ຈີນ-ອາຊຽນຄົ້ນຄວ້າຊອກຫາຊ່ອງທາງໃໝ່ໃນການຫຼຸດຜ່ອນຄວາມທຸກຍາກໂດຍຜ່ານການທ່ອງທ່ຽວ
(GMT+08:00) 2011-11-04 11:28:55 cri
ຕາມຂ່າວສານຈີນ:ຕາມຂ່າວຈາກ"ກອງປະຊຸມຄົ້ນຄວ້າປຶກສາຫາລືກ່ຽວກັບການຫຼຸດຜ່ອນຄວາມທຸກຍາກໂດຍຜ່ານການທ່ອງທ່ຽວລະຫວ່າງຈີນກັບອາຊຽນ"ທີ່ຈັດຂຶ້ນຢູ່ເມືອງນານນີງເຂດປົກຄອງຕົນເອງເຜົ່າຈ້ວງກວາງຊີຈີນແຕ່ວັນທີ1ຫາວັນທີ2ພະຈິກນີ້,ຈີນແລະອາຊຽນຢາກຜ່ານການຮ່ວມມືດ້ານການທ່ອງທ່ຽວ,ຄົ້ນຄວ້າຊອກຫາຊ່ອງທາງໃໝ່ທີ່ໃຫ້ເງິນທຶນສັງຄົມຂອງຈີນແລະບັນດາປະເທດອາຊຽນເຂົ້າສູ່ຂະແໜງການທ່ອງທ່ຽວ,ພັດທະນາຊັບພະຍາກອນທ່ອງທ່ຽວຢູ່ໃນພາກພື້ນນີ້,ເພື່ອຊຸກຍູ້ວຽກງານຫຼຸດຜ່ອນຄວາມທຸກຍາກຂອງຈີນແລະພາກພື້ນ.
ທ່ານຊຸ່ນອ່ານມີນ,ປະທານກອງປະຊຸມເວທີປຶກສາຫາລືອຸດສາຫະກຳການຄ້າອະນຸພາກພື້ນແມ່ນ້ຳຂອງກ່າວວ່າ:"ການຫຼຸດຜ່ອນຄວາມທຸກຍາກແມ່ນເປົ້າໝາຍສຳຄັນແຫ່ງການຮ່ວມມືໃນພາກພື້ນ,ທັງແມ່ນສິ່ງທ້າທາຍສຳຄັນອັນດັບໜຶ່ງທີ່ບັນດາປະເທດອາຊຽນປະເຊີນ.ຂະແໜງການທ່ອງທ່ຽວຈະສ້າງວຽກເຮັດງານທຳຫຼາຍແລະກວມຫຼາຍຂະແໜງການ,ມີບົດບາດຊ່ວຍເຫຼືອອັນໃຫຍ່ຫຼວງແລະວ່ອງໄວຕໍ່ເສດຖະກິດພາກພື້ນ,ພ້ອມກັນນັ້ນ,ຍັງແມ່ນຊ່ອງທາງສຳຄັນທີ່ຊ່ວຍເຫຼືອປະຊາຊົນໃຫ້ຫຼຸດພົ້ນອອກຈາກຄວາມທຸກຍາກແລະສ້າງຄວາມຮັ່ງມີ."
ທ່ານອູເດດ ສຸວັນນະວົງ,ຮອງປະທານສະມາຄົມການທ່ອງທ່ຽວອາຊຽນ,ຮອງປະທານສະ ພາອຸດສາຫະກຳການຄ້າແຫ່ງຊາດລາວກ່າວວ່າ,ການຮ່ວມມືດ້ານການທ່ອງທ່ຽວລະຫວ່າງອາຊຽນກັບຈີນໄດ້ຮັບການຂະຫຍາຍຕົວຢ່າງໃຫຍ່ຫຼວງ,ແລະໄດ້ຊີ້ແຈງທິດການຂະຫຍາຍຕົວໃຫ້ວຽກງານລັກສະນະຍຸດທະສາດຮ່ວມຈຳນວນໜຶ່ງລະຫວ່າງສອງຝ່າຍ. ສະມາຄົມການທ່ອງທ່ຽວອາຊຽນກໍໄດ້ສຸມກຳລັງເຂົ້າໃນການບັນລຸເປົ້າໝາຍການພັດທະນາສະຫັດສະວັດໂດຍຜ່ານການພັດທະນາການທ່ອງທ່ຽວ,ແລະໄດ້ວາງເປົ້າໝາຍແລະແຜນການພັດທະນາສາມລາຍການ,ຄືໜຶ່ງແມ່ນແຜນການພັດທະນາດ້ານການທ່ອງທ່ຽວແລະຊັບພະຍາກອນແຮງງານ,ສອງແມ່ນແຜນການພັດທະນາການທ່ອງທ່ຽວຢ່າງຕໍ່ເນື່ອງທີ່ມີຈຸດປະສົງເພື່ອຫຼຸດຜ່ອນຄວາມທຸກຍາກ,ແລະອັນສຸດທ້າຍແມ່ນແຜນການພັດທະນາຕະຫຼາດແລະຜະລິດຕະພັນການທ່ອງທ່ຽວຂອງອະນຸພາກພື້ນແມ່ນ້ຳຂອງ.ເປົ້າໝາຍແລະແຜນການພັດທະນາເຫຼົ່ານີ້ລ້ວນແຕ່ໄດ້ຈັດເຂົ້າໃນເປົ້າໝາຍການພັດທະນາການທ່ອງທ່ຽວຂອງບັນດາປະເທດອາຊຽນແລະແຜນການຍຸດທະສາດດ້ານການທ່ອງທ່ຽວຂອງອາຊຽນແຕ່ປີ2011ຫາປີ2015.
