ວັນທີ4ພະຈິກນີ້,ກອງປະຊຸມສຸດຍອດຄັ້ງທີ6ຂອງຜູ່ນຳກຸ່ມ20ປະເທດຫຼືG20ສືບຕໍ່ດຳເນີນໄປຢູ່ເມືອງການຂອງຝະຣັ່ງ.ກອງປະຊຸມໄດ້ປຶກສາຫາລືກ່ຽວກັບບັນຫາຕ່າງໆ ຄື:ຄວາມ ປັ່ນປ່ວນຂອງລາຄາສິນຄ້າຂະໜາດໃຫຍ່,ວຽກເຮັດງານທຳແລະແຮງງານດັ່ງນີ້ເປັນຕົ້ນ.ທ່ານຫູຈິນທ່າວ,ປະທານປະເທດຈີນໄດ້ເຂົ້າຮ່ວມກອງປະຊຸມແລະປະກອບຄຳຄິດຄຳເຫັນກ່ຽວກັບຫົວຂໍ້ສະເພາະໃນບັນຫາດັ່ງກ່າວ.
ທ່ານຫູຈິນທ່າວຊີ້ອອກວ່າ,ກ່ຽວກັບບັນຫາຄວບຄຸມຄວາມປັ່ນປ່ວນຂອງລາຄາສິນຄ້າຂະ ໜາດໃຫຍ່,ກຸ່ມG20ຄວນເອົາການເຮັດໃຫ້ລາຄາສິນຄ້າຂະໜາດໃຫຍ່ໝັ້ນທ່ຽງປະສານສົມທົບກັບການເຕີບໂຕຂອງເສດຖະກິດໂລກ,ເປີດກວ້າງຄວາມສາມາດດ້ານການຜະລິດ,ເພີ່ມທະວີການຕິດຕາມຄຸ້ມຄອງຕໍ່ຕະຫຼາດການທະນາຄານ,ເພີ່ມທະວີຄວາມໂປ່ງໃສຂອງການຊື້ຂາຍໃນຕະຫຼາດ,ສະກັດກັ້ນການກະທຳທີ່ເກັງກຳໄລແລະປັ່ນລາຄາ,ພະຍາຍາມຊຸກ ຍູ້ໃຫ້ລາຄາສິນຄ້າຂະໜາດໃຫຍ່ຮັກສາຢູ່ໃນລະດັບອັນເໝາະສົມແລະໝັ້ນທ່ຽງໃນຂັ້ນພື້ນຖານ;ຮ່ວມກັນໃຊ້ມາດຕະການໃນດ້ານເສດຖະກິດຮູບປະທຳ,ການຄ້າແລະການທະນາຄານ,ສ້າງລະບົບຄົ້ນຄວ້າ,ພັດທະນາແລະເຜີຍແຜ່ເຕັກນິກທາງດ້ານພະລັງງານແລະກະສິກຳທີ່ກ້າວໜ້າ,ຊຸກຍູ້ໃຫ້ລະບົບການຄ້າສາກົນທີ່ທ່ຽງທຳ,ສົມເຫດສົມຜົນແລະບໍ່ມີການຈຳແນກນັ້ນເປັນຮູບເປັນຮ່າງຂຶ້ນ,ຊຸກຍູ້ໃຫ້ຕະຫຼາດສິນຄ້າຂະໜາດໃຫຍ່ສາກົນມີການພັດທະນາຢ່າງມີລະບຽບການ,ປອດໄສແລະໝັ້ນທ່ຽງ;ຊຸກຍູ້ການໂອນເຕັກນິກແລະການສະໜັບສະໜູນດ້ານເງິນທຶນໃຫ້ແກ່ປະເທດທີ່ພວມພັດທະນາ,ຕັ້ງໜ້າຊ່ວຍເຫຼືອປະເທດທີ່ພວມພັດທະນາບັນລຸຄວາມປອດໄພດ້ານພະລັງງານແລະຄວາມປອດໄພດ້ານສະບຽງອາຫານ.
ທ່ານຫູຈິນທ່າວກ່າວວ່າ,ບັນຫາວຽກເຮັດງານທຳພົວພັນເຖິງຊີວິດການເປັນຢູ່ຂອງປະຊາ ຊົນ,ປະເທດຕ່າງໆຄວນເອົາວຽກງານທີ່ເພີ່ມວຽກເຮັດງານທຳແລະເຮັດໃຫ້ວຽກເຮັດງານທຳໝັ້ນທ່ຽງ ໂດຍສະເພາະແມ່ນວຽກເຮັດງານທຳຂອງຊາວໜຸ່ມແລະກຸ່ມຄົນທີ່ດ້ອຍໂອກາດນັ້ນໄວ້ວາງຢູ່ບ່ອນທີ່ມີບູລິມະສິດໃນແຜນການພັດທະນາເສດຖະກິດສັງຄົມ.ຈີນຍຶດໝັ້ນຖືການຊຸກຍູ້ວຽກເຮັດງານທຳຢ່າງເຕັມທີ່ເປັນໜ້າທີ່ອັນດັບໜຶ່ງແຫ່ງການຮັບປະກັນແລະປົວແປງຊີວິດການເປັນຢູ່ຂອງປະຊາຊົນໃຫ້ດີຂຶ້ນ,ກໍ່ແມ່ນມາດຕະການສຳຄັນອັນໜຶ່ງເພື່ອເປີດກວ້າງຄວາມຕ້ອງການພາຍໃນປະເທດ.ນີ້ກໍ່ແມ່ນການປະກອບສ່ວນອັນສຳຄັນຕໍ່ການຟື້ນຕົວຂອງເສດຖະກິດໂລກແລະການຫຼຸດການຫວ່າງງານ.
ພາຍຫຼັງເຂົ້າຮ່ວມກອງປະຊຸມສຸດຍອດຂອງຜູ່ນຳG20ແລ້ວ,ໃນວັນທີ5ພະຈິກນີ້,ທ່ານຫູຈິນທ່າວໄດ້ກັບຄືນມາຮອດປັກກິ່ງ.
