຶ່ງໃນປະຈຸບັນນີ້.ຝ່າຍຕ່າງໆຄວນວາງມາດຕະການອັນເຂັ້ມແຂງ,ເປີດກວ້າງການຜະລິດ,ເພີ່ມວຽກເຮັດງານທຳ;ເອົາໃຈໃສ່ສະໜັບສະໜູນການພັດທະນາຂອງວິສາຫະກິດຂະໜາດກາງແລະຂະໜາດນ້ອຍຢ່າງມີຈຸດສຸມ;ເພີ່ມທະວີບາດກ້າວໃນການປັບປຸງໂຄງປະກອນເສດຖະກິດຂອງໃຜລາວ.ໃນຂະນະດຽວກັນ,ທ່ານຍັງໄດ້ຮຽກຮ້ອງຝ່າຍຕ່າງໆຄວນເພີ່ມທະວີການແລກປ່ຽນຄວາມເຫັນແລະປະສານສົມທົບກັນ,ພະຍາຍາມສ້າງເປັນນະໂຍບາຍມາດຕະການທີ່ສະໜັບສະໜູນເຊິ່ງກັນແລະກັນແລະຊ່ວຍເຫຼືອເຊິ່ງກັນແລະກັນ.
ໃນຄຳປາໄສ,ທ່ານຫູຈິນທ່າວກ່າວຢ້ຳໃຫ້ສືບຕໍ່ຊຸກຍູ້ການປະຕິຮູບຕໍ່ລະບົບເງິນຕາສາກົນ,ລະບົບການຄ້າສາກົນແລະກົນໄກຈໍ່ຕົວຂຶ້ນຂອງລາຄາສິນຄ້າຂະໜາດໃຫຍ່,ແລະເອົາໃຈໃສ່ຮັບປະກັນຕອບສະໜອງຄວາມຮຽກຮ້ອງຕ້ອງການຂອງປະເທດທີ່ພວມພັດທະນາໃນຂະບວນການປະຕິຮູບ.ທ່ານຊີ້ອອກວ່າ,ການເລັ່ງລັດການພັດທະນາເສດຖະກິດສັງຄົມຂອງປະເທດທີ່ພວມພັດທະນາແມ່ນເສັ້ນທາງທີ່ຕ້ອງຂ້າມຜ່ານເພື່ອບັນລຸຄວາມຈະເລີນຮຸ່ງເຮືອງຂອງໂລກ.ຄວນສືບຕໍ່ເພີ່ມທະວີສິດໃນການປະກອບຄຳຄິດຄຳເຫັນຂອງປະເທດຕະຫຼາດຈະເລີນໃໝ່ແລະປະເທດທີ່ພວມພັດທະນາໃນເວລາປັບປຸງເສດຖະກິດທົ່ວໂລກ;ຊຸກຍູ້ໃຫ້ສ້າງຕັ້ງການພົວພັນຄູ່ຮ່ວມມືດ້ານການພັດທະນາທົ່ວໂລກແບບໃໝ່.ໃນຖາ ນະເປັນໜຶ່ງໃນບັນດາປະເທດທີ່ພວມພັດທະນາ,ຈີນຍິນດີດຳເນີນການຊ່ວຍເຫຼືອແລະສະໜັບສະໜູນເຊິ່ງກັນແລະກັນກັບປະເທດທີ່ພວມພັດທະນາອື່ນໆ,ຮ່ວມກັນສຸມກຳລັງເຂົ້າໃນການນຊຸກຍູ້ໃຫ້ໂລກມີສັນຕິພາບທີ່ຖາວອນແລະມີຄວາມຈະເລີນຮຸ່ງເຮືອງຮ່ວມກັນ.
ນອກນີ້,ໃນວັນທີ3ພະຈິກນີ້,ທ່ານຫູຈິນທ່າວ,ປະທານປະເທດຈີນຍັງໄດ້ພົບປະສົນທະນາກັບທ່ານບາຣັກໂອບາມາ,ປະທານາທິບໍດີອາເມລິກາທີ່ໄປເຂົ້າຮ່ວມກອງປະຊຸມສຸດຍອດG20ທີ່ເມືອງການ.ສອງຝ່າຍໄດ້ແລກປ່ຽນຄວາມເຫັນກ່ຽວກັບການພົວພັນຈີນ-ອາເມລິກາ,ກອງປະຊຸມສຸດຍອດG20ແລະບັນຫາອື່ນໆທີ່ສົນໃຈຮ່ວມກັນ.
